Kwenda na mambu ke na kati

Kwenda na tansi ya malongi

“Nge Ndimaka nde Yo Vanda Mutindu Yai”

“Nge Ndimaka nde Yo Vanda Mutindu Yai”

“Nge me bumbaka mbote-mbote mambu yai na bantu ya mayele ti ya ngangu mpi nge me monisaka yo na bana ya fioti.”LUKA 10:21.

1. Inki pusaka Yezu na ‘kuwa kiese ya mingi na nsadisa ya mpeve santu’? (Tala kifwanisu yina kele na luyantiku ya disolo.)

KETI nge lenda mona na mabanza mutindu Yezu kumaka ntangu yandi “waka kiese mingi na nsadisa ya mpeve santu”? Ziku na mabanza, nge ke mona luse ya Yezu kiese-kiese. Inki vandaka na kisina ya kiese yina? Yandi tindaka balongoki na yandi 70 na kusamuna nsangu ya mbote ya Kimfumu. Yezu vandaka na mpusa ya ngolo ya kuzaba mutindu bo ta lungisa mukumba na bo. Bantu mingi vandaka kutelamina nsangu ya mbote, mu mbandu balongi ya bansiku mpi Bafarize yina longukaka mingi. Bo vandaka kupusa bantu na kutadila Yezu bonso musadi-mabaya mosi ya mpamba-mpamba mpi kutadila balongoki na yandi bonso “bantu ya me longukaka ve mpi ya mpamba-mpamba.” (Bis. 4:13; Mar. 6:3) Ata mpidina, balongoki vutukaka na kiese ya mingi. Ata bo kutanaka ti mbangika ya bantu mpi ya bademo, bo samunaka mbote kibeni! Inki vandaka kibeni na kisina ya kiese mpi ya kikesa na bo?Tanga Luka 10:1, 17-21.

2. (a) Na nki mutindu balongoki ya Yezu vandaka bonso bana ya fioti? (b) Inki sadisaka balongoki ya Yezu na kubakisa bakieleka ya mfunu?

2 Tala mambu yina Yezu zabisaka Yehowa: “Mono ke kumisa  nge na ntwala ya bantu sambu nge me bumbaka mambu yai na bantu ya mayele ti ya ngangu mpi nge me monisaka yo na bana ya fioti. Ya kieleka, Ee Tata, sambu nge ndimaka nde yo vanda mutindu yai.” (Mat. 11:25, 26) Ya kieleka, Yezu zolaka kutuba ve nde balongoki na yandi vandaka kibeni bana ya fioti. Kansi, yandi bingaka bo bana na kufwanisa bo ti bantu ya mayele ya insi na bo yina longukaka mingi, bayina vandaka mayele na meso na bo mosi. Diambu ya kuluta mfunu kele nde, Yezu longisilaka balongoki na yandi na kuvanda bonso bana ya fioti, disongidila, bantu ya kudikulumusa yina kele ti luzolo ya kulonguka mambu. (Mat. 18:1-4) Kudikulumusa natilaka bo nki mambote? Na nsadisa ya mpeve santu, Yehowa sadisaka bo na kubakisa bakieleka ya mfunu, kansi bantu ya mayele yina vandaka kuvweza bo zabaka ata kima mosi ve sambu Satana fikaka bo meso mpi pusaka bo na kuvanda bantu ya lulendo.

3. Inki beto ta longuka na disolo yai?

3 Ntembe kele ve nde Yezu waka kiese kibeni! Yandi vandaka na kiese sambu Yehowa monisaka bakieleka ya kimpeve na bantu ya kudikulumusa ya mitindu yonso, kukonda kutala banzo-nkanda yina bo salaka to mayele na bo. Yandi vandaka mpi na kiese sambu Tata na yandi ndimaka mutindu na bo ya kulonga. Keti Yehowa me sobaka? Inki ke monisa nde yandi ke ndimaka kaka mutindu na beto ya kulonga? Bamvutu ya bangiufula yai ta pesa beto kiese kaka mutindu yo pesaka Yezu kiese.

