Kwenda na mambu ke na kati

Kwenda na tansi ya malongi

 LUYALU YINA TA NUNGA DIAMBU YA MPASI

Yo “Ta Vanda na Ngemba Kukonda Nsuka”

Yo “Ta Vanda na Ngemba Kukonda Nsuka”

Kimvuka ya Nations-Unies ke siamisa bantu yonso na kuwakana, na kuzitisa banswa ya bantu mpi na kutanina ntoto. Sambu na nki? Maher Nasser tubaka na zulunalu mosi (UN Chronicle) nde “kusoba ya mupepe, mambu ya mubulu, mambu ya kukonda lunungu, mavwanga yina ke manaka ve, bantu mingi ke kwenda kuzinga na bisika ya nkaka, bamaladi yina ke sambukilaka, mpi bigonsa ya mutindu mosi ke salama na bansi yonso.”

Bantu ya nkaka nkutu me pesaka dibanza ya kusala luyalu mosi ya ntoto ya mvimba. Dante (1265-1321), muntu mosi ya Italie yina longukaka filozofi mpi yina vandaka kutadila mambu ya insi mpi Albert Einstein (1879-1955) muntu mosi ya siansi vandaka na kati ya bantu yai. Dante tubaka nde ngemba lenda vanda ve ntangu ya nda na nsi ntoto yina me kabwanaka na mambu ya politiki. Yandi vutukilaka bangogo yai ya Yezu Kristu, “kimfumu yina kele ya kukabwana na kati na yo ke fwaka.”—Luka 11:17.

Ntangu fioti na nima ya Mvita ya Zole ya Ntoto ya Mvimba, yina bo sadilaka babombi zole ya ngolo, Albert Einstein sonikilaka kimvuka ya Nations-Unies mukanda mosi. Yandi tubaka nde “kimvuka ya Nations-Unies fwete sala na nswalu yonso mambu yonso ya kele mfunu sambu na kusala luyalu mosi na ntoto ya mvimba.”

Keti bantu ya politiki yina ta vanda na luyalu yai ya ngolo ta vandaka ntangu yonso bantu ya mbote, bantu ya ke salaka kisalu mbote mpi bantu ya ke niokulaka ve ata fioti bantu ya nkaka? To keti bo ta vanda kaka bonso bamfumu ya nkaka ya mbi? Bangiufula yai ke yibusa beto mambu yina Lord Acton, muntu mosi ya Grande-Bretagne yina ke longukaka mambu ya me lutaka, tubaka: “Mbala mingi, kiyeka ke bebisaka muntu; kana muntu kele ti kiyeka ya mingi, yo ke bebisaka yandi mingi kibeni.”

Sambu beto vanda na ngemba ya kieleka mpi beto wakana mbote, beto fwete vanda na bumosi. Kansi nki mutindu beto lenda sala yo? Keti yo lenda salama? Biblia ke tuba nde yo lenda salama mpi nde yo ta lungana. Inki mutindu? Yo ta salama ve na nsadisa ya luyalu mosi ya nsi-ntoto yina bantu ya mbi ya politiki ke twadisa. Kansi, yo ta salama na nzila ya luyalu yina Nzambi ta tula. Diaka, luyalu yai ta monisa nde Nzambi mpamba kele ti nswa ya kuyala bantu. Inki kele luyalu yango? Biblia ke bingaka yo “Kimfumu ya Nzambi.”—Luka 4:43.

“KIMFUMU NA NGE KUKWISA”

Yezu Kristu vandaka kuyindula Kimfumu ya Nzambi ntangu yandi tubaka na kisambu na yandi ya mbandu nde: “Kimfumu na nge kukwisa. Luzolo na nge kusalama na ntoto.” (Matayo 6:9, 10) Ya kieleka, Kimfumu ya Nzambi ta sala na mpila nde luzolo ya Nzambi kusalama na ntoto, kansi ve ya bantu yina ke vandaka ti nzala ya ngolo ya kiyeka mpi yina ke sosaka kaka mambote na bo mosi.

Biblia ke bingaka mpi Kimfumu ya Nzambi nde “Kimfumu ya zulu.” (Matayo 5:3) Sambu na nki? Sambu yo ta yala ntoto ya mvimba katuka na zulu. Yindula mambu yina yo ta tendula. Luyalu yai ya ntoto ya mvimba ta vanda ve na mfunu ya kulomba bantu mbongo, mu mbandu mpaku. Bantu ya luyalu yai ta vanda kibeni na kiese!

Mutindu ngogo “kimfumu” ke monisa yo, Kimfumu ya Nzambi kele luyalu yina Yezu, Ntotila yina Nzambi me ponaka, ke twadisa. Biblia ke tuba sambu na Yezu nde:

  • “Luyalu ta vanda na zulu ya mapeka na yandi . . . Luyalu na yandi ta yalumuka mpi ta  vanda na ngemba kukonda nsuka.” —Yezaya 9:6, 7.

  • “Bo pesaka yandi luyalu, lukumu, mpi kimfumu, sambu bantu, makanda mpi bandinga, bo yonso kusadila yandi. Luyalu na yandi . . . ta luta ve.”—Daniele 7:14.

  • “Kimfumu ya nsi-ntoto me kuma Kimfumu ya Mfumu [Nzambi] na beto mpi ya Kristu na yandi.”—Kusonga 11:15.

Sambu mambu yina Yezu tubaka na kisambu na yandi ya mbandu kulungana, Kimfumu ya Nzambi ta lungisa mbote-mbote luzolo ya Nzambi na ntoto. Na nsi ya luyalu na yo, bantu yonso ta zaba mutindu ya kutanina ntoto sambu yo kuma mbote mpi yo fuluka ti bantu.

Diaka, Kimfumu ya Nzambi ta longa bantu na yo. Bo ta longa bantu yonso mambu ya mutindu mosi. Bantu ta zinga na bumosi. Yezaya 11:9 ke tuba nde: “Bo ta sala ata mbi mosi ve mpi ta bebisa ata kima mosi ve . . . sambu ntoto ta fuluka kibeni ti nzayilu ya Yehowa mutindu bamasa ke fulusaka nzadi-mungwa.”

Bantu na ntoto ya mvimba ta vanda na bumosi mpi ta zinga na ngemba, diambu yina kimvuka ya Nations-Unies zolaka kusala. Nkunga 37:11 ke tuba nde: “Bo ta wa kiese kibeni na ngemba ya mingi.” Na ntangu yina, beto ta tubilaka diaka ve “mubulu,” “kubeba ya mupepe,” “kinsukami” mpi “bitumba.” Kansi nki ntangu yo ta salama? Inki ntangu Kimfumu ya Nzambi ta yantika kuyala ntoto ya mvimba? Inki mutindu yo ta yantika kuyala? Mpi nki mutindu luyalu na yo lenda natila nge mambote? Beto tadila yo sesepi yai.