Kwenda na mambu ke na kati

Kwenda na tansi ya malongi

BO NUNGAKA DIAMBU YA MPASI

Disolo ya Ricardo mpi ya Andres

Disolo ya Ricardo mpi ya Andres

Malongi ya Biblia ke vandaka ti bupusi ya ngolo sambu na kusoba luzingu ya bantu. Beto tadila bambandu zole ya ke ndimisa diambu yai: Ricardo mpi Andres.

RICARDO: Ntangu mu lungisaka bamvula 15, mu vukanaka ti kimvuka mosi ya babandi. Banduku na mu ya mpa vandaka ti bupusi ya ngolo na luzingu na mu. Ya kieleka, mu kumaka ti lukanu ya kulutisa bamvula kumi na boloko! Yo lenda monana buzoba. Kansi na bwala na beto, bo vandaka kukumisa mpi kuzitisa bantu yina lutisaka ntangu na boloko. Mu vandaka kuzola mpi kukuma bonso bo.

Mu salaka mambu yonso yina babandi ke salaka, mu mbandu kusadila bima yina ke lawusaka, kuvukisa nitu, mpi mubulu. Kilumbu mosi na mpimpa, mu vandaka na kati ya bantu yina bulaka masasi. Mu yindulaka nde mu zolaka kufwa, kansi mu tinaka mpi ata kima mosi ve ya mbi kuminaka mu. Na nima, mu yantikaka kuyindula mingi mambu ya me tala luzingu na mu mpi balukanu na mono, mpi mu bakaka lukanu ya kusoba. Kansi nki mutindu? Na wapi mu lendaka kuzwa lusadisu?

Bantu mingi ya dibuta na mu vandaka ve na kiese. Luzingu na bo fulukaka ti bampasi. Kansi mambu vandaka ve mutindu mosi ti dibuta ya ngwashi na mu mosi. Mu vandaka kuzaba nde bo vandaka bantu ya mbote mpi nde bo vandaka kuzitisa minsiku ya Biblia. Ya kieleka, bo longaka mu kilumbu mosi nde Yehowa kele zina ya Nzambi. Yo yina, ntangu fioti na nima ya ntangu yina bo bulaka masasi, mu sambaka Yehowa, mpi bingaka yandi na zina na yandi mpi mu lombaka yandi lusadisu. Diambu ya yitukisaka mu kele nde kaka kilumbu yina landaka, Mbangi ya Yehowa mosi bulaka na kielo na mu! Yandi kumaka kulonga mu Biblia.

Ntangu fioti na nima, mu nungaka diambu mosi ya mpasi. Mbala mingi, banduku na mu ya ntama vandaka kubinga mu na telefone mpi kulomba mu na kulutisa ntangu ti bo. Ata yo vandaka ve pete, mu vandaka kubuya. Mu bakaka lukanu ya kulanda kulonguka Biblia, mpi mu kele na kiese mutindu mu bakaka lukanu yina! Luzingu na mu sobaka na mutindu ya kuyituka, mpi mu zwaka kiese ya kieleka.

Mu ke yibuka kilumbu yina mu songaka Nzambi na kisambu nde ntete mu vandaka kuzola kulutisa bamvula kumi na boloko sambu bantu ya kimvuka ya babandi kuzitisa mu. Yo yina, mu lombaka yandi na kusadisa mono sambu mu sadila yandi bonso mupasudi-nzila bamvula kiteso ya kumi sambu na kusadisa bantu ya nkaka kaka mutindu bo sadisaka mu. Nzambi waka kisambu na mu, sambu mu salaka bamvula 17 bonso mupasudi-nzila! Mpi mu lenda tuba diaka nde, mu kotaka ve ata fioti na boloko.