KUSADISA BANTU YONSO NA KUBAKISA BAKIELEKA YA MFUNU

4. Na nki mutindu Nzozulu ya Nkengi nimero ya pete me sadisaka bantu?

4 Na bamvula yai, mpika ya kwikama mpi ya mayele me kumisaka malongi ya Biblia pwelele mpi pete na kubakisa. Beto tadila bambandu tatu. Ya ntete, na bandinga mingi, beto me kumaka ti Nzozulu ya Nkengi, nimero ya pete. * Nimero yai ke sadisaka kibeni bantu yina me zaba ndinga mbote ve mpi ke tangaka na mpasi. Batata ya mabuta ke monaka nde bana na bo me kumaka kupesa bamvutu na kulonguka ya Nzozulu ya Nkengi, kisadilu ya ntete yina ke sadisaka beto na kubakisa malongi ya Biblia. Bantu mingi me sonikilaka Nto-Kimvuka mikanda sambu na kumonisa ntonda na bo. Mpangi-nkento mosi ke tuba nde, yandi vandaka diaka ve kupesa bamvutu na kulonguka ya Nzozulu ya Nkengi. Yandi ke tuba nde: “Mono vandaka kuwa boma na kutuba.” Na nima ya kusadila Nzozulu ya Nkengi nimero ya pete, yandi ke tuba nde: “Bubu yai, mono me kumaka kupesa bamvutu mingi, mpi mono ke waka diaka boma ve! Mono ke pesa Yehowa mpi beno mersi mingi.”

5. Mbalula ya Nsi-Ntoto ya Mpa yina bo me tomisa me natila bantu nki mambote?

5 Ya zole, na Oktobri 5, 2013 na lukutakanu ya nsuka-mvula, bo basikaka BibliaMbalula ya Nsi-Ntoto ya Mpa, na Kingelesi yina bo me tomisa. * Baverse mingi me kumaka ti bangogo fioti, kansi yo ke basisaka kaka dibanza mosi na mutindu ya pete. Mu mbandu, Yobi 10:1 vandaka ti bangogo 27 kansi yo me kuma ti bangogo 19; Bingana 8:6 vandaka ti bangogo 20, kansi bubu yai yo me kuma 13. Bantu me kumaka kubakisa mbote baverse yai zole na mbalula yai ya mpa. Mukristu mosi yina bo me tulaka mafuta ya me sadilaka Yehowa na kwikama yonso bamvula mingi ke tuba nde: “Ntangu mono tangaka mukanda ya Yobi na mbalula yai ya mpa, mono monaka nde yo kele mbala na mono ya ntete ya kubakisa yo.” Bantu mingi mpi ke tubaka kaka mutindu yina.

6. Inki mutindu nge ke tadilaka mutindu beto me tomisaka mayele na beto ya kubakisa Matayo 24:45-47?

6 Diambu ya tatu ke tadila mutindu beto me  tomisaka mayele na beto ya kubakisa bakieleka ya Biblia. Mu mbandu, Nzozulu ya Nkengi ya Yuli 15, 2013, sadisaka beto na kubakisa “mpika ya kwikama mpi ya mayele.” (Mat. 24:45-47) Yo tendulaka nde mpika ya kwikama kele Nto-Kimvuka, mpi “bansadi” kele bantu yonso yina ke bakaka madia ya kimpeve, yo vanda Bakristu yina bo me tulaka mafuta to “mameme ya nkaka.” (Yoa. 10:16) Kuzaba mambu yai mpi kulonga yo na bantu ya nkaka kele kiese kibeni! Na nki mitindu ya nkaka Yehowa me monisaka nde yandi ke ndimaka nde bantu kulonga na mutindu ya pete mpi ya pwelele?

MUTINDU YA PETE YA KULONGUKA MASOLO YA BIBLIA

7, 8. Pesa bambandu ya ke monisa nde bima ya nkaka na Biblia kele bizuzi.

