Kwenda na mambu ke na kati

Kwenda na tansi ya malongi

Beno Tadila Mutindu ya Bantu Yina Beno Fwete Vanda

Beno Tadila Mutindu ya Bantu Yina Beno Fwete Vanda

“Beno tadila mutindu ya bantu yina beno fwete vanda. Beno fwete vanda bantu ya bikalulu ya santu mpi kusala bisalu ya ke monisa kukangama na Nzambi.”​—2 PIE. 3:11.

1, 2. ‘Beto fwete vanda bantu ya inki mutindu’ sambu na kundimama na Nzambi?

BANTU mingi ke kudiyangisaka na mambu yina bankaka ke yindulaka sambu na bo. Kansi sambu beto kele Bakristu, keti yo ke lomba ve nde beto kudiyangisa mingi na mambu yina Yehowa lenda yindula sambu na beto? Nkutu, yandi kele Muntu ya kuluta nene na luyalanganu ya mvimba mpi “nto ya moyo.”—Nk. 36:10.

2 Sambu na kumonisa ‘mutindu ya bantu yina beto fwete vanda’ na kutadila mabanza ya Yehowa, ntumwa Piere longisilaka beto na kuvanda “bantu ya bikalulu ya santu mpi kusala bisalu ya ke monisa kukangama na Nzambi.” (Tanga 2 Piere 3:11.) Sambu na kundimama na Nzambi, “bikalulu” na beto fwete vanda ya santu, disongidila ya bunkete​—na bangogo, na mabanza, mpi na kimpeve. Diaka, beto fwete sala “bisalu ya ke monisa kukangama na Nzambi,” ti luzitu sambu na Nzambi mpi kuvanda ya kwikama na yandi. Yo yina, kusosa kundimama na Nzambi ke tadila kaka ve bikalulu na beto kansi mpi kimuntu na beto ya kati. Sambu Yehowa ‘ke fimpaka ntima,’ yandi ke zabaka kana bikalulu na beto kele ya santu mpi kana beto me kudipesaka ya mvimba na yandi to ve.​—1 Bans. 29:17.

3. Na yina me tala bangwisana na beto ti Nzambi, inki bangiufula beto fwete kudiyula?

3 Satana Diabulu ke zolaka ve nde beto sosa kundimama na Nzambi. Nkutu, yandi ke salaka yonso sambu na kupusa beto na kubebisa bangwisana na beto ti Yehowa. Ntangu yonso, Satana ke sadilaka luvunu sambu na kukusa beto mpi kukabula beto ti Nzambi yina beto ke sambilaka. (Yoa. 8:44; 2 Bak. 11:13-15) Yo yina, beto fwete kudiyula nde: ‘Inki mutindu Satana ke kusaka bantu? Inki mono lenda sala sambu na kutanina bangwisana na mono ti Yehowa?’

 INKI MUTINDU SATANA KE KUSAKA BANTU?

4. Sambu na kubebisa bangwisana na beto ti Nzambi, Satana ke nwanisa inki, mpi sambu na nki?

4 Longoki Yakobo sonikaka nde: “Konso muntu ke mekamaka kana yandi ke bika nde nzala na yandi mosi kubenda yandi mpi kupukumuna yandi. Ebuna nzala, ntangu yo ke baka divumu, yo ke butaka disumu; mpi disumu, ntangu yo me salama, yo ke butaka lufwa.” (Yak. 1:14, 15) Sambu na kubebisa bangwisana na beto ti Nzambi, Satana ke sosaka kunwanisa ntima na beto, kisika yina bampusa na beto ke katukaka.

5, 6. (a) Na nki mitindu Satana ke sosaka kubebisa ntima na beto? (b) Inki mitambu Satana ke sadilaka sambu na kubebisa banzala ya ntima na beto, mpi inki ke monisa nde yandi me zaba kusadila yo?