Kansi, banduku na mu mingi ya ntama me salaka bamvula mingi na boloko. Bankaka me fwaka. Mu ke vandaka na ntonda ya mingi sambu na bantu ya dibuta na beto yina kele Bambangi ya Yehowa ntangu mu ke yibukaka diaka mambu yai. Bo vandaka kuzola kuzinga ve bonso bantu ya nkaka, mpi bo vandaka kuzitisa mambu ya Biblia. Mu kumaka kupesa bo luzitu ya mingi yina mu vandaka ve kupesa ata muntu mosi na kimvuka ya babandi. Diaka, mu kele na ntonda ya mingi na Nzambi sambu yandi me longaka mu mutindu ya kuluta mbote ya kuzinga.

ANDRES: Mu butukaka mpi yelaka na bwala mosi ya kinsukami yina bantu vandaka kusadila mingi bima ya ke lawusaka, kubotula bima ya bantu ya nkaka, kufwa bantu mpi kusala kindumba. Tata na mu vandaka mpika ya malafu mpi ya makaya yina bo ke bingaka cocaïne. Yandi ti mama vandaka kuswana mpi kunwana ntangu yonso.

Ntangu mu vandaka leke, mu yantikaka kunwa malafu mpi kusadila bima ya ke lawusaka. Mu lutisaka ntangu mingi na babala-bala; mu vandaka kuyiba mpi na nima mu vandaka kuteka bima yina mu vandaka kuyiba. Ntangu mu vandaka kuyela, tata na mu sosaka kukangama ti mu, kansi yandi salaka yo na mutindu ya mbi. Yandi songaka mu mutindu ya kukotisa na insi na beto bima ya ke lawusaka mpi bima ya nkaka yina nsiku ke buyisaka mpi na kuteka yo. Mu zwaka mbongo mingi na ntangu fioti. Kilumbu mosi bapolisi kwisaka na nzo na mu. Bo kangaka mu mpi bo zengilaka mu bamvula tanu ya boloko sambu mu sosaka kufwa muntu.

Kilumbu mosi na suka, bo bingisaka na lance-voix bantu ya boloko na kulanda masolo ya Biblia yina Bambangi ya Yehowa yidikaka. Mu bakaka lukanu ya kulanda yo. Mambu yina mu waka vandaka ya mbote, yo yina mu kumaka kulonguka Biblia ti Bambangi ya Yehowa. Bo vandaka kuzabisa ve kaka nsangu yina lendaka kusepedisa bantu kansi bo vandaka mpi kusonga mu bansiku ya mbote ya Nzambi.

Ntangu fioti na nima, mu bakisaka nde mu lendaka ve kusala bansoba ya me fwana mu mosi, mingi-mingi ntangu bantu ya nkaka ya boloko, yina vandaka kuzola ve mambu yina mu vandaka kusala, vandaka kuniokula mu. Yo yina, mu sambaka sambu na kubaka ngolo mpi mayele, mpi Yehowa sadisaka mu. Ya kieleka, na kisika ya kulemba nitu, mu bakaka diaka kikesa ya mingi ya kuzabisa bo mambu ya Biblia.

Ntangu mu zolaka kubasika na boloko, mu vandaka kudiyangisa mingi yo yina mu vandaka kuzola kibeni kubikala diaka na boloko! Ntangu mu vandaka kubasika na boloko, bantu ya nkaka ya boloko vandaka kupesa mu mbote. Bankaka nkutu vandaka kutuba na mawete yonso nde, “Kwenda mbote pastere.”

Mu ke waka boma kana mu yindula mutindu luzingu na mu zolaka kuvanda kana mu bikaka ve nde Nzambi kulonga mu. Mu kele kibeni na ntonda sambu Nzambi ke zolaka mu mpi sambu yandi tadilaka mu ve bonso muntu yina lenda soba ve. *

^ par. 15 Bambandu mingi yina ke monisaka mutindu Biblia ke sobaka luzingu ya bantu kele na jw.org. Bweta na MALONGI YA BIBLIA > NGEMBA MPI KIESE..