Kwenda na mambu ke na kati

Kwenda na tansi ya malongi

Kutuba ti luzitu kele kima ya ke vukisaka yina lenda sala nde makwela na beno kuvanda ngolo

 SAMBU NA BANKWELANI

3: Luzitu

3: Luzitu

MAMBU YINA YO KE TENDULA

Bankwelani yina ke zitisaka bankwelani na bo ke zolanaka mingi ata ntangu bo ke wakana ve na diambu mosi. Mukanda mosi (Ten Lessons to Transform Your Marriage) ke tuba nde: “Bankwelani ya mutindu yai ke buyaka ve kusoba bangindu na bo. Kansi, bo ke landaka kutubila mambu ya bo lenda sala sambu na kumanisa mavwanga yina. Bo ke widikilaka bangindu ya bankwelani na bo na luzitu yonso mpi ke yidikaka mambu na mutindu mosi ya mbote.”

MUNSIKU YA BIBLIA: “Zola . . . ke sosaka ve mambote na yo mosi.”—1 Bakorinto 13:4, 5.

“Sambu na kumonisa nde mono ke zitisa nkento na mono, mono fwete mona nde yandi kele mfunu mingi mpi mono fwete sala ve konso kima yina lenda pesa yandi mpasi to kubebisa makwela na beto.”—Micah.

SAMBU NA NKI YO KELE MFUNU

Kana nkwelani mosi ke zitisa ve nkwelani ya nkaka, bo lenda kuma kufingana, kuvwezana, mpi nkutu kumengana; bantu ya ke salaka bansosa ke tubaka nde bikalulu yai ke vandaka bidimbu ya ntete ya ke monisaka kufwa ya makwela.

“Kutuba mambu ti kuvweza, kukonda luzitu, to kusakana ti nkento na nge ta sala nde yandi kudimona kukonda mfunu, yandi tudila nge ve ntima, mpi yo ta bebisa makwela na beno.”—Brian.

MAMBU YA NGE LENDA SALA

KUDITADILA

Tula dikebi na masolo mpi mambu ya beno ta sala na mposo mosi. Na nima, kudiyula nde:

  • ‘Mbala ikwa mono vwezaka nkwelani na mono, mpi mbala ikwa mono sikisaka yandi?’

  • ‘Na nki mitindu mono zitisaka nkwelani na mono?’

SOLULA TI NKWELANI NA NGE

  • Kutuba mpi kusala mambu ya nki mutindu ta sala nde konso nkwelani kumona nde nkwelani ya nkaka ke zitisaka yandi?

  • Kutuba mpi kusala mambu ya nki mutindu ta sala nde konso nkwelani kumona nde nkwelani ya nkaka ke zitisaka yandi ve?

BANDONGISILA

  • Sonika mitindu tatu yina nge ta zola nde nkwelani na nge kuzitisa nge. Siamisa nkwelani na nge na kusala mutindu mosi. Songa nkwelani na nge mambu yina nge me sonika mpi lomba yandi na kusonga nge mambu yina yandi me sonika, mpi beno sala bikesa ya kumonisa luzitu na mambu yina beto me tubila.

  • Sonika bikalulu ya nkwelani na nge yina nge ke sepelaka na yo. Na nima, songa yandi mutindu nge ke sepelaka kibeni ti bikalulu yango.

“Sambu na kumonisa nde mono ke zitisa bakala na mono, mono fwete sala mambu yina ke monisa nde yandi kele mfunu mingi mpi nde mono ke zolaka nde yandi vanda na kiese. Mbala mingi yo ke vandaka kaka mambu ya fioti yina mono ke tubaka to ke salaka yina ke monisaka nde mono ke zitisaka yandi.”—Megan.

Na nsuka, kima ya mfunu ke vandaka ve kumona kana nge kele luzitu to ve; kansi nkwelani na nge muntu fwete bakisa kana nge ke zitisaka yandi.

MUNSIKU YA BIBLIA: “Beno lwata mawa ya ngolo, ntima ya mbote, kudikulumusa, mawete, mpi ntima ya nda.”—Bakolosai 3:12.