5 Na nki mutindu Satana ke sosaka kubebisa ntima na beto? Biblia ke tuba nde: “Nsi-ntoto ya mvimba kele na nsi ya kiyeka ya muntu ya mbi.” (1 Yoa. 5:19) Na kati ya batolotolo yina Satana ke sadilaka, beto lenda tanga “bima yina kele na nsi-ntoto.” (Tanga 1 Yoane 2:15, 16.) Na nsungi ya mafunda ya bamvula, Diabulu me sadilaka nsi-ntoto yai sambu na kukusa bantu. Sambu beto ke zinga na nsi-ntoto yai, beto fwete keba na mitambu na yandi ya kubumbana.​—Yoa. 17:15.

6 Satana ke sadilaka mitambu sambu na kubebisa bampusa ya ntima na beto. Ntumwa Yoane tangaka mitambu tatu yina Satana ke sadilaka: (1) “nzala ya nitu,” (2) “nzala ya meso,” mpi (3) “kusonga na lulendo yonso bima ya kuzingila.” Satana sadilaka mitambu yai sambu na kupukumuna Yezu na ntoto ya zelo na zelo. Sambu Satana me sadilaka mitambu yina tuka bamvula mingi, yandi me zaba kusadila yo mbote-mbote bubu yai, mpi yandi ke zabaka inki mutambu yandi fwete sadila sambu na konso muntu. Na ntwala ya kutadila mutindu beto lenda kuditanina na diambu yai, bika beto tadila ntete mutindu Diabulu nungaka na kupukumuna Eva kansi yandi nungaka ve na kupukumuna Mwana ya Nzambi.

“NZALA YA NITU”

“Nzala ya nitu” kele mutambu yina bwisaka Eva (Tala paragrafe 7)

7. Inki mutindu Satana sadilaka “nzala ya nitu” sambu na kupukumuna Eva?

7 Sambu na kuvanda nitu ngolo, bantu ke vandaka na mpusa mosi ya mfunu ya bo fwete lungisa​—mpusa ya madia. Ngangi salaka ntoto sambu yo basisa madia mingi kibeni. Satana lenda meka kusadila mpusa yina beto ke butukaka ti yo ya madia, sambu na kupusa beto na kuyambula kusala luzolo ya Nzambi. Beto tadila mutindu yandi salaka yo na Eva. (Tanga Kuyantika 3:1-6.) Satana zabisaka Eva nde, yandi ta fwa ve kana yandi dia mbuma ya ‘nti ya kuzaba mambu ya mbote ti ya mbi,’ mpi yandi tubaka nde kilumbu yina Eva ta dia yo, yandi ta kuma bonso Nzambi. (Kuy. 2:9) Na mutindu yina, Diabulu monisaka nde Eva vandaka ve na mfunu ya kulemfukila Nzambi sambu na kulanda kuzinga. Yo vandaka luvunu mpenza! Sambu Satana kotisaka ngindu yina na mabanza ya Eva, yo lombaka nde yandi sala nsola: Yandi lendaka kubuya ngindu yina, to yandi lendaka kulanda kuyindula yo, mpi kubika nde mpusa na yandi sambu na mbuma yina kuyela.  Ata Eva lendaka kudia bambuma ya banti yonso ya nkaka ya kuvandaka na kilanga, yandi ponaka na kulanda kuyindula diambu yina Satana songaka yandi sambu na nti yina vandaka na kati-kati ya kilanga, mpi yandi ‘bakaka mbuma na yo mpi diaka yo.’ Na mutindu yina, Satana kunaka na ntima ya Eva nzala ya kima mosi yina Ngangi na yandi buyisaka.

