Kwenda na mambu ke na kati

Kwenda na tansi ya malongi

 DISOLO YA LUZINGU

Kuyindula Zola na Mono ya Luyantiku Me Sadisaka Mono na Kukanga Ntima

Kuyindula Zola na Mono ya Luyantiku Me Sadisaka Mono na Kukanga Ntima

NA 1970, na nsungi ya mwini, mono belaka mpi bo nataka mono na lupitalu ya Valley Forge na mbanza Phoenixville, na provense ya Pennsylvanie na États-Unis. Munganga mosi ya bakala vandaka kutesa mono tansio mbala na mbala na nima ya minuta 30. Na ntangu yina, mono vandaka soda mpi mono vandaka ti bamvula 20, mono belaka maladi mosi ya ngolo. Munganga yina vandaka mbuta kuluta mono, kansi yandi waka boma mingi. Sambu tansio na mono vandaka kulanda na kukita, mono yulaka yandi nde, “Keti nge me monaka ntete ve kisika muntu ke fwa?” Yandi talaka mono na luse ya mawa mpi vutulaka nde, “Ve, mono me monaka ntete ve.”

Na ntangu yina, mono yindulaka nde mono ta zinga diaka ve. Kansi, inki mambu kuminaka mono na lupitalu yina? Bika mono tela beno disolo ya luzingu na mono.

MUTINDU MONO KUDIKOTISAKA NA MVITA

Mono belaka ntangu mono vandaka nsadisi ya munganga yina vandaka kupasula bantu, na nsungi yina bo nwanaka mvita na Vietnam. Mono vandaka kusepela mingi na kusadisa bambefo mpi bantu yina vandaka kulwala na mvita. Lukanu na mono vandaka ya kukuma kupasula bantu. Mono kumaka na insi Vietnam na Yuli 1969. Bonso banzenza yonso yina ke kwendaka kuna, bo nataka mono na bisika mingi sambu mono zaba mpi kuyikana ti mutindu na bo ya kuzinga mpi mwini ya ngolo yina kele kuna.

Bilumbu fioti na nima ya kuyantika kisalu na mono na lupitalu ya Delta de Mekong na Dong Tam, ba-avio mingi kwisaka ti bantu mingi yina lwalaka na mvita. Mono vandaka kuzola insi na mono mingi mpi vandaka na mpusa ya kusansa kukonda kusukinina basoda yina vandaka kubela. Beto vandaka kuyidika basoda yina vandaka ti bamputa sambu na kukotisa bo nswalu na bakontenere yina beto yidikaka sambu na kupasula bantu. Na kati, munganga mosi vandaka kupasula bantu, munganga ya nkaka vandaka kutobula ntunga ya anestezi, munganga ya nkaka diaka vandaka kuyidika bambefo na ntwala ya kupasula bo, mpi munganga ya iya vandaka kuzikisa mutindu minganga ya nkaka ke sala. Minganga yonso vandaka kufuluka kaka na suku yina ya fioti, sambu na kugulusa luzingu ya bantu yina vandaka kubela. Bo kitisaka ve bima ya nkaka yina vandaka na ba-avio yina. Bo zabisaka mono nde bima yina kele ti bamvumbi ya basoda yina fwaka na mvita. Tala mutindu mono kudikotisaka na mvita.

MUTINDU MONO YANTIKAKA KUSOSA NZAMBI

Ntangu mono vandaka leke, mono zabaka mambu ya nkaka ya me tala kieleka

Ntangu mono vandaka leke, mono zabaka mambu ya nkaka ya kieleka yina Bambangi ya Yehowa ke  longaka. Mama na mono longukaka Biblia ti Bambangi ya Yehowa, kansi yandi bakaka ve mbotika. Mono vandaka kusepela kuvanda na lweka ya mama ntangu bo vandaka kulonguka. Kilumbu mosi, mono vandaka kutambula ti tata na mono ya lundi mpi beto lutaka na lweka ya Nzo ya Kimfumu. Mono yulaka yandi nde, “Yai nki?” Yandi vutulaka nde, “Kumeka ve kukwenda pene-pene ya bantu yina!” Sambu mono vandaka kuzola tata na mono ya lundi mingi mpi vandaka kutudila yandi ntima, mono waka ndongisila na yandi. Yo yina, mono vandaka kusolula diaka ve ti Bambangi ya Yehowa.

