Kwenda na mambu ke na kati

Kwenda na tansi ya malongi

Lusilu ya kukangama na makwela kele bonso longo (ancre) yina ke salaka nde makwela kuvanda ngolo na bantangu ya mpasi

 SAMBU NA BANKWELANI

1: Kukangama na Makwela

1: Kukangama na Makwela

MAMBU YINA YO KE TENDULA

Babakala ti bankento yina ke kangamaka na makwela na bo ke tadilaka yo bonso kima mosi ya fwete zinga mingi, mpi yo ke salaka nde bo kudiwa na lutaninu. Konso nkwelani ke tulaka ntima nde nkwelani ya nkaka ta kangama na makwela ata bo ke kutana ti bampasi.

Bankwelani ya nkaka ke landaka kukangama na makwela sambu banduku to bantu ya dibuta ke zolaka ve nde bo fwa makwela. Kansi, kima ya fwete pusa bankwelani na kukangama na makwela kele lusilu ya me simbama na zola mpi na luzitu yina bo fwete monisilana.

MUNSIKU YA BIBLIA: “Bakala fwete bikisa ve nkento na yandi.”1 Bakorinto 7:11.

“Kana nge ke kangama na makwela na nge, nge ta waka ve makasi nswalu. Nge ta lolulaka mpi ta lombaka ndolula nswalu. Nge ta tadilaka mavwanga bonso bampasi, kansi ve bonso mambu yina lenda fwa makwela.”—Micah.

SAMBU NA NKI YO KELE MFUNU

Ntangu bo ke kutana ti bampasi, bankwelani yina ke kangamaka ve na makwela ke tubaka mbala mingi nde, ‘Yo fwanaka ve nde beto kwelana’ mpi bo ke sosaka mitindu ya kufwa makwela.

“Bantu mingi yina ke kwelaka ke vandaka ti ngindu ya kufwa makwela kana mavwanga me basika. Ntangu bantu ke kwelanaka dezia ti ngindu ya kufwa makwela, bo ke kangamaka ve na makwela na bo banda na luyantiku.”—Jean.

MAMBU YA NGE LENDA SALA

KUDITADILA

Ntangu beno ke swana . . .

  • Keti nge ke kudiyangisaka na mpila nge me kwelanaka ti bakala to nkento yina?

  • Keti nge ke yindulaka na kukwelana ti muntu ya nkaka?

  • Keti nge ke tubaka mambu ya mutindu yai, “Mono ta yambula nge” to “Mono ta sosa muntu ya nkaka yina ke sepelaka ti mono”?

Kana nge me tuba nde ee na ngiufula mosi to na bangiufula mingi, yai kele ntangu ya kukumisa ngolo lusilu na nge ya kukangama na makwela na nge.

SOLULA TI NKWELANI NA NGE

  • Keti lusilu na nge ya kukangama na makwela me lembaka? Kana ee, sambu na nki?

  • Inki mambu beto lenda sala ntangu yai sambu na kukumisa ngolo lusilu na beto ya kukangama na makwela na beto?

BANDONGISILA

  • Sonikila nkwelani na nge mukanda mosi ya zola na dibaku mosi buna

  • Tula bafoto ya nkwelani na nge na mesa na nge ya kisalu sambu na kumonisa nde nge ke kangamaka na makwela na nge

  • Bingaka nkwelani na nge konso kilumbu ntangu nge kele na kisalu to ntangu nge kele ve ti yandi

MUNSIKU YA BIBLIA: “Muntu kukabula ve yina ya Nzambi me vukisaka.”—Matayo 19:6.