7 Kana nge kele Mbangi ya ntama, ziku nge me bakisaka nsoba yina me kotaka na mutindu na beto ya kutendula masolo ya Biblia. Na ntama, mikanda na beto mingi vandaka kusadila masolo ya Biblia mpi kumonisa nde yo vandaka bizuzi ya mambu yina zolaka kusalama na bilumbu ke kwisa. Yo vandaka kutubila mpi masolo yina ke monisa mutindu mambu yango lunganaka. Keti Biblia ke monisaka mpi nde mambu ya nkaka ya ntama vandaka bizuzi ya mambu yina zolaka kusalama na nima? Ee. Mu mbandu, mambu yina Yezu tubaka na yina me tala “kidimbu ya profete Yonasi.” (Tanga Matayo 12:39, 40.) Yezu tubaka nde bilumbu yina Yonasi salaka na divumu ya mbisi, yina zolaka kuvanda maziamu ya Yonasi kana Yehowa gulusaka yandi ve, vandaka kumonisa bilumbu yina Yezu ta sala na maziamu.

8 Biblia kele ti masolo ya nkaka yina vandaka bizuzi ya mambu yina zolaka kusalama na nima. Ntumwa Polo tubilaka masolo ya nkaka na kati na yo. Mu mbandu, bangwisana ya Abrahami ti Agare mpi Sara, vandaka kumonisa bangwisana ya Yehowa ti dikanda ya Izraele mpi kitini ya organizasio ya Yehowa yina kele na zulu. (Bag. 4:22-26) Diaka, nzo-tenta, tempelo, Kilumbu ya Ndolula, nganga-nzambi ya nene mpi mambu ya nkaka ya Nsiku ya Moize vandaka ‘bizuzi ya mambu ya mbote yina ke kwisa.’ (Baeb. 9:23-25; 10:1) Kulonguka masolo ya mutindu yai ke vandaka mbote mpi ke kumisaka lukwikilu ngolo. Ata mpidina, keti yo me fwana na kuyindula nde konso muntu mpi konso kima ya bo ke tubilaka na masolo yina ya Biblia vandaka bizuzi ya mambu yina zolaka kusalama na bilumbu ke kwisa?

9. Inki mutindu mikanda na beto ya ntama tendulaka disolo ya Naboti?

9 Na ntama, beto vandaka kutendula mambu mutindu yina. Mu mbandu, beto tadila disolo ya Naboti, yina ntotila-nkento Yezabele sambisaka na mutindu ya kukonda lunungu mpi fwaka yandi sambu bakala na yandi, Akabi, kubaka kilanga ya Naboti ya vinu. (1 Bant. 21:1-16) Na 1932, mikanda na beto monisaka nde disolo yina vandaka mbikudulu ya mambu yina zolaka kusalama na nima. Yo tubaka nde Akabi ti Yezabele vandaka kumonisa Satana ti bantu na yandi; Naboti vandaka kumonisa Yezu; lufwa ya Naboti vandaka kumonisa lufwa ya Yezu. Kansi na nima ya bamvula, mukanda “Que ton nom soit sanctifié,” yina basikaka na 1961 tubaka nde Naboti vandaka kumonisa Bakristu yina bo me tulaka mafuta, Yezabele vandaka kumonisa mabundu ya Kikristu. Ebuna, mbangika yina Yezabele monisilaka Naboti vandaka kumonisa mbangika ya Bakristu yina bo me tulaka mafuta ta kutana ti yo na bilumbu ya nsuka. Na nsungi ya bamvula mingi, bansadi ya Nzambi vandaka kumona nde mutindu yai ya kutendula masolo ya ntama vandaka kukumisa lukwikilu ya bantu ngolo. Kansi, sambu na nki beto ke tendulaka diaka ve masolo ya Biblia mutindu yina?

10. (a) Inki mutindu luswasukusu ke sadisaka mpika ntangu yandi ke tendula masolo ya nkaka ya Biblia? (b) Bubu yai, inki mambu mikanda na beto ke tubilaka mingi?