Ntangu mono katukaka na Vietnam, mono kumaka ti mpusa ya kuzaba Nzambi. Mambu ya mbi yina mono vandaka kuyindula kumaka kuyangisa mabanza na mono mingi. Mono vandaka kuyindula nde ata muntu mosi ve bakisaka mambu yina vandaka kusalama na Vietnam. Mono ke yibuka diaka mutindu bantu ya nkaka vandaka kutambula na kimvuka na babala-bala mpi bo vandaka kutuba nde basoda ya Amerika ke fwaka bana ya fioti, sambu bansangu monisaka nde, na nsungi ya mvita bo vandaka kufwa bana ya fioti yina salaka ata kima mosi ve.

Sambu na kulungisa mpusa na mono ya mambu ya kimpeve, mono yantikaka kukwenda na banzo-nzambi ya kuswaswana. Mono vandaka kuzola Nzambi, kansi mono vandaka ve kusepela ti mambu yina vandaka kusalama na banzo-nzambi yina. Nsuka-nsuka, na Februari 1971, na kilumbu ya Lumingu, mono kwendaka na Nzo ya Kimfumu mosi ya Bambangi ya Yehowa na Delray Beach, na provense ya Floride.

Ntangu mono kotaka na Nzo ya Kimfumu, diskure ya bantu yonso vandaka me kuma na nsuka, mono landaka kulonguka ya Nzozulu ya Nkengi yina salamaka na nima. Mono ke yibuka diaka ve ntu-diambu ya disolo yina beto longukaka, kansi mono ke yibuka kaka nde bana ya fioti vandaka kukangula Babiblia na bo sambu na kusosa baverse. Yo yitukisaka mono mingi kibeni! Mono vandaka kutala mpi kuwidikila na dikebi yonso. Ntangu mono basikaka na Nzo ya Kimfumu, Jim Gardner, mpangi-bakala mosi yina vandaka ti bamvula kiteso ya 80, kwisaka pene-pene na mono. Yandi vandaka ti mukanda mosi na maboko yina vandaka ti ntu-diambu La vérité qui conduit à la vie éternelle; yandi yulaka mono nde: “Keti nge ta sepela kulonguka mukanda yai?” Beto wakanaka nde beto ta kutana na Kiya na suka sambu na kuyantika kulonguka Biblia.

Na mpimpa ya Lumingu yina, mono kwendaka na kisalu. Mono vandaka kusala na lupitalu ya muntu mosi na Boca Raton, na Floride, mono vandaka kusansa bambefo yina ke vandaka na mfunu ya lusansu ya nswalu-nswalu. Kisalu na mono ya kilumbu yina vandaka banda na 23h00 tii na 7h00. Na mpimpa makelele vandaka ve, mono tangaka mukanda yina ya mvimba. Munganga mosi ya mbuta kwisaka pene-pene na mono, botulaka mukanda yina na maboko na mono, na nima ya kutala lutiti na yo ya zulu, yandi tubaka na ndinga ya ngolo nde: “Keti nge ke zola kukuma Mbangi ya Yehowa?” Mono botulaka mukanda yina na maboko na yandi mpi mono tubaka nde: “Mono ke tanga yo kaka, kansi mono ke mona nde mono mpi ta kuma Mbangi ya Yehowa!” Yandi kwendaka, mpi mono manisaka kutanga yo na mpimpa yina.

Mono longukaka Biblia ti Jim Gardner, Mukristu mosi ya bo me tulaka mafuta, yina zabaka Charles Taze Russell mbote

Ntangu Mpangi Gardner kwisaka kutala mono sambu beto yantika kulonguka, mono yulaka yandi nde: “Inki beto ke longuka?” Yandi tubaka nde: “Mukanda yina mono pesaka nge.” Mono zabisaka yandi nde: “Mono tangaka yo dezia.” Mpangi Gardner tubaka na  mawete yonso nde: “Kana mpidina, beto ke tadila kaka kapu ya ntete.” Mono yitukaka mingi na kumona nde mono bakisaka ve mambu mingi. Yandi zabisaka mono na kusosa baverse na Biblia na mono mosi. Mono longukaka mambu mingi ya me tala Yehowa, Nzambi ya kieleka. Na suka yina, beto longukaka bakapu tatu ya mukanda yina ti Mpangi Gardner yina mono vandaka kubinga Jim. Konso Kiya na suka, beto vandaka kulongaka bakapu tatu ya mukanda yina. Kulonguka yina vandaka kusepedisa mono mingi. Kulonguka Biblia ti Gardner, Mukristu ya bo me tulaka mafuta yina zabaka Charles Taze Russell mbote, vandaka dibaku ya nene kibeni!

