Kwenda na mambu ke na kati

Kwenda na tansi ya malongi

Bangiufula ya Batangi

Bangiufula ya Batangi

Keti Bakristu lenda yoka mvumbi na tiya na kisika ya kuzika yo?

Biblia kele ve ti nsiku mosi ya ke buyisa kuyoka mvumbi na kisika ya kuzika yo.

Biblia ke tubila masolo ya bafwa yina bo yokaka nitu to mikwa na bo na tiya. (Yoz. 7:25; 2 Bans. 34:4, 5) Mbala ya nkaka sambu na kumonisa nde, yo fwanaka ve na kuzika bantu yina na mutindu mosi ya mbote. Kansi, bamvumbi mingi yina bo vandaka kuyoka vandaka ve kutendula ntangu yonso mutindu yina.

Lufwa ya Ntotila Saule mpi ya bana na yandi tatu ya babakala ke ndimisa diambu yina. Bo yonso iya fwaka na mvita yina bo nwanaka ti Bafilistia. Mosi na kati ya bana ya Ntotila Saule vandaka Yonatani, nduku ya ngolo ya Davidi yina sadisaka yandi na kwikama yonso. Ntangu basoda ya Izraele yina vandaka kuzinga na Yabeshi-gileadi waka nsangu ya mambu yina salamaka, bo bakaka bamvumbi yina iya, yokaka yo, mpi zikaka mikwa. Na nima, Davidi sikisaka bantu yina ya Izraele sambu na diambu yina bo salaka.—1 Sam. 31:2, 8-13; 2 Sam. 2:4-6.

Kivuvu ya Masonuku ke pesa sambu na bafwa kele lufutumuku—Nzambi ta vutula muntu yina fwaka na luzingu. Ata bo yokaka mvumbi ya muntu yina na tiya to ve, Yehowa kele ti ngolo ya mingi sambu na kuvutula yandi na luzingu ti nitu ya mpa. Baebreo tatu ya kwikama yina Ntotila Nabukodonozore pesaka ntuma nde bo losa bo na dibulu ya tiya, waka ve boma nde kana bo fwa na tiya, Nzambi lendaka diaka ve kuvutula bo na luzingu. (Dan. 3:16-18) Yo kele mpi mutindu mosi sambu na bansadi ya Yehowa ya kwikama yina fwaka na bakan ya konsatrasio na Nazi mpi yina bo yokaka bamvumbi na bo na tiya. Bansadi ya Yehowa mingi me fwaka na tiya to na mitindu ya nkaka yina me bikaka ve ata kidimbu mosi ya me tala bo. Ata mpidina, Biblia ke ndimisa beto nde bo ta futumuka.—Kus. 20:13.

Yehowa kele ve na mfunu ya kuvukisa bitini ya nitu ya muntu sambu na kufutumuna yandi. Diambu yina ke monana pwelele na mutindu lufutumuku ya Bakristu yina bo me tulaka mafuta ke salamaka. Bonso Yezu, yina “Nzambi futumunaka . . . na mpeve,” Bakristu yina bo me tulaka mafuta ke futumukaka kaka ti kimuntu na bo kansi na nitu ya kimpeve. Bo ke kwendaka ve na zulu ata ti kitini mosi ya nitu na bo ya kinsuni.—1 Pie. 3:18; 1 Bak. 15:42-53; 1 Yoa. 3:2.

Beto ke ndimaka nde muntu lenda futumuka sambu beto ke kwikilaka nde Nzambi kele ti ngolo mpi mpusa ya kulungisa balusilu na yandi kansi ve sambu bo yokaka nitu na yandi na tiya to ve. (Bis. 24:15) Ya kieleka, beto lenda bakisa ve mambu yonso na yina me tala mutindu Nzambi futumunaka bantu na ntangu ya ntama to mutindu yandi ta sala yo na bilumbu ke kwisa. Kansi, beto ke tulaka ntima na beto na Yehowa. Yandi me pesaka beto “kipiku” na mutindu yandi me futumunaka Yezu.—Bis. 17:31; Luka 24:2, 3.

Yo ta vanda mbote nde Bakristu kutadila minsiku ya bwala na bo, bansiku ya leta mpi mutindu bantu ya bwala na bo ke tadila kuzika mvumbi. (2 Bak. 6:3, 4) Yo yina, kuyoka mvumbi na tiya to ve kele desizio ya konso muntu to ya konso dibuta.