Kwenda na mambu ke na kati

Kwenda na tansi ya malongi

 YO ME KATUKA NA MIKANDA NA BETO YA NTAMA

Kieleka Me Kota na Japon

Kieleka Me Kota na Japon

Bo kabulaka baemvitasio ya diskure na Tokyo mpi bo sadilaka ba avio sambu na kumwanga baemvitasio na mbanza Osaka

NA Septembri 6, 1 926, nkengi-ntambudi mosi yina vandaka kusala na États-Unis, vutukaka na insi na yandi Japon, sambu na kusala kisalu ya kimisionere. Muntu mosi yina vandaka kubaka banimero ya Nzozulu ya Nkengi, yantikaka kulonguka Biblia ti kimvuka mosi ya bantu na mbanza Kobe, yandi vandaka kuvingila misionere yina na kiese yonso. Balongoki yina ya Biblia salaka lukutakanu na bo ya nene ya ntete na Yanuari 2, 1 927, na mbanza yina. Bantu 36 vukanaka na lukutakanu yina, mpi bantu 8 bakaka mbotika. Kisalu yantikaka mbote, kansi inki mutindu kimvuka yai ya fioti zolaka kulonga bamilio 60 ya bantu ya Japon yina vandaka na mfunu ya kuzaba kieleka?

Na Mayi 1 927, Balongoki ya Biblia yai ya kikesa salaka kampanie sambu na kuzabisa bantu badiskure yina bo ta sala na mbanza yina. Na ntwala nde diskure ya ntete kusalama na mbanza Osaka, bampangi tulaka mikanda yina vandaka kutubila diskure yango na bisika mingi na mbanza, mpi bo bingisaka bantu ya lukumu 3 000 ya mbanza yina. Bo kabulaka baemvitasio 150 000 mpi sadilaka bazulunalu ya mbanza Osaka sambu na kuzabisa bantu diskure yina ta salama. Bo zabisaka nsangu yango mpi na bantu 400 000 yina vandaka na tre. Na kilumbu ya diskure, bo sadilaka ba avio zole sambu na kumwanga baemvitasio 100 000 na mbanza yina. Bantu kiteso ya 2 300 fulukaka na Nzo mosi na mbanza Osaka sambu na kulanda diskure yina vandaka ti ntu-diambu: “Kimfumu ya Nzambi Me Finama.” Bantu ya nkaka kiteso ya funda mosi vutukaka sambu bisika vandaka diaka ve. Na nima ya diskure, bantu kiteso ya 600, bikalaka sambu na kuyula bangiufula. Na bangonda yina landaka, bo salaka badiskure na Kyoto mpi na bambanza ya nkaka na westi ya Japon.

Na Oktobri 1 927, Balongoki ya Biblia bakaka bangidika sambu na kusala badiskure na Tokyo. Bo tindaka diaka baemvitasio na bantu ya lukumu, mu mbandu ministre ya ntete, ba membre ya parlement, mpi bamfumu ya basoda. Bo tulaka na lweka ya banzila mikanda yina vandaka kutubila diskure yango, bo sadilaka bazulunalu mpi baemvitasio 710 000 sambu na kubingisa bantu, ebuna bantu 4 800 kwisaka kulanda badiskure tatu yina salamaka na ntu-mbanza ya Japon.

BAKOLPORTERE YA KIKESA

Katsuo ti Hagino Miura

Bakolportere (bapasudi-nzila) salaka kisalu ya ngolo ya kuzabisa bantu nsangu ya Kimfumu na banzo na bo. Matsue Ishii, mosi na kati ya bakolportere ya ntete na Japon, ti bakala na yandi Jizo, samunaka na bambanza yai: Sapporo yina kele na nordi ya Sendai, Tokyo, Yokohama, Nagoya, Osaka, Kyoto, Okayama, mpi na Tokushima, yo bikalaka kaka bambanza fioti sambu bo samuna na insi ya mvimba. Mpangi-Nkento Ishii mpi mpangi-nkento mosi ya mbuta Sakiko Tanaka, lwataka mbote sambu na kukwenda kusolula ti bamfumu ya luyalu. Mfumu mosi lombaka bakopi 300 ya mikanda La Harpe de Dieu, mpi Délivrance sambu na kutula yo na biblioteke ya boloko.