Bamposo fioti na nima, mono kumaka nsamuni. Jim sadisaka mono na mambu mingi yina vandaka kuyangisa mono, mu mbandu kusamuna nzo na nzo. (Bis. 20:20) Sambu beto vandaka kusamuna mbala mingi ti Jim, mono kumaka kusepela mingi ti kisalu ya kusamuna. Mono ke tadilaka kisalu yai bonso dibaku ya kuluta nene yina mono kele na yo. Kuvanda nduku ya kisalu ya Nzambi kele kiese kibeni!1 Bak. 3:9.

MUTINDU MONO YANTIKAKA KUZOLA YEHOWA

Ntangu yai, bika mono tela beno mutindu mono yantikaka kuzola Yehowa. (Kus. 2:4) Zola ya Yehowa me sadisaka mono na kununga mambu ya bitumba yina mono vandaka kuyindula, yina vandaka kuyangisa mono. Diaka, yo me sadisaka mono na kununga bampasi ya nkaka.Yez. 65:17.

Zola ya Yehowa me sadisaka mono na kununga mawi ya mpasi ya mambu yina salamaka na mvita mpi bampasi ya nkaka

Mono bakaka mbotika na Yankee Stadium na Yuli 1971, na lukutakanu mosi ya Distrike yina vandaka ti ntu-diambu “Zina ya Nzambi”

Mono ke yibuka diaka kilumbu mosi ya mfunu na nsungi ya mvula na 1971. Bibuti na mono kulaka mono na nzo. Tata na mono ya lundi vandaka kuzola ve Bambangi ya Yehowa na nzo na yandi! Na ntangu yina mono vandaka ve kibeni ti mbongo. Na lupitalu yina mono vandaka kusala, bo vandaka kufuta mono na nima ya bamposo zole, mpi mono katukaka kusadila mbongo ya mingi na kusumba bilele sambu na kuvanda bunkete na kisalu ya kusamuna. Mono bumbaka ndambu ya mbongo kansi yo vandaka na banki na provense ya Michigan, kisika mono yelaka. Yo yina bilumbu yina, mono kumaka kulala na kamio na mono.  Mono vandaka kuyobila mpi kuyidika nitu na banzo yina ke vandaka na bisika yina bo ke tekaka essence.

Na bilumbu yina mono vandaka kulala na kamio, kilumbu mosi mono kumaka na Nzo ya Kimfumu na ntwala nde lukutakanu ya kisalu ya kusamuna kuyantika. Mono vandaka me katukaka kusala na lupitalu. Mono balukaka na nima ya Nzo ya Kimfumu, mpi mono vandaka na kisika mosi yina ata muntu mosi ve vandaka kumona mono. Na ntangu yina, mono yantikaka kuyindula mambu yina vandaka kusalama na Vietnam, mpi mono yindulaka diaka nsudi ya bantu yina bo vandaka kuyoka tiya mpi menga ya bantu yina beto vandaka kumona, mambu yina yangisaka kansansa na mono mingi. Na mabanza, mono vandaka kumona diaka mutindu bana ya fioti vandaka kuyula mono nde: “Keti mono ta zinga? Keti mono ta zinga?” Mono zabaka nde bo ta fwa kansi, mono salaka yonso sambu na kupesa bo kikesa na mutindu mono vandaka kutula dikebi na kusadisa bantu na kuzaba kieleka. Na ntangu yina, mono kudiyangisaka mingi na mabanza.

Mono ke salaka bikesa sambu na kuvila ve zola na mono ya luyantiku sambu na Yehowa, mingi-mingi na bantangu ya mpasi

Mono sambaka mpi mansanga vandaka kukulumuka mono na meso. (Nk. 56:9) Mono yantikaka kuyindula mingi na yina me tala lufutumuku. Mono bakisaka nde Yehowa Nzambi ta futumuna bantu mpi ta katula mawi yonso ya mpasi yina ke yangisaka mono na mutindu mono monaka kisika yina bo vandaka kufwa bantu mingi, mpi nde yandi ta katula bampasi ya nkaka yina ke yangisaka mono mpi bantu ya nkaka. Nzambi ta futumuna bana yina mpi ta pesa bo dibaku ya kulonguka kieleka. (Bis. 24:15) Ntangu mono yibukaka mambu yai, ntima na mono fulukaka na zola ya mingi sambu na Yehowa. Kilumbu yina me bikalaka kilumbu mosi ya mfunu sambu na mono. Banda kilumbu yina, mono ke salaka bikesa, mingi-mingi na bantangu ya mpasi, na kuvila ve ata fioti mutindu mono yantikaka kuzola Yehowa.

