Kwenda na mambu ke na kati

Kwenda na tansi ya malongi

Kimuntu ya ngolo lenda sadisa nge na kunwana ti mipepe ya ngolo

 SAMBU NA BALEKE

9: Kimuntu

9: Kimuntu

MAMBU YINA YO KE TENDULA

Kimuntu na nge ke tadila kaka ve zina mpi mutindu nge ke monanaka. Yo ke tadila bansiku yina nge ke zitisaka, balukwikilu mpi bikalulu na nge. Ya kieleka, kimuntu na nge kele mambu yonso yina ke salaka nde nge vanda mutindu nge kele, yo vanda na kati mpi na nganda.

SAMBU NA NKI YO KELE MFUNU

Kana nge kele ti kimuntu ya ngolo, nge ta nwanina balukwikilu na nge na kisika ya kubika nde banduku na nge kuyala nge.

“Bantu mingi kele bonso biteki yina bo ke tulaka na magasin. Bo ke ponaka ve bilele yina bo ke lwataka; kansi bantu ya nkaka ke poninaka bo yo.”—Adrian.

“Mono me longukaka mutindu ya kunwanina mambu ya mbote ata ntangu yo kele mpasi. Mono lenda monisa banani kele banduku na mono ya kieleka na mambu yina bo ke salaka mpi na mambu yina mono ke salaka kana mono kele ti bo.”—Courtney.

MUNSIKU YA BIBLIA: “Beno yambula kulanda ngidika yai ya bima, kansi beno soba kimuntu na beno mpi beno kumisa mabanza na beno ya mpa.”—Baroma 12:2.

MAMBU YA NGE LENDA SALA

Tadila bikalulu na nge ya mbote, bifu na nge mpi balukwikilu na nge; yindula muntu ya nki mutindu nge kele bubu yai mpi muntu ya nki mutindu nge ke zola kukuma. Mutindu ya mbote ya kusala yo kele ya kupesa mvutu na bangiufula yai.

Bikalulu ya mbote: Inki mambu mono me zaba kusala? Inki kele bikalulu na mono ya mbote? (Mu mbandu: Keti mono ke salaka mambu na ntangu ya me fwana? keti mono ke kudiyalaka? keti mono ke salaka ngolo? to keti mono ke kabaka?) Inki mambu ya mbote mono ke salaka?

BANDONGISILA: Keti nge ke kuka ve kuzaba mambu ya mbote yina nge me salaka to me tubaka? Yula kibuti to nduku yina nge ke tudilaka ntima bikalulu ya mbote yina yandi ke monaka na nge mpi sambu na nki.

MUNSIKU YA BIBLIA: “Konso muntu fwete tadila mambu yina yandi mosi ke sala, ebuna yandi ta vanda ti kikuma ya kuwa kiese sambu na yandi mosi, kansi ve na kudifwanisa ti muntu ya nkaka.” —Bagalatia 6:4.

Bifu: Inki bikalulu ke lomba nde mono tomisa? Inki ntangu mono lenda bwa mpenza na mpukumuna ya kusala diambu ya mbi? Na nki mambu mono lenda kudiyala mingi?

MUNSIKU YA BIBLIA: “Kana beto tuba nde, ‘Beto kele ve na disumu,’ beto ke kudikusa.”—1 Yoane 1:8.

Balukwikilu: Inki bansiku ya bikalulu ya mbote mono ke landaka mpi sambu na nki? Keti mono ke kwikilaka na Nzambi? Inki ke ndimisaka mono nde yandi kele? Inki mambu mono ke tadilaka nde yo kele ya kukonda lunungu mpi sambu na nki? Inki kele balukwikilu na mono sambu na bilumbu ke kwisa?

MUNSIKU YA BIBLIA: “Mayele ya kuyindula ta landa kukeba nge, mpi luswasukusu ta tanina nge.”—Bingana 2:11.