BIBLIA ke tuba pwelele nde, bakala fwete zola “nkento na yandi mutindu yandi ke kudizolaka.” Mutindu mosi, nkento fwete “vanda ti luzitu ya mudindu sambu na bakala na yandi.” Bo yonso zole fwete lungisa mikumba na bo bonso ‘nsuni mosi.’ (Baef. 5:33; Kuy. 2:23, 24) Na nima ya bamvula, bangwisana mpi zola na kati ya nkento ti bakala ke kumaka ngolo. Nge lenda fwanisa yo ti bansimbulu ya banti zole yina ke yela kisika mosi. Mutindu mosi bangwisana ya zola ya nkento ti bakala yina kele na makwela ya kiese ke kumaka ngolo.

Kansi, inki beto lenda tuba kana mosi na bo me fwa? Bangwisana yina bo vandaka ti yo na luzingu kuzengana. Mbala mingi, bakala to nkento yina nkwelani na yandi me fwa ke bikalaka ti mputa ya nene na ntima, ke kudiwaka yandi mosi, mpi bantangu ya nkaka ke waka makasi to bonso nde yandi me nata makambu. Na nsungi ya bamvula 58 ya makwela na yandi, Daniella zabaka babakala mpi bankento mingi yina fwisaka bankwelani na bo. * Kansi, na nima ya lufwa ya bakala na yandi, Daniella tubaka nde: “Mono me kutanaka ntete ve ti diambu ya mutindu yina. Kana yo kumina nge, nge ta zaba mutindu yo ke salaka.”

Bantu ya nkaka ya ke salaka bansosa ke tuba nde, mpasi ya kufwila nkwelani yina nge vandaka kuzola mingi me luta bampasi yonso yina muntu ke waka. Babakala mpi bankento mingi yina me fwilaka bankwelani na bo ke ndima diambu yina. Bakala ya Millie me fwaka tuka bamvula mingi. Kansi, sambu na luzingu na yandi ya kimufwidi, yandi ke tuba nde:  “Mono ke kudiwaka bonso nde kitini mosi ya nitu na mono ke salaka diaka ve.” Yandi vandaka kutubila mpasi yina yandi ke waka mutindu bakala na yandi me fwaka tuka bamvula 25 me luta.

Susan vandaka kuyindula nde bankento ya nkaka ke lutisaka ndilu na mutindu bo ke dilaka babakala na bo bamvula mingi. Na nima, bakala na yandi fwaka na nima ya kulutisa bamvula 38 ya makwela. Bamvula 20 me luta ntangu yai, kansi yandi ke tuba nde: “Mono ke yindulaka yandi bilumbu yonso.” Mbala mingi, mansanga ke basikaka Susan sambu bakala na yandi ke vandaka diaka ve.

Biblia ke monisa nde mpasi ya kufwila nkwelani ke vandaka ngolo mpi ke zingaka mingi. Ntangu Sara fwaka, bakala na yandi Abrahami, ‘waka mawa mingi sambu na nkento na yandi, mpi dilaka yandi ngolo.’ (Kuy. 23:1, 2) Ata yandi vandaka kukwikila na lufutumuku, Abrahami waka mpasi mingi ntangu nkento na yandi yina yandi vandaka kuzola fwaka. (Baeb. 11:17-19) Na nima ya lufwa ya Rashele, nkento na yandi yina yandi vandaka kuzola mingi, Yakobi landaka kuyindula yandi. Yandi vandaka kutuba mambu ya mbote sambu na yandi na bana na yandi.—Kuy. 44:27; 48:7.

Inki dilongi beto fwete baka na bambandu yai ya Masonuku? Mbala mingi, bakala to nkento yina me fwila nkwelani, ke waka mpasi bamvula mingi. Ntangu bo ke dila to kele na mawa, beto fwete mona ve bonso nde bo me konda kikesa, kansi beto fwete bakisa mpasi na bo ya kufwila muntu yina bo vandaka kuzola mingi. Bo lenda vanda na mfunu nde beto kuditula na kisika na bo mpi kusadisa bo mwa ntangu ya nda.

Luzingu ya muntu yina me fwila nkwelani ke vandaka ve kiteso mosi ti ya mpumpa. Na nima ya kulutisa bamvula mingi na makwela, bakala ke zabaka mutindu ya kulembika nkento na yandi mpi kusimba ntima na yandi ntangu yandi kele na mpasi to na makasi. Kana bakala na yandi me fwa, nkento ke monaka nde muntu yina vandaka kuzola yandi mpi kulembika yandi kele diaka ve. Mutindu mosi, na nima ya bamvula mingi, nkento ke zabaka mutindu ya kusala sambu bakala na yandi kuvanda na ngemba mpi na kiese. Mutindu yandi ke simbaka bakala na yandi na zola yonso, bangogo na yandi ya mawete, mpi dikebi yina yandi ke tudilaka bakala na yandi me luta mambu yonso ya nkaka. Kana nkento me fwa, bakala lenda kudiwa yandi mosi na luzingu na yandi. Yo yina, babakala mpi bankento yina kele na mawa sambu bo me fwilaka bankwelani na bo ke kudiyangisaka mpi ke waka boma na mutindu yina luzingu na bo ta vanda na makwisa. Inki munsiku ya Biblia lenda sadisa bo na kuzwa ngemba mpi kiese?