Yezu bikaka ve nde ata kima mosi kukatula dikebi na yandi (Tala paragrafe 8)

8. Inki mutindu Satana sadilaka “nzala ya nitu,” sambu na kupukumuna Yezu mpi sambu na nki yandi nungaka ve?

8 Satana sadilaka mpi mutambu yina sambu na kupukumuna Yezu na ntoto ya zelo na zelo. Sambu Yezu buyaka madia bilumbu 40 mpi bampimpa 40, Satana mekaka kusadila nzala ya madia sambu na kupukumuna Yezu. Satana tubaka nde: “Kana nge kele mwana ya Nzambi, tuba na ditadi yai yo kuma dimpa.” (Luka 4:1-3) Yezu vandaka ti bansola zole: Yandi lendaka kupona na kubuya kusadila ngolo na yandi ya kusala bimangu sambu na kulungisa mpusa ya madia, to kupona na kusadila yo. Yezu zabaka nde yandi fwete sadila ve ngolo na yandi sambu na balukanu ya bwimi. Ata yandi vandaka na nzala, yandi sosaka kutanina bangwisana na yandi ti Yehowa na kisika ya kusosa kumanisa nzala na yandi. Yezu vutudilaka yandi nde: “Bo me sonikaka nde: ‘Muntu fwete zinga na mampa mpamba ve, kansi na mambu yonso ya ke basikaka na munoko ya Yehowa.’”​—Mat. 4:4; Luka 4:4.

“NZALA YA MESO”

9. Bangogo “nzala ya meso” ke monisa nki, mpi inki mutindu Satana sadilaka nzala yai sambu na kupukumuna Eva?

9 Yoane tubilaka mpi mutambu ya “nzala ya meso.” Bangogo yina ke monisa nde muntu lenda kuma ti mpusa ya kima mosi kaka na nima ya kutala yo. Satana sadilaka nzala yai sambu na kupukumuna Eva, mpi yandi tubaka nde: “Meso na beno ta kanguka.” Sambu Eva talaka mingi mbuma yina bo buyisaka bo, yandi kumaka kusepela na yo. Eva monaka nde nti yina ‘vandaka kima mosi ya kitoko sambu na meso.’

10. Inki mutindu Satana sadilaka “nzala ya meso” sambu na kupukumuna Yezu, mpi inki mvutu Yezu pesaka?

10 Inki mutindu Satana sadilaka mutambu yina na Yezu? Satana “songaka [Yezu] bimfumu yonso ya ntoto ya mvimba na ntangu fioti kibeni. Na nima Diabulu tubilaka yandi nde: ‘Mono ta pesa nge kiyeka yai yonso mpi nkembo na yo.’” (Luka 4:5, 6) Yezu lendaka ve kumona na meso ya kinsuni bimfumu yina yonso na ntangu fioti, kansi yandi monaka nkembo na yo na mbonameso. Ntembe kele ve nde, Satana yindulaka nde nkembo ya bimfumu yina lendaka kubenda dikebi ya Yezu. Kukonda nsoni, Satana songaka yandi nde: “Kana nge sambila mono, yo yonso ta vanda ya nge.” (Luka 4:7) Yezu zolaka ve ata fioti na kuvanda mutindu ya muntu yina Satana zolaka nde yandi vanda. Yandi pesaka mvutu kukonda kusukinina. Yandi tubaka nde: “Bo me sonikaka nde: ‘Nge fwete sambila Yehowa Nzambi na nge, mpi yandi mpamba nge fwete sadila kisalu ya santu.’”​—Luka 4:8.

 “KUSONGA NA LULENDO YONSO BIMA YA KUZINGILA”

11. Inki mutindu Satana kusaka Eva?

11 Na kati ya bima yina kele na nsi-ntoto, Yoane tangaka “kusonga na lulendo yonso bima ya kuzingila.” Ya kieleka, ntangu Adami ti Eva vandaka kaka bo zole na ntoto, bo lendaka ve ‘kusonga na lulendo yonso bima na bo ya kuzingila’ na bantu ya nkaka. Kansi, bo monisaka lulendo. Ntangu Satana pukumunaka Eva, yandi monisaka Eva nde Nzambi bumbilaka yandi kima mosi ya kitoko. Diabulu tubilaka Eva nde kilumbu yandi ta dia mbuma ya ‘nti ya kuzaba mambu ya mbote ti ya mbi,’ yandi ‘ta kuma bonso Nzambi, yandi ta zaba mambu ya mbote ti ya mbi.’ (Kuy. 2:17; 3:5) Mpidina, Satana monisaka nde Eva lendaka kuditwadisa yandi mosi kukonda Yehowa. Yo ke monana nde, lulendo pusaka Eva na kundima luvunu yina. Yandi diaka mbuma yina Nzambi buyisaka bo, mpi kwikilaka nde yandi ta fwa ve ata fioti. Yandi kudikusaka mpenza!