YEHOWA ME SADISAKA MONO MINGI

Ntangu bantu ke nwanaka mvita, bo ke salaka mambu mingi ya mbi. Mono mpi vandaka kusala mambu ya mbi. Kansi, baverse zole me sadisaka mono mingi. Ya ntete kele Kusonga 12:10, 11, yina ke tuba nde bo nungaka Diabulu kaka ve sambu na nsangu yina beto ke longaka kansi mpi sambu na menga ya Mwana-Dimeme. Verse ya zole kele Bagalatia 2:20. Verse yai me sadisaka mono na kubakisa nde Yezu Kristu fwaka “sambu na mono.” Na nzila ya menga ya Yezu, Yehowa me lolulaka masumu na mono. Kuzaba mambu yai me sadisaka mono na kukuma ti kansansa ya bunkete mpi yo me pusaka mono na kusadisa bantu ya nkaka na kuzaba kieleka na yina me tala Yehowa, Nzambi yina ke wilaka bantu mawa!Baeb. 9:14.

Ntangu mono ke yindulaka luzingu na mono ya ntama, mono ke tondaka Yehowa mingi na mutindu yandi me sadisaka mono. Mu mbandu, kilumbu yina Jim zabaka nde mono ke lalaka na kamio, yandi nataka mono na mpangi-nkento mosi yina vandaka ti nzo ya nene. Mono bakisaka kibeni nde Yehowa sadilaka Jim mpi mpangi-nkento yina sambu na kupesa mono kisika ya mbote ya kuzinga. Yehowa kele Nzambi ya zola kibeni! Yandi ke lungisaka bampusa ya bansadi na yandi.

MONO BAKISAKA NDE MONO FWETE LONGA KIELEKA NA MAWETE YONSO

Na Mayi 1971, mono kwendaka kusala bisalu ya nkaka na Michigan. Na ntwala ya kukatuka na dibundu ya Delray Beach, na provense ya Floride, mono tulaka mikanda mingi na kamio mpi mono salaka nzietelo na nzila mosi ya nene. Na ntwala ya kukuma na provense ya Géorgie, mikanda yonso manaka. Mono samunaka nsangu ya mbote na kikesa yonso na bisika ya mutindu na mutindu. Mono vandaka kutelema na baboloko sambu na kusamuna, nkutu mono kabulaka batrakiti na bisika yina bantu ke pemaka. Mono ke kudiyulaka kana bankeni yina mono kunaka me yelaka.1 Bak. 3:6, 7.

Mono ke tuba na masonga yonso nde, ntangu mono yantikaka kulonguka Biblia, mono vandaka ve mawete, mingi-mingi ntangu mono vandaka kusolula ti bantu ya dibuta na mono. Sambu mono kumaka kuzola Yehowa mingi, mono vandaka kuzabisa bo nsangu ya mbote na kikesa yonso, kansi mono vandaka ve kusala yo na mawete yonso. Mono vandaka kuzola mingi John ti Ron, bantu ya dibuta na beto, mpi mono vandaka kuzabisa bo kieleka na mutindu mosi ya kukonda mawete.  Na nima, mono lombaka ndolula sambu na kikalulu yina. Mono me vidisaka ve kivuvu nde kilumbu kele bo ta ndima kieleka. Banda na ntangu yina, Yehowa me longaka mono dilongi mosi ya mfunu, mpi mono me kumaka mawete na kisalu ya kusamuna mpi ntangu mono ke longukaka Biblia ti bantu.Bakol. 4:6.