Katsuo mpi Hagino Miura ndimaka mikanda yina Mpangi-Nkento Ishii pesaka bo mpi bo bakisaka nswalu nde yo vandaka kulonga kieleka. Na 1 931, bo bakaka mbotika mpi kumaka bakolportere. Haruichi  Yamada ti nkento na yandi Tane mpi bantu mingi ya dibuta na bo ndimaka nsangu ya mbote ya Kimfumu ntangu fioti na ntwala ya mvu 1930. Mpangi Yamada ti nkento na yandi kumaka bakolportere, mwana na bo ya nkento Yukiko kwendaka kusala na Betele ya Tokyo.

“BAYEHU”—YA NENE TI YA FIOTI

Bapasudi-nzila 6 lendaka kulala na Yehu ya Nene

Na bamvula yina, bakamio vandaka ntalu mingi mpi banzila vandaka mbi. Yo yina, Kazumi Minoura mpi bakolportere ya nkaka ya batoko vandaka kusala banzietelo na bapusu-pusu. Bo pesaka yo zina Bayehu sambu Yehu, ntotila mosi ya Izraele vandaka kutambusa pusu-pusu mingi. (2 Bant. 10:15, 16) Bo vandaka ti Bayehu tatu ya Nene. Nda ya konso Yehu vandaka bametre 2,2; nene na yo metre 1, 9; mpi nda na yo ya zulu metre 1, 9. Bapasudi-nzila 6 lendaka kulala na kati. Diaka, na filiale ya Japon bo salaka bavelo 11 yina vandaka ti makuki ya kubenda Bayehu zole ya Fioti. Kiichi Iwasaki, yina salaka Bayehu yina ke tuba nde: “Konso Yehu vandaka ti nzo ya fioti na nima na yo mpi bateri ya kamio sambu na kupedisa minda.” Bakolportere vandaka kumwanga nsangu ya kieleka na Japon, ntangu bo vandaka kutambula ti Bayehu na bangumba mpi na miwanda banda na nordi ya Hokkaido tii na Kyushu na sudi.

Bantu zole lendaka kulala na Yehu ya Fioti

Ikumatsu Ota, yina vandaka kolportere ke tuba nde: “Ntangu beto vandaka kukuma na mbanza mosi, beto vandaka kubikisa bapusu-pusu na beto na lweka ya nzadi to na bisika ya mpenza. Beto vandaka ntete kusosa kukutana ti bamfumu ya luyalu ya mbanza yina; mu mbandu, mfumu ya ntete ya mbanza (maire de la ville) mpi, beto vandaka kukwenda na banzo ya bantu sambu na kunatila bo mikanda. Na nima, beto vandaka kukwenda na mbanza ya nkaka.”

Na mvula yina Balongoki ya Biblia 36 salaka lukutakanu ya nene ya ntete na Kobe, kisalu ya kusamuna vandaka kaka na luyantiku. (Zak. 4:10) Na 1 932, disongidila bamvula tanu na nima, bakolportere mpi bansamuni 103 na Japon, tindaka rapore na bo ya kisalu ya kusamuna, yina monisaka nde bo kabulaka mikanda kuluta 14000. Bubu yai na bambanza mingi ya Japon, kisalu ya kusamuna ke salama na mitindu mingi mpi bansamuni kiteso ya 220 000 ke zabisaka kieleka na insi yai.—Yo Me Katuka na Mikanda na Beto ya Ntama na Japon.

Bifwanisu yina Kiichi Iwasaki yina vandaka kusala Bayehu na Betele ya Japon salaka