12. Inki kele mutindu mosi yina Satana mekaka kupukumuna Yezu, mpi inki mvutu Yezu pesaka?

12 Na kuswaswana ti Eva, Yezu bikaka mbandu ya mbote ya kudikulumusa! Satana mekaka kupukumuna yandi na mutindu yankaka, kansi Yezu buyaka ata nkutu dibanza ya kusala diambu yina zolaka kuyitukisa bantu mpi kumeka Nzambi. Kusala mpidina zolaka kumonisa kibeni lulendo! Kansi Yezu pesaka yandi mvutu ya pwelele mpi na mbala mosi nde: “Yo me tubamaka nde: ‘Nge fwete meka ve Yehowa Nzambi na nge.’”​—Tanga Luka 4:9-12.

INKI MUTINDU BETO LENDA TANINA BANGWISANA NA BETO TI YEHOWA?

13, 14. Tendula mutindu Satana ke kusaka beto bubu yai.

13 Bubu yai, Satana ke sadilaka mpi mitambu yina yandi sadilaka sambu na kupukumuna Eva mpi Yezu. Na nsadisa ya “nzala ya nitu,” Diabulu ke sadilaka nsi-ntoto na yandi sambu na kupusa bantu na kudipesa na mansoni mpi kulutisa ndilu na kudia ti kunwa malafu. Yandi ke sadilaka “nzala ya meso,” sambu na kupukumuna bantu yina me konda dikebi na kutala pornografi, mingi-mingi na Internet. Diaka, yandi ke sadilaka mpusa ya “kusonga na lulendo yonso bima ya kuzingila” sambu na kupusa bantu na kukuma lulendo, kusosa lukumu, kiyeka mpi kuyedisa mpusa ya kuvanda ti bima mingi ya kinsuni!

Inki minsiku ya Masonuku fwete kwisila nge na mabanza na mabaku yai? (Tala baparagrafe 13, 14)

14 “Bima yina kele na nsi-ntoto” me fwanana ti pambu ya mulobi-mbisi. Yo ke bendaka mbisi, kansi yo ke vandaka ti ndobo na kati. Satana ke sadilaka mambu yina ke monanaka ya mbote mpi ya bantu fwete lungisa konso kilumbu, sambu na kupusa bo na kusala mambu yina ke wakana ve ti bansiku ya Nzambi.  Kansi, yandi ke sadilaka mitambu yina ya kubumbana sambu na kuyala banzala na beto mpi kubebisa ntima na beto. Yandi ke zolaka beto kwikila nde, kulungisa bampusa na beto mosi mpi kuvanda ti luzingu ya mbote kele mfunu mingi kuluta kusala luzolo ya Nzambi. Keti beto ta bwa na mitambu yina?

15. Inki mutindu beto lenda landa mbandu ya Yezu na mutindu yandi telaminaka bampukumuna ya Satana?

15 Eva bwaka na mitambu ya Satana, kansi Yezu telaminaka yo. Konso ntangu, Yezu vandaka kupesa mvutu ya me simbama na Masonuku, na kutubaka nde: “Bo me sonikaka nde” to “Yo me tubamaka nde.” Kana beto kele balongoki ya kikesa ya Biblia, beto ta zaba mbote Masonuku mpi ta vanda ti makuki ya kuyibuka baverse yina lenda sadisa beto na ntwala ya mpukumuna. (Nk. 1:1, 2) Kuyibuka bambandu yina Biblia ke tubila ya bantu ya kwikama yina kangamaka na Nzambi, ta sadisa beto na kulanda mbandu na bo. (Bar. 15:4) Kutina Yehowa boma na masonga, kuzola mambu yina yandi ke zolaka mpi kumenga mambu yina yandi ke mengaka, ta tanina beto.​—Nk. 97:10.