BANTU YA NKAKA YINA MONO ME ZOLAKA

Mono ke yindulaka zola na mono sambu na Yehowa, mpi mono ke vilaka ve bantu ya nkaka yina mono me zolaka na luzingu na mono. Nkento na mono Susan kele muntu ya nkaka yina mono ke zolaka mingi. Mono bakaka lukanu ya kukwela nkento mosi yina ta sadisa mono na kisalu ya Nzambi. Susan kele nkento mosi ya kikesa mpi ya kimpeve. Mono ke yibuka diaka kilumbu mosi, ntangu beto vandaka kutalana sambu na makwela, mono kwendaka kutala Susan na mbanza Cranston, na provense ya Rhode Island. Yandi vandaka na ntwala ya nzo na bo mpi vandaka kutanga Nzozulu ya Nkengi ti Biblia na yandi na lweka. Diambu yina yitukisaka mono kele nde, yandi vandaka kutanga disolo mosi ya Nzozulu ya Nkengi yina vandaka ve disolo ya kulonguka, mpi yandi vandaka kusosa baverse yina vandaka na kati ya disolo na Biblia na yandi. Mono monaka nde, ‘Yandi fwete vanda nkento mosi ya kimpeve kibeni!’ Beto kwelanaka na Desembri 1971, mpi mono ke vandaka na ntonda mingi sambu yandi ke sadisaka mono mingi.

Mono ti Susan, mpi bana na beto Paul ti Jesse

Yehowa me sakumunaka beto, beto me butaka bana zole ya babakala Jesse ti Paul. Yehowa me taninaka bo mpi bo me yelaka mbote. (1 Sam. 3:19) Sambu bo ke  zolaka kieleka, bo ke pesaka beto lukumu. Bo ke landa kaka kusadila Yehowa mpi bo ke yibukaka zola na bo ya luyantiku sambu na Yehowa. Bo yonso zole me lungisa bamvula kuluta 20 na kisalu ya ntangu yonso. Mono ke vandaka diaka na kiese sambu na Stephanie ti Racquel, bankento ya bana na mono yina mono ke bakaka bonso bana na mono. Bana na mono me kwelaka bankento ya kimpeve yina ke zolaka Yehowa na ntima mpi na moyo na bo ya mvimba.Baef. 6:6.

Dibuta na beto vandaka kusepela kusamuna na bateritware yina bansamuni ke samunaka kibeni ve

Na nima ya mbotika na mono, mono salaka bamvula 16 na Rhode Island, kisika yina mono zolaka nkento na mono. Mono ke yibuka mpi bantangu ya kiese yina mono lutisaka ti bankuluntu yina beto vandaka kusala ti bo. Mono kele mpi na ntonda sambu na bankengi ya nziunga mingi yina sadisaka mono. Kusala kumosi ti bampangi yina ke taninaka zola na bo ya luyantiku sambu na Yehowa kele dibaku ya nene kibeni! Na 1987, beto kwendaka na Caroline du Nord sambu mpusa ya bansamuni vandaka mingi, mpi kuna beto salaka kinduku ti bampangi ya nkaka. *

Na kisalu ya nziunga, mono ke twadisa lukutakanu ya kisalu ya kusamuna

Na Augusti 2002, bo bingisaka mono ti Susan na kukuma kusala na Betele ya Patterson na États-Unis. Mono vandaka kusala na Biro ya Ke Talaka Kisalu ya Bilanga, Susan vandaka kusala na kisika yina bo ke yobisaka bilele ya bampangi. Yandi vandaka na kiese ya kusala kisalu yina! Na Augusti 2005, mono bakaka dibaku ya kusala na Nto-Kimvuka. Mono vandaka kumona nde mono me fwana ve na kubaka mukumba yina. Ntangu nkento na mono waka nde mono me baka mukumba yina, yandi kudiyangisaka mingi sambu yandi zabaka nde beto me kuma ti kisalu ya mingi mpi beto ta kuma kusala banzietelo mingi. Susan ke sepelaka ve kusala banzietelo na avio, kansi beto ke salaka banzietelo mingi. Susan ke tuba nde, mambu yina bankento ya bampangi ya nkaka ya Nto-Kimvuka ke tubaka sadisaka yandi na kubaka lukanu ya kusadisa mono mingi na kisalu na mono. Ya kieleka, yandi ke sadisaka mono mingi mpi mono ke zolaka yandi sambu na lusadisu yina yandi ke pesaka mono.

Mono me tulaka bafoto mingi na biro na mono, yina ke yibusaka mono mambu mingi ya luzingu na mono! Kuyibuka zola na mono ya luyantiku sambu na Yehowa me natilaka mono balusakumunu mingi kibeni!

Kulutisa ntangu ti bantu ya dibuta na mono ke pesaka mono kiese ya mingi

^ par. 31 Nzozulu ya Nkengi ya Aprili 1, 2006 lutiti 18 ke tubila mambu ya nkaka ya me tala kisalu ya ntangu yonso ya Mpangi Morris.