Bantu ya kikesa ke buyaka ve kusala kisalu. Kansi, bo ke vandaka na kiese ya kusala ngolo sambu na kulungisa bampusa na bo mosi mpi kusadisa bantu ya nkaka, ata bantu ke monaka bo bantu mpamba sambu na kisalu yina bo ke salaka.

Nge zola to ve, luzingu kele ti mambu mingi ya kusala. Na nsi-ntoto yai ya bantu mingi ke zolaka ve kusala ngolo, kuvanda muntu ya kikesa ta natila nge mambote.—Longi 3:13.

“Mono me zabaka nde kana nge ke sala ngolo, nge ta vanda na kiese mingi. Kiese yai me sadisaka mono kibeni na kuzola kusala kisalu. Kusala ngolo ta sadisa nge mpi na kuvanda ti lukumu ya mbote.”—Reyon.

MUNSIKU YA BIBLIA: “Lufutu ke vandaka na konso kisalu ya ngolo.”—Bingana 14:23.

Sadila mambu yai ya ke landa sambu na kuvanda ti bangindu ya mbote na yina me tala kisalu.

Vanda na kiese ntangu nge ke longuka na kusala mambu mbote. Yo vanda nge ke sala bisalu ya nzo, nge ke manisa kusala devware mosi ya nzo-nkanda, to nge ke sala kisalu mosi ya kinsuni, kudipesa na mambu ya nge ke sala. Kana nge me kuma kusala kisalu mosi mbote, sosa mitindu ya kutomisa yo, disongidila ya kusala yo nswalu to mbote kibeni. Kana nge me zaba kisalu na nge mbote, nge ta kuma kusepela mingi ti yo.

MUNSIKU YA BIBLIA: “Keti nge me mona muntu yina me zaba kisalu na yandi mbote? Yandi ta telama na ntwala ya bantotila; yandi ta telama ve na ntwala ya bantu ya mpamba.”—Bingana 22:29.

Sala mambu sambu na nge mpi sambu na bantu ya nkaka. Na mambu mingi, kana nge me lungisa mbote mikumba na nge, yo ta natila bantu ya nkaka mambote. Mu mbandu, kana nge ke sala bisalu ya nzo ti kikesa, yo ta sala nde bantu ya nkaka na dibuta kuvanda ve ti bisalu mingi ya kusala.

MUNSIKU YA BIBLIA: “Kiese ke vandaka mingi na kupesa, kansi na kubaka kiese ke vandaka fioti.”—Bisalu 20:35.

Sala mambu mingi. Na kisika ya kusala kaka mambu yina bo me lomba nge, sosa kusala mambu mingi kuluta. Mpidina, nge ta monisa nde nge ke twadisa luzingu na nge; nge ke sala mingi sambu nge ke zola kusala yo kansi ve sambu bo ke pusa nge na kusala yo.—Matayo 5:41.

MUNSIKU YA BIBLIA: “Nge sala ve diambu ya mbote sambu bo ke pusa nge, kansi nge sala yo na luzolo na nge mosi.”—Filemoni 14.

Vanda ti bukati-kati. Bantu ya kikesa ke vandaka ve bamolo, mpi bo ke vandaka ve bampika ya kisalu. Bo ke vandaka ti bukati-kati, disongidila bo ke sepelaka kusala ngolo mpi kupema.

MUNSIKU YA BIBLIA: “Kupema mwa fioti kele mbote kuluta kisalu ya ngolo mpi kulanda mupepe.”—Longi 4:6.