16, 17. Inki mutindu ‘makuki ya kuyindula’ lenda vanda ti bupusi na mutindu ya bantu yina beto kele?

16 Ntumwa Polo ke siamisa beto na kusadila ‘makuki na beto ya kuyindula’ sambu na kukuma mutindu ya bantu yina ke bikaka nde mabanza ya Nzambi kuwumba bo, kansi ve ya nsi-ntoto. (Bar. 12:1, 2) Sambu na kumonisa mfunu ya kutanina mabanza na beto, Polo tubaka nde: “Beto ke bwisaka bangindu mpi konso kima ya kuzanguka yina ke telaminaka nzayilu ya Nzambi; mpi beto ke nataka konso dibanza na kimpika sambu na kunata yo na kulemfukila Kristu.” (2 Bak. 10:5) Mabanza na beto ke vandaka na bupusi ya ngolo na mutindu ya bantu yina beto kele, yo yina beto fwete “landa na kuyindula” mambu yina ke tungaka.​—Bafi. 4:8.

17 Kana beto ke zola kuvanda ya santu, beto fwete buya kukotisa bangindu mpi banzala ya mbi na ntima na beto. Beto fwete zola Yehowa ti “ntima ya bunkete.” (1 Tim. 1:5) Kansi ntima kele luvunu, mpi bantangu ya nkaka beto lenda zaba ve mutindu “bima yina kele na nsi-ntoto” ke vandaka ti bupusi na zulu na beto. (Yer. 17:9) Yo yina, beto fwete ‘landa na kudimeka sambu na kuzaba kana beto kele na lukwikilu, mpi kulanda na kuditala kana beto kele nki mutindu,’ ntangu beto ke kudifimpa na masonga yonso na nsadisa ya mambu yina beto ke longuka na Biblia.​—2 Bak. 13:5.

18, 19. Sambu na nki beto fwete baka lukanu ya kuvanda mutindu ya bantu yina Yehowa ke zolaka nde beto vanda?

18 Beto lenda telamina “bima yina kele na nsi-ntoto” kana beto ke yibuka ntangu yonso bangogo yai ya kupemama ya Yoane: “Nsi-ntoto ke luta, nzala na yo mpi ke luta, kansi muntu yina ke salaka luzolo ya Nzambi ke bikalaka kimakulu.” (1 Yoa. 2:17) Ngidika ya Satana ke monana bonso nde yo ta zinga kimakulu. Kansi, kilumbu kele yo ta kuma na nsuka. Bima yina nsi-ntoto ya Satana ke pesaka ta zinga ve kimakulu. Kuyibuka diambu yina ta sadisa beto na kubwa ve na mitambu ya Diabulu.

19 Ntumwa Piere ke siamisa beto na kuvanda mutindu ya bantu yina Nzambi ke ndimaka, ntangu beto “ke vingila mpi ke yibuka ntangu yonso kukala ya kilumbu ya Yehowa, na ntangu yina zulu ta fwa na tiya, mpi tiya ya ngolo ta kumisa bima na yo bonso masa!” (2 Pie. 3:12) Kubika fioti ntangu yai, kilumbu yina ta kwisa, mpi Yehowa ta fwa bitini yonso ya nsi-ntoto ya Satana. Na ntwala nde beto kuma kilumbu yango, Satana ta landa kusadila “bima yina kele na nsi-ntoto” sambu na kupukumuna beto, mutindu yandi pukumunaka Eva mpi Yezu. Beto fwete vanda ve bonso Eva mpi kusosa kulungisa banzala na beto mosi. Kusala mpidina ta monisa nde, beto ke ndima nde Satana kele nzambi na beto. Kansi, beto fwete vanda bonso Yezu mpi kutelamina mitambu yina, ata yo ke monana kitoko mpi ke benda dikebi na beto. Bika nde konso muntu na kati na beto kubaka lukanu ya kuvanda mutindu ya bantu yina Yehowa ke zolaka nde beto vanda.