10 Mutindu beto lenda mona yo, na nsungi ya bamvula mingi, Yehowa me sadisa “mpika  ya kwikama mpi ya mayele” na kukuma diaka mayele mingi. Luswasukusu me sadisaka Nto-Kimvuka na kuyindula mbote-mbote na ntwala ya kutuba nde disolo mosi ya Biblia bikulaka mambu yina zolaka kusalama na bilumbu ke kwisa. Beto ta tuba mutindu yina kana baverse ya nkaka ya Biblia me ndimisa yo. Diaka, yo me monanaka nde bantendula yina ya ntama ya mambu yina vandaka bizuzi mpi kulungana na yo vandaka mpasi na kubakisa. Beto me bakisaka nde yo kele mpasi sambu bantu kubakisa mpi kuyibuka bantendula yina mikanda vandaka kupesa. Yo kele mpi mpasi sambu bantu kubaka malongi yina bo fwete sadila na luzingu na bo. Ata kusala mutindu yina vandaka mbote, kulonguka ya mutindu yina vandaka kusadisa bantu kaka na kuzaba mambu ya ntama yina vandaka bizuzi mpi kulungana na yo. Yo yina bubu yai, mikanda na beto ke tubilaka mingi malongi ya pete yina ke tadila lukwikilu, kukanga-ntima, kudipesa na Nzambi, mpi bikalulu ya nkaka ya mbote yina beto lenda longuka na masolo ya nkaka ya Biblia. *

Mbandu ya Naboti ke pesa beto dilongi mosi ya mfunu (Tala paragrafe 11)

11. (a) Bubu yai, inki mutindu beto ke bakisaka disolo ya Naboti, mpi sambu na nki disolo na yandi ke pesa beto malongi? (b) Sambu na nki mikanda na beto ke tubilaka diaka ve mingi bizuzi mpi kulungana na yo? (Tala “Bangiufula ya Batangi” na nimero yai.)

11 Inki mutindu beto ke bakisaka disolo ya Naboti bubu yai? Na mutindu mosi ya pwelele mpi ya pete beto ke bakisaka nde, Naboti muntu ya lunungu fwaka ve sambu yandi vandaka kumonisa Yezu to kimvuka ya Bakristu yina Nzambi me tulaka mafuta, kansi sambu yandi vandaka muntu ya kwikama. Yandi lemfukilaka bansiku ya Yehowa na ntwala ya muntu yina sadilaka kiyeka na yandi na mutindu ya mbi. (Kut. 36:7; 1 Bant. 21:3) Yo yina, mbandu na yandi ke pesa beto dilongi, sambu konso muntu na kati na beto lenda kutana ti mbangika sambu yandi ke lemfukilaka Yehowa. (Tanga 2 Timoteo 3:12.) Bantu ya mitindu yonso lenda bakisa, kuyibuka mpi kusadila dilongi ya beto me baka na disolo ya muntu yai ya lukwikilu.

12. (a) Inki beto fwete tuba ve na yina me tala masolo ya Biblia? (b) Inki ke sadisaka beto na kulonga malongi ya mpasi na mutindu ya pete? (Tala noti na nsi ya lutiti.)

12 Keti beto fwete tuba nde masolo ya Biblia ke pesaka bantu kaka malongi kansi yo  kele ve ti bantendula ya nkaka? Ve. Kansi bubu yai, mikanda na beto ke sadilaka diaka ve mutindu ya kulonga nde diambu mosi ya ntama ke yibusa beto diambu mosi buna to nde yo vandaka kizuzi ya diambu mosi buna. Yo ke monisaka diaka ve nde masolo mingi ya Biblia vandaka kumonisa mambu yina zolaka kulungana na nima. Mu mbandu, beto lenda tuba nde kwikama ya Naboti na ntwala ya mbangika mpi ya lufwa, ke yibusa beto kwikama ya Kristu mpi ya Bakristu yina bo me tulaka mafuta. Kansi, beto lendaka mpi kuyibuka kwikama ya “mameme ya nkaka” ya Yezu. Mutindu yai ya kufwanisa mambu kele mpi metode ya mbote ya kulonga malongi ya Nzambi. *

MUTINDU YA PETE YA KULONGUKA BINGANA YA YEZU

13. Inki ke monisa nde bubu yai beto ke tendulaka bingana ya Yezu na mutindu ya pete?

13 Yezu Kristu kele Longi yina me luta balongi yonso na ntoto ya mvimba. Bingana kele mosi ya bametode yina yandi sadilaka sambu na kulonga. (Mat. 13:34) Bingana ke pusaka bantu na kuyindula mpi ke simbaka bantima na bo. Keti mikanda na beto mpi ke tendulaka bingana ya Yezu na mutindu ya pete sambu bantu kubakisa? Ee! Beto sepelaka mingi ntangu Nzozulu ya Nkengi ya Yuli 1, 2008 pesaka bantendula ya pwelele ya kingana ya Yezu ya levire, ya nkeni ya mutarde, mpi ya bukondi. Bubu yai, beto me bakisaka nde bingana yai ke tadila Kimfumu ya Nzambi mpi kisalu ya nene yina yo ke sala sambu na kuvukisa balongoki ya kieleka ya Yezu yina kele na nsi-ntoto yai ya mbi.

