Kwenda na mambu ke na kati

Kwenda na tansi ya malongi

Kulolula lenda manisa mavwanga yina kele bonso tiya

 SAMBU NA BANKWELANI

4: Kulolula

4: Kulolula

MAMBU YINA YO KE TENDULA

Kulolula kele kuyindula ve mambu ya mbi yina bo sadilaka nge mpi kuyambula makasi yina yo lenda pesa nge. Kulolula ke tendula ve nde nge me mona mpamba mambu ya mbi yina bo sadilaka nge to kusala bonso nde yo salamaka ve ata fioti.

MUNSIKU YA BIBLIA: “Beno landa kukanga-ntima na mambu ya bantu ya nkaka mpi beno landa kulolulana na ntima ya mvimba ata muntu mosi kele na makambu ti muntu ya nkaka.”—Bakolosai 3:13.

“Kana nge ke zola muntu, nge ke tulaka ve dikebi na bifu na yandi, kansi nge ke monaka mutindu yandi ke sosa kukuma.”—Aaron.

SAMBU NA NKI YO KELE MFUNU

Kukangila muntu makasi lenda natila nge bampasi na nitu mpi na mabanza mpi yo lenda bebisa makwela na beno.

“Kilumbu mosi bakala na mono lombaka ndolula sambu na diambu mosi yina pesaka mono mpasi mingi. Yo vandaka mpasi sambu na kulolula yandi. Nsuka-nsuka mono lolulaka yandi, kansi mono ke kudiyangisaka sambu mono salaka yo ve nswalu. Yo basisaka mavwanga ya kukonda mfunu na makwela na beto.”—Julia.

MAMBU YA NGE LENDA SALA

KUDITADILA

Na mbala ya nima yina nkwelani na nge ta sala to ta tuba kima mosi yina ta pesa nge mpasi, kudiyula nde:

  • ‘Keti mono ke waka makasi nswalu?’

  • ‘Keti mbi yina nkwelani na mono salaka kele kibeni nene yina ta lomba nde yandi lomba mono ndolula to keti mono lenda vila yo kaka?’

SOLULA TI NKWELANI NA NGE

  • Mbala mingi bantangu ikwa ke lutaka sambu na kulolula nkwelani na nge?

  • Inki beto lenda sala sambu na kulolula bankwelani na beto nswalu kibeni?

BANDONGISILA

  • Kana kele ti kima mosi ya me pesa nge mpasi, kutuba ve nde nkwelani na nge me sala yo na nku yonso.

  • Sosa kulolula nkwelani na nge mpi kuvila ve nde “beto yonso ke bulaka sakuba mbala mingi.”—Yakobo 3:2.

“Yo ke vandaka mpasi ve na kulolula kana beno zole kele na foti, kansi yo ke vandaka mpasi mingi kana muntu mosi mpamba me sala mbi. Kundima ndolula mpi kulolula ke lombaka kibeni kudikulumusa.”—Kimberly.

MUNSIKU YA BIBLIA: “Yidika nswalu makambu.”—Matayo 5:25.

Kana nge me bumba makasi, nge lenda kudipesa mpasi na nitu mpi na mawi—nge lenda bebisa mpi makwela na nge