Kwenda na mambu ke na kati

Kwenda na tansi ya malongi

Keti Nge Lenda Kudipesa Mingi Sambu na Kukebisa Bankaka?

Keti Nge Lenda Kudipesa Mingi Sambu na Kukebisa Bankaka?

Filme mosi ya kitoko ya kukonda ndinga (A Trip Down Market Street) vandaka kumonisa mutindu luzingu vandaka na mbanza San Francisco, na États-unis, na luyantiku ya mvu-nkama ya 20. Bantu ya ke salaka bafilme tulaka kamera na ntwala ya kamio mosi yina vandaka kutambula na kati ya mbanza mpi bo salaka yo nde yo tala na nzila ya nene kisika bantu vandaka mingi. Na kati ya bima yina filme vandaka kusongisa, beto lenda tanga bapusu-pusu yina bampunda ke benda, bakamio ya ntangu yina, basumbi mpi bana-babakala yina vandaka kusala kisalu na bo ya kuteka bazulunalu.

Ziku kima salaka nde bantu kuwa mawa mingi na filme yina, vandaka sambu bo salaka yo na Aprili 1906, ntangu fioti kaka na ntwala nde kunikana ya ntoto mpi tiya yina basikaka na Aprili 18 kufwa mafunda ya bantu mpi kitini ya mbanza yina. Yo monanaka nde, baluse ya kiese ya bantu ya nkaka yina vandaka na filme yina fwaka kilumbu yina. Scott Miles, mutekolo ya muntu mosi na kati ya bantu yina salaka filme yina tubaka nde: “Mono ke mona bantu pana, kansi bo ke zaba ve diambu yina ta kumina bo. Mpila ya kusadisa bo kele ve; nge ke wila bo kaka mawa.”

Na 1906, kunikana ya ntoto mpi tiya ya ngolo yina basikaka na kintulumukina bebisaka kitini ya nene ya mbanza San Francisco

Bubu yai, diambu ya mutindu mosi ke salama. Beto mpi kele ve ti makuki ya kusadisa bamfinangani na beto kansi beto ke wila bo mawa. Bo ke sala mambu na bo ya konso kilumbu kukonda kuzaba nde mpasi ya nene ke kwisa kukonda kusukinina​—lufwa ya ngidika yai ya bima mpi nsuka ya luzingu na bo. Kansi, na kuswaswana ti kunikana ya ntoto yina bantu zabaka ve na ntwala nde yo ta salama, beto kele ti mwa dibaku ya kukebisa bamfinangani na beto sambu na kilumbu ya lusambisu ya Yehowa. Ntembe kele ve nde, konso mposo nge ke bumbaka mwa ntangu sambu na kusamuna nzo na nzo, kansi keti nge lenda kudipesa mingi sambu na kukebisa bankaka?

YEZU VANDAKA NTANGU YONSO TI LUZOLO YA KUSAMUNA

Yezu kele mbandu ya mbote, sambu ntangu yonso yandi vandaka ya kuyilama sambu na kusamuna. Yandi vandaka kulonga muntu yonso yina yandi kutanaka ti yandi, yo vanda kalaki ya mpaku yina vandaka kuluta na nzila to nkento mosi yina yandi kutanaka ti yandi na dibulu ya masa na midi na ntangu ya kupema. (Luka 19:1-5; Yoa. 4:5-10, 21-24) Ata ntangu yandi kwendaka na kingenga sambu na kupema, Yezu ndimaka kuyambula yo sambu na kulonga bankaka. Yandi vandaka kuwila bamfinangani na yandi mawa, yo yina yandi vandaka kuta kimbangi mbote-mbote. (Mar. 6:30-34) Bubu yai, nki mutindu beto lenda landa nkadilu ya Yezu ya kusala mambu kukonda kusukinina?

BO SADILAKA MABAKU YONSO

Melika ke zingaka na suku mosi ya kele na etaze yina bantu ke kengilaka sambu na kutanina yo. Bantu mingi  yina ke zingaka kuna kele bana ya nzo-nkanda ya me katukaka na bansi ya nzenza mpi bo ke sadilaka batelefone yina kele ti banimero ya kinsweki. Diaka, bazina na bo kele ve na listi ya bantu ya etaze yina, ya bo me tulaka na kisika ya kuyamba bantu. Melika ke sadilaka dibaku yina ya sipesiali sambu na kuyantika masolo ya Biblia ti bantu ya etaze yina na kisika bo ke yambaka bantu mpi na kimatinu. Yandi ke tuba nde: “Na mutindu mosi buna, mono ke monaka nde yo kele teritware na mono.” Melika ke nataka mikanda ya bandinga ya kuswaswana mpi bantu mingi ke ndimaka kubaka batrakiti mpi bazulunalu. Yandi ke siamisaka bo na kutala na site na beto, jw.org. Yo me sadisaka yandi na kuyantika kulonguka Biblia ti bantu mingi.

Sonia mpi ke vandaka ya kuyilama sambu na kuta kimbangi na muntu yonso yina yandi ke kutana ti yandi. Yandi ke salaka na lupitalu mosi mpi me bakaka lukanu ya kuta kimbangi mbote-mbote na banduku na yandi yonso ya kisalu. Na luyantiku, yandi bakaka ntangu ya kuzaba bampusa mpi mambu yina ke sepedisaka konso muntu. Na nima, yandi ke solulaka na muntu mosi mosi masolo ya Biblia na ntangu na yandi ya kupema. Na mutindu yina, Sonia yantikaka kulonguka Biblia ti bantu zole. Yandi me baka mpi lukanu nde yandi ta sadilaka mwa ntangu na yandi ya kupema sambu na kusolula ti bantu na kisika bo ke vingilaka sambu na kukutana ti munganga.

SADILA MABAKU YONSO YA NGE KE KUTANA TI YO

Muntu mosi yina gulukaka na kunikana ya ntoto yina salamaka na 1906 bingaka yo “kisumbula ya kuluta nene yina me kuminaka ntete ve insi to mbanza mosi.” Kansi, kubika fioti bisumbula yonso ya me salamaka ta monana ya fioti kibeni na ntwala ya kilumbu ya nene yina Nzambi ta vutula mbela na “bantu yina me zaba [yandi] ve.” (2 Bate. 1:8) Yehowa ke zola nde bantu kusoba mabanza ti ntima na bo mpi kundima nsangu ya lukebisu yina Bambangi na yandi ke longa.​—2 Pie. 3:9; Kus. 14:6, 7.

Keti nge lenda sadila mabaku yonso sambu na kuta kimbangi na bantu mingi ntangu nge ke sala mambu na nge ya konso kilumbu?

Nge kele ti dibaku ya kukangula meso ya bantu na ntangu yai ya mpasi mpi kusadisa bo na kuyambula kusosa bampusa na bo ya bwimi kansi na kusosa Yehowa. (Sof. 2:2, 3) Keti nge lenda sadila mabaku yonso sambu na kuta kimbangi na banduku na nge ya kisalu, bamfinangani, to bantu yina nge ke kutana ti bo ntangu nge ke sala mambu na nge ya konso kilumbu? Keti nge ta kudipesa mingi sambu na kukebisa bankaka?