14. (a) Inki mutindu beto vandaka kutendula ntete kingana ya Yezu ya Musamaria ya mbote? (b) Bubu yai, inki mutindu beto me bakisaka kingana yina ya Yezu?

14 Kansi, inki beto lenda tuba sambu na masolo mpi bingana ya nkaka yina Yezu tubilaka? Ya kieleka, Yezu tubaka mambu ya nkaka na mutindu ya kifwani, kansi ya nkaka vandaka kaka sambu na kupesa bantu malongi. Ebuna, inki bingana vandaka bambikudulu mpi nki bingana vandaka kaka sambu na kupesa malongi? Na nsungi ya bamvula, beto me bakaka mvutu ya pwelele na ngiufula yai. Mu mbandu, beto tadila mutindu beto vandaka kutendula ntete kingana ya Yezu ya Musamaria ya mbote. (Luka 10:30-37) Na 1924, Nzozulu ya Nkengi tubaka nde, Musamaria ya mbote vandaka kumonisa Yezu; nzila yina katukaka na Yeruzalemi mpi kwendaka na Yeriko, yina vandaka ya kufuluka ti bigonsa vandaka kumonisa luzingu ya mpasi yina bantu me kumaka na yo banda bibuti ya ntete kolamaka. Miyibi vandaka kumonisa bamfumu ya bakompani ya nene mpi bantu yina ke salaka mumbongo na lukasi yonso. Nganga-nzambi mpi Mulevi vandaka kumonisa bamfumu ya mabundu ya Kikristu. Bubu yai, mikanda na beto ke sadilaka kingana yai sambu na kulonga Bakristu yonso na kupona-pona ve bantu yina beto fwete sadisa, mingi-mingi na mambu ya kimpeve. Beto kele na kiese sambu Yehowa me kumisaka malongi na yandi pete sambu beto bakisa yo.

15. Inki beto ta tadila na disolo yina ke landa?

15 Na disolo yina ke landa, beto ta longuka kingana ya nkaka ya Yezu: kingana ya bamwense kumi. (Mat. 25:1-13) Ntangu Yezu pesaka kingana yina, inki dilongi yandi zolaka kupesa balongoki na yandi yina ta zinga na bilumbu ya nsuka? Keti beto lenda tuba nde mambu yonso ya kele na kingana yango kele bizuzi ya mambu yina ta salama? Keti yandi zolaka kaka kutuba nde, balongoki na yandi kusadila yo sambu na kubaka malongi yina ta sadisa bo na bilumbu ya nsuka? Disolo yina ke landa ta pesa bamvutu na bangiufula yai.

^ par. 4 Nzozulu ya Nkengi nimero ya pete basisaka ntete na Kingelesi, nimero ya Yuli 2011. Na nima, yo me kumaka kubasika na bandinga ya nkaka.

^ par. 5 Bo me baka bangidika sambu mbalula yai ya bo me tomisa kubasika mpi na bandinga ya nkaka.

^ par. 10 Mu mbandu, mukanda Landa Mbandu ya Lukwikilu na Bo ke tubila luzingu ya bantu 14 yina Biblia ke tubilaka. Yo ke monisa malongi yina beto lenda baka, kansi yo ke tubila ve kana bantu yango vandaka bizuzi to ve.

^ par. 12 Ya kieleka, Ndinga ya Nzambi kele ti mambu mingi yina lenda vanda “mpasi na kubakisa,” mu mbandu, mambu ya nkaka yina kele na mikanda ya Polo. Ata mpidina, bantu sonikaka Biblia na nsadisa ya mpeve santu. Bubu yai, mpeve santu ke sadisaka mpi Bakristu ya kieleka na kubakisa “ata mambu ya mudindu ya Nzambi,” sambu mpeve santu me kumisaka malongi yango pete.2 Pie. 3:16, 17; 1 Bak. 2:10.