Kwenda na mambu ke na kati

Kwenda na tansi ya malongi

 YO ME KATUKA NA MIKANDA NA BETO YA NTAMA

“Mono Vandaka Bonso Kafulu na Mukolu na Yo”

“Mono Vandaka Bonso Kafulu na Mukolu na Yo”

NA KAMPANYE mosi yina salamaka bilumbu uvwa kansi nswalu-nswalu na Augusti tii na Septembri 1929, bansamuni kuluta 10 000 mwanganaka na États-Unis ya mvimba. Bo kabulaka mafunda ya mikanda mpi tumikanda na bantu. Na kati ya bansamuni yina ya Kimfumu, kuvandaka ti ba kolportere (bapasudi-nzila) kiteso ya funda mosi. Ntalu na bo kumaka mingi! Bulletin * tubaka nde: “Yo vandaka diambu ya kuyituka” na mutindu ntalu ya bapasudi-nzila kumaka mingi mbala tatu yantika na 1927 tii na 1929.

Na nsuka ya 1929, bampasi ya mbongo kotaka na insi ya mvimba. Na Kizole Oktobri 29, 1929—​kukulumuka ya ntalu ya Bourse de New York nataka bampasi ya ngolo ya mbongo na nsi-ntoto ya mvimba. Mafunda ya babanki bwaka. Baferme yambulaka kusala. Ba izini ya nene kangamaka. Bamilio ya bantu vidisaka bisalu. Na 1933, bo vandaka kubotula bantu banzo kiteso ya 1 000 na kilumbu sambu bo vandaka na bamfuka na banki.

Inki mutindu bansamuni ya ntangu yonso vandaka kuzinga na ntangu yina ya mpasi? Mosi ya mambu yina sadisaka bo kele banzo ya bapine. Sambu banzo yina vandaka ve ya kufutila mpi bo vandaka ve kufutila yo mpaku, banzo ya kamio to bawago sadisaka bapasudi-nzila mingi na kusamuna ata bo vandaka ti mbongo fioti. * Mpi na ntangu ya balukutakanu ya nene, banzo yina ya bakamio vandaka kukuma basuku ya otele ya ofele. Na 1934, Bulletin basisaka bapula na mutindu ya kusala banzo ya bapine kansi ya mbote mpi ya kele ti bima yonso ya kuzingila, mu mbandu pompi ya masa, resho, mbeto mpi masini ya kupesa tiya na nsungi ya madidi.

Bansamuni mingi na ntoto ya mvimba kumaka kusala banzo ya bapine. Victor Blackwell ke tuba nde: “Noa longukaka ve kutunga maswa, mono mpi me zaba ve mutindu bo ke tungaka nzo ya bapine.” Kansi, Victor Blackwell tungaka maswa.

Avery Bristow ti nkento na yandi Lovenia vandaka ti nzo ya kamio. Avery ke tuba nde: “Mono vandaka bonso kafulu na mukolu na yo​—mono vandaka kutambula ti nzo na mono.” Bankwelani yai vandaka kusala kisalu ya kimupasudi-nzila ti mpangi Harvey Conrow ti nkento na yandi Anne, yina vandaka mpi ti nzo ya kamio kansi yo vandaka ti bibaka ya bakarto ya bo me pakula gudro. Ntangu yonso yina bo vandaka kunata nzo yina na kisika ya nkaka, bitini ya bapapie vandaka kubwa. Avery ke tuba nde: “Ata muntu mosi ve me monaka dezia wago ya mutindu yina mpi tii bubu yai, ata muntu mosi ve me monaka yo!” Kansi, Avery ke tuba nde Harvey Conrow ti nkento na yandi Anne mpi bana na bo zole ya babakala vandaka “dibuta mosi ya kiese ya mono me monaka ntete ve.” Harvey Conrow ke tuba nde: “Beto vandaka kukonda kima ve, mpi beto vandaka kudiwa na lutaninu na kisalu ya Yehowa mpi na nsi ya lusadisu na yandi ya zola.” Na nima, Harvey Conrow ti nkento na yandi Anne mpi bana na bo zole ya babakala kotaka na Nzo-nkanda ya Gileade mpi bo tindaka bo bamisionere na Pérou.