“Kudiyangisa ve ata fioti sambu na kilumbu yina ke landa, sambu kilumbu yina ke landa ta vanda ti basusi na yo. Konso kilumbu kele ti bampasi na yo.” (Mat. 6:34) Bangogo yai ya Yezu ke tadilaka ntete-ntete bima ya kinsuni yina beto ke vandaka na mfunu na yo, kansi yo me sadisaka mpi babakala ti bankento mingi yina me fwisaka bankwelani na bo yina bo vandaka kuzola mingi. Mwa bangonda na nima ya lufwa ya nkento na yandi, Charles sonikaka nde: “Mpasi yina mono ke waka mutindu Monique me fwaka kele kaka ngolo, mpi bantangu ya nkaka mono ke waka nde yo ke kumaka ngolo kibeni. Kansi, mono me bakisa nde, yo ke vandaka mutindu yina mpi nde mutindu bilumbu ke luta nsuka-nsuka mpasi yina ta mana.”

Ya kieleka, yo lombaka nde Charles, kukanga-ntima mutindu “bilumbu ke luta.” Inki mutindu yandi salaka yo? Yandi ke tuba nde: “Ti lusadisu ya  Yehowa mono yambulaka kuyindula yo mbala mosi mpi na kilumbu mosi.” Charles lutisaka ve ndilu na kudiyangisa. Mpasi na yandi manaka ve kilumbu mosi, kansi yo yalaka yandi ve. Kana bakala to nkento na nge me fwa, sala yonso sambu na kukanga-ntima na mpasi yina mbala mosi mpi na kilumbu mosi. Nge me zaba ve mambote to kikesa yina nge lenda baka na kilumbu yina me landa.

Lufwa vandaka ve na lukanu ya kisina ya Yehowa. Kansi, yo kele mosi ya “bisalu ya Diabulu.” (1 Yoa. 3:8; Bar. 6:23) Satana ke sadilaka lufwa mpi boma yina yo ke basisaka sambu na kukanga bantu mingi na kimpika mpi kukatula bo kivuvu. (Baeb. 2:14, 15) Satana ke sepelaka ntangu muntu mosi me vidisa kivuvu ya kuzwa kiese ya kieleka, ata nkutu ya kuzinga na nsi-ntoto ya mpa ya Nzambi. Yo yina, mpasi yina bakala to nkento ke waka sambu na lufwa ya nkwelani na yandi kele malanda ya disumu ya Adami mpi ya kukolama ya Satana. (Bar. 5:12) Yehowa ta manisa bampasi yonso yina Satana me nataka, na mutindu yandi ta katula lufwa, kinwaninu na yandi ya kuluta mbi. Na kati ya bantu yina me katukaka na kimpika ya boma yina Satana ke basisilaka bantu; nge mpi lenda baka kimpwanza.

Ntembe kele ve nde, ntangu bantu yina ta vutuka na luzingu ta futumuka awa na ntoto, bansoba mingi ta salama. Yindula mutindu bibuti mpi ba-nkaka yina ta futumuka ta kuma malembe-malembe bantu ya kukuka kumosi ti bana na bo mpi bantekolo na bo. Mambu yina ke nataka kinunu ta vanda diaka ve. Mbala ya nkaka, baleke ta tadilaka diaka ve ba-nkaka na bo mutindu bo ke tadilaka bo bubu yai. Keti beto ke ndima ve nde bansoba yai ta vanda diambu mosi ya mpa na dibuta ya bantu?

Kele ti bangiufula mingi yina beto lenda kudiyula sambu na bantu yina ta futumuka, mu mbandu  sambu na bayina me fwilaka bankwelani zole to mingi. Basaduse yulaka ngiufula mosi sambu na nkento yina fwilaka bakala na yandi ya ntete, na nima ya zole, mpi tii yandi fwilaka babakala tanu ya nkaka. (Luka 20:27-33) Mambu ta salama nki mutindu ntangu bantu yina ta futumuka? Beto me zaba mpenza ve, mpi mfunu kele ve na kupesa bangindu na mambu yina to kudiyangisa sambu na mambu yina beto me zaba ve. Na diambu ya mutindu yina, beto fwete tula kaka ntima na Nzambi. Diambu ya kieleka kele nde, mambu yonso yina Yehowa ta sala na makwisa ta vanda ya mbote, mpi ya beto lenda tudila ntima kansi ve ya ke pesa boma.

