Kwenda na mambu ke na kati

Kwenda na tansi ya malongi

Mutindu ya Kusadila Mbongo Mbote

Mutindu ya Kusadila Mbongo Mbote

Bantu mingi ke sadilaka minsiku ya Biblia sambu na kusadila mbongo na bo mbote.

VANDA TI MANAKA YA MBOTE

MUNSIKU YA BIBLIA: “Balukanu ya muntu yina ke salaka ngolo ke nataka kibeni na kununga, kansi bantu yonso yina ke salaka mambu ntinu-ntinu ta suka kibeni na kinsukami.”—Bingana 21:5.

MAMBU YINA YO KE TENDULA: Nge fwete vanda ti manaka mpi kulanda yo sambu na kusadila mbongo mbote. Yo yina, yidika manaka na nge na ntwala ya kusadila mbongo. Kuvila ve nde, nge lenda sumba ve bima yonso yina nge ke zolaka. Yo yina, sadila mbongo mbote.

MAMBU YA NGE LENDA SALA:

  • Sadila kaka mbongo ya nge yidikaka. Sonika bima ya nge ke zola kusumba mpi kabisa yo na ndonga. Na nima, tadila ntalu ya mbongo yina nge ta basisa sambu na kusumba konso kima yina. Kana nge basisa mbongo mingi kuluta yina nge yidikaka sambu na kusumba kima mosi, katula mbongo ya nge yidikaka sambu na kima ya nkaka mpi fika dibulu yina. Mu mbandu, kana nge me basisa mbongo kuluta yina nge yidikaka sambu na kusumba esanse to mazute ya kaminio, katula mbongo yina nge yidikaka sambu na kusala kima yina kele mfunu mingi ve, mu mbandu, kunwa jus.

  • Kubaka ve mfuka ya kukonda mfunu. Kana mpila kele, kubaka ve mfuka. Kansi, bumba mbongo sambu na kusumba bima yina nge kele na yo mfunu. Kana nge ke zola kudefa mbongo, futa ntete nswalu mfuka ya nge kele ti yo kana ve nge ta kuma ti bamfuka mingi. Kana nge kele ti mfuka, baka bangidika sambu na kufuta mfuka yango mpi futa yo.

    Kana muntu ke defa-defa mbongo, ziku yandi ta basisaka mbongo mingi. Yo yina, kana nge ke zola kudefa mbongo, yindula ntete mbote-mbote.

KEBA NA BIKALULU YA MBI

MUNSIKU YA BIBLIA: “Molo ke bundulaka ve ntoto na nsungi ya madidi, yo yina yandi ta lombaka bima na nsungi ya kukatula bima na bilanga ntangu yandi ta vanda na kima ve.”—Bingana 20:4.

 MAMBU YINA YO KE TENDULA: Kana muntu kele molo, yandi lenda kuma nsukami. Yo yina, salaka kisalu mbote mpi sala ngolo sambu na kusadila mbongo na nge mbote sambu nge sumba bima yina nge ta vanda ti yo mfunu na bilumbu ke kwisa.

MAMBU YA NGE LENDA SALA:

  • Salaka ngolo. Kana nge ke salaka ngolo mpi nge kele muntu yina bo lenda tudila ntima, bamfumu ya kisalu ta zola nge mpi bo ta katula nge ve na kisalu.

  • Vanda masonga. Kuyiba ve mfumu na nge ya kisalu. Kana nge kele ve masonga, nge ta bebisa lukumu na nge mpi yo ta vanda mpasi sambu bantu ya nkaka kubaka nge diaka na kisalu.

  • Kuvanda ve lukasi. Kana nge ke sosa ntangu yonso kuvanda ti mbongo mingi, nsuka-nsuka sante na nge mpi kinduku na nge ti bantu ya nkaka ta beba. Kuvila ve nde, luzingu kele mfunu kuluta mbongo.

MINSIKU YA NKAKA YA BIBLIA

Tanga Biblia na Internet, yo kele na bandinga mingi kibeni na jw.org

KUBEBISA VE NTANGU MPI BIMA NA NGE SAMBU NA BIKALULU YA MBI.

“Sambu muntu yina ke lawukaka malafu mpi muntu yina ke diaka mbiki ta kuma bansukami, mpi mpongi ta sala nde muntu kulwata bilele ya kupasuka.”—BINGANA 23:21.

KUDIYANGISA VE MINGI SAMBU NA MBONGO.

“Beno bika kudiyangisa sambu na luzingu na beno nde beno ta dia inki to beno ta nwa inki, to sambu na nitu na beno nde beno ta lwata inki.”—MATAYO 6:25.

KULULA VE BIMA YA BANTU YA NKAKA.

“Muntu ya ke lulaka ke vandaka na nzala ya ngolo ya kimvwama, kansi yandi ke zabaka ve nde kinsukami ta bwila yandi.”—BINGANA 28:22.