Dibuta ya mpangi Battaino vandaka bapasudi-nzila. Ntangu Giusto bakisaka nde nkento na yandi Vincenza bakaka divumu, bo kumisaka kamio na bo nzo yina vandaka “kumonana bonso otele mosi ya kitoko” kana beto fwanisa yo ti bantenta yina bo vandaka kuzinga ntete. Kumosi ti mwana na bo ya nkento, bo  landaka kusamuna na teritware yina bo zolaka mingi, na kulongaka bantu ya Italie yina vandaka kuzinga na États-Unis.

Bawi mingi sepelaka na nsangu ya mbote, kansi mbala mingi bansukami mpi bantu yina kondaka bisalu vandaka ve kupesa makabu ya mbongo sambu na mikanda yina ke tendulaka Biblia. Bo vandaka kupesa bima yonso yina bo vandaka ti yo. Bapasudi-nzila zole salaka lisiti ya bima 64 yina bantu yina sepelaka na nsangu pesaka bo bonso makabu. Bo sonikaka na zulu ya lisiti yina nde: “Bonso inventaire ya magazini mosi ya insi.”

Fred Anderson solulaka ti nsadi-bilanga mosi yina vandaka na mfunu ya mikanda kansi na kisika ya mbongo, yandi pesaka maneti yina mama na yandi vandaka kusadila na ntama. Na ferme yina landaka, bakala mosi vandaka na mfunu ya mikanda kansi yandi tubaka nde: “Mono kele ve ti maneti sambu na kutangila yo.” Kansi, ntangu yandi lwataka maneti yina mfinangani na yandi pesaka, yandi lendaka kutanga mikanda yina; yo yina na kiese yonso, yandi pesaka makabu sambu na mikanda mpi maneti.

Herbert Abbott vandaka ti nzo ya bansusu na kati ya kamio na yandi. Kana yandi me pesa bantu mikanda mpi bo me pesa bansusu tatu to iya bonso makabu, yandi vandaka kukwenda na zandu, kuteka yo mpi kusumba mazuti. Yandi sonikaka nde: “Ya kieleka, bantangu ya nkaka beto vandaka ve ti mbongo, kansi beto bikaka ve nde yo kanga beto nzila na kusamuna. Kana beto kele ti mazuti na kamio, beto vandaka kukwenda kusamuna na kumonisaka lukwikilu mpi kivuvu na Yehowa.”

Kutudila Yehowa ntima mpi lukanu ya ngolo sadisaka bampangi yai na bantangu yina ya mpasi. Kilumbu mosi mvula ya ngolo nokaka, mpi Emmy Maxwell ti nkento na yandi Lewis monaka mutindu bo zolaka kufwa kilumbu yina. Ntangu kaka bo basikaka na wago na bo, nti bwilaka yo mpi yo zenganaka na bandambu zole. Emmy ke tuba nde: “Bampasi yai yonso vutulaka beto ve nima na kisalu na beto, yo vandaka kaka mambu ya fioti-fioti, mpi dibanza ya kuyambula kisalu na beto kwisilaka beto ntete ve ata fioti. Kisalu vandaka ntete mingi mpi beto vandaka ti mpusa ya kusala yo.” Kukonda boma mpi ti lusadisu ya banduku ya zola, Emmy ti nkento na yandi Lewis tungaka nzo na bo ya bapine.

Na bantangu na beto ya me fuluka ti bampasi, bamilio ya Bambangi ya Yehowa ya kikesa ke monisa nkadilu yina ya kuditambika. Nkutu, bonso bapasudi-nzila yina ya ntete, beto kele ti lukanu ya kulanda kusamuna tii ntangu Yehowa ta tuba nde yo me lunga.

^ par. 3 Ke bingamaka bubu yai Kisalu na Beto ya Kimfumu.

^ par. 5 Na bantangu yina, bapasudi-nzila mingi vandaka ve ti bisalu ya kinsuni. Bo vandaka kubaka mikanda yina ke tendulaka Biblia na ntalu ya fioti mpi kusadila mwa mbongo yina vandaka kubikala na zulu na nima ya kutekila bantu, sambu na kuzingila.