Mosi ya malongi ya pwelele yina kele na Ndinga ya Nzambi kele nde bafwa ta vutuka na luzingu. Masolo ya ntama ya ke tubilaka balufutumuku ya kele na Biblia ke ndimisa beto nde “bantu yonso ya kele na maziamu ya mbambukilu ta wa ndinga [ya Yezu] mpi ta basika.” (Yoa. 5:28, 29) Bantu yina ta vanda na luzingu na ntangu yina ta vanda na kiese ya kukutana ti bantu yina me katuka na kimpika ya lufwa. Na ndambu ya nkaka, beto lenda bakisa ve kiese yina bafwa yina ta futumuka ta wa.

Ntangu bamiliare ya bafwa ta yantika kufutumuka, ntoto ta fuluka ti kiese ya mingi kibeni. (Mar. 5:39-42; Kus. 20:13) Kuyindulula kimangu yai ta salama na makwisa fwete lembika bantu yonso me fwilaka bantu yina bo vandaka kuzola.

Keti yo kele ti bikuma yina lenda pusa bankaka na kuwa mawa ntangu lufutumuku ta salama? Mvutu ya Biblia kele nde ve. Yezaya 25:8, ke tuba nde Yehowa ‘ta katula kibeni lufwa kimakulu.’ Yo ke monisa mpi nde yandi ta katula mpasi yina lufwa ke nataka, sambu mbikudulu yina ke yika nde, Yehowa Nkwa-Kimfumu “ta katula mansanga na meso ya bantu yonso.” Kana nge kele na mawa sambu nkwelani na nge me fwaka, ntembe kele ve nde lufutumuku ta pesa nge bikuma ya kuvanda na kiese.

Ata muntu mosi ve me zaba mbote-mbote mambu yonso yina Nzambi ta sala na nsi-ntoto ya mpa. Yehowa ke tuba nde: “Mutindu zulu kele ntama ti ntoto, mutindu yo yina mpi banzila na mono ti bangindu na mono me luta ya beno.” (Yez. 55:9) Lusilu ya lufutumuku yina Yezu pesaka ke pesa beto dibaku ya kutula ntima na Yehowa, bonso Abrahami. Diambu ya mfunu yina konso Mukristu fwete sala kele ya kusala mambu yina Nzambi ke lomba beto sambu beto  vanda “bantu yina bo me monaka nde bo me fwana na kubaka luzingu na ngidika ya bima yina ke kwisa.”​—Luka 20:35.

Na kisika ya kudiyangisa mingi, vanda ti kivuvu. Na kutadila mabanza ya bantu, bilumbu ke kwisa me konda kivuvu. Kansi, Yehowa ke pesa beto kivuvu mosi ya kuluta mbote. Beto lenda zaba mpenza ve mutindu Yehowa ta lungisa bampusa na beto, ata mpidina beto fwete vanda ve ti baketi-keti nde yandi ta sala yo. Ntumwa Polo sonikaka nde: “Kivuvu yina ke monanaka kele ve kivuvu, sambu kana muntu ke mona kima mosi, keti yandi ta tula kivuvu ya kubaka yo? Kansi kana beto ke tula kivuvu na kima yina beto ke mona ve, beto ke landa kuvingila yo ti nzala ya ngolo mpi kukanga-ntima.” (Bar. 8:24, 25) Kuvanda ti kivuvu ya ngolo na balusilu ya Nzambi ta sadisa nge na kukanga-ntima. Kukanga-ntima ta sadisa nge na kumona mambu mingi ya kitoko na bilumbu ke kwisa ntangu Yehowa ‘ta pesa nge bima yina ntima na nge ke zola.’ Yandi ta lungisa ‘banzala ya bima yonso yina ke zinga.’​—Bank. 37:4; 145:16; Luka 21:19.

Ntangu fioti na ntwala ya lufwa ya Yezu, bantumwa na yandi kudiyangisaka mingi na mabanza. Yezu lembikaka bo na bangogo yai: “Beno bika ve nde bantima na beno kukuma kisaka-saka. Beno monisa lukwikilu na Nzambi, beno monisa mpi lukwikilu na mono.” Yandi zabisaka bo nde: “Mono ta bikisa beno ve beno mosi. Mono ta kwisa na beno.” (Yoa. 14:1-4, 18, 27) Bangogo na yandi pesaka balongoki na yandi yina bo me tulaka mafuta kikuma ya kuvanda ti kivuvu mpi kukanga-ntima na nsungi ya bamvu-nkama mingi. Mutindu mosi, bantu yina kele ti mpusa ya kumona bantu yina bo vandaka kuzola na lufutumuku fwete vidisa ve kivuvu. Yehowa mpi Mwana na yandi ta bikisa bo ve bo mosi. Nge lenda ndima yo!