Kwenda na mambu ke na kati

Kwenda na tansi ya malongi

 DISOLO YINA KELE NA LUTITI YA ZULU | INKI BIBLIA KE TUBAKA NA YINA ME TALA BAWANZIO?

Inki Mutindu Bawanzio Lenda Sadisa Nge?

Inki Mutindu Bawanzio Lenda Sadisa Nge?

Bawanzio ya mbote ke tulaka dikebi ya mingi na mambu ya bantu mpi bo ke kudipesaka mingi na kulungisa luzolo ya Yehowa. Ntangu Yehowa gangaka ntoto, bawanzio “tulaka milolo ya kiese kumosi, mpi bana yonso ya Nzambi yantikaka kutula milolo ya kiese.” (Yobi 38:4, 7) Na disolo ya luzingu ya bantu, bawanzio ke zolaka “kutula meso” na bambikudulu ya ke tubila mambu yina ta salama na ntoto na bilumbu ke kwisa.—1 Piere 1:11, 12.

Biblia ke monisa nde bantangu ya nkaka, bawanzio taninaka bansadi ya Nzambi sambu na kulungisa luzolo ya Nzambi. (Nkunga 34:7) Mu mbandu:

  • Ntangu Yehowa zolaka kufwa bambanza ya mbi Sodome ti Gomore, bawanzio sadisaka Loti, muntu ya mbote, ti dibuta na yandi na kutina.—Kuyantika 19:1, 15-26.

  • Na Babilone ya ntama, ntangu bo tulaka baleke tatu ya Baebreo na dibulu ya tiya sambu na kufwa bo, Nzambi “tindaka wanzio na yandi mpi gulusaka bansadi na yandi.”—Daniele 3:19-28.

  • Ntangu Daniele, muntu ya mbote, salaka mpimpa ya mvimba na dibulu ya bantambu, yandi tubaka na nima nde yandi gulukaka sambu ‘Nzambi tindaka wanzio na yandi mpi yandi kangaka munoko ya bantambu.’—Daniele 6:16, 22.

Banda ntama, bawanzio ke sadisaka bantu ya kwikama

BAWANZIO SADISAKA DIBUNDU YA BUKRISTU YA MVU-NKAMA YA NTETE

Bantangu ya nkaka, bawanzio yina Nzambi vandaka kutinda sadisaka dibundu ya Bukristu ya mvu-nkama ya ntete ntangu yo vandaka mfunu sambu na kulungisa lukanu ya Yehowa. Mu mbandu:

  • Wanzio mosi kangulaka bakielo ya boloko mpi basisaka bantumwa sambu bo landa kulonga na tempelo.—Bisalu 5:17-21.

  • Wanzio mosi twadisaka nsamuni Filipo na kukwenda na ntoto ya zelo na zelo na nzila yina ke katuka na Yeruzalemi mpi ke kwenda na Gaza sambu na kulonga muntu mosi ya Etiopia yina kwendaka kusambila na Yeruzalemi.—Bisalu 8:26-33.

  • Ntangu yo lombaka nde bantu yina vandaka ve Bayuda kukuma Bakristu, wanzio mosi monanaka na mbona-meso na Korneye, mfumu mosi ya basoda ya Roma mpi songaka yandi na kubingisa ntumwa Piere na nzo na yandi.—Bisalu 10:3-5.

  • Ntangu bo tulaka ntumwa Piere na boloko, wanzio mosi monanaka na yandi mpi basisaka yandi na boloko.—Bisalu 12:1-11.

 MUTINDU BAWANZIO LENDA SADISA NGE

Bubu yai, kele ve ti mambu ya ke monisa nde Nzambi ke sadila bawanzio na mutindu ya kuyituka sambu na kusadisa bantu bonso na ntangu ya ntama. Ata mpidina, Yezu tubaka mambu yai sambu na bilumbu na beto: “Bo ta samuna nsangu yai ya mbote ya Kimfumu na ntoto ya mvimba sambu na kuta kimbangi na makanda yonso, ebuna nsuka ta kwisa.” (Matayo 24:14) Keti nge me zaba nde bawanzio ke twadisaka balongoki ya Kristu na kisalu ya kusamuna?

Bawanzio ke sadisaka na kisalu ya kuzabisa nsangu ya mbote na ntoto ya mvimba

Mukanda ya Kusonga ke monisa nde bawanzio ta landa kusadisa bantu na ntoto ya mvimba sambu bo longuka mambu ya Yehowa mpi lukanu na yandi sambu na bantu. Ntumwa Yoane sonikaka nde: “Mono monaka wanzio ya nkaka ke pumbuka na kati-kati ya zulu, mpi yandi vandaka ti nsangu ya mbote ya mvula na mvula ya kuzabisa na bantu yina ke zingaka na ntoto, na makanda yonso, na mabuta yonso, na bandinga yonso, mpi na bansi yonso. Yandi vandaka kutuba na ndinga ya ngolo nde: ‘Beno wa Nzambi boma mpi beno pesa yandi nkembo, sambu ngunga yina yandi ta sambisa bantu me lunga, beno sambila Muntu yina salaka zulu, ntoto, nzadi-mungwa, mpi ba-nto ya masa.’” (Kusonga 14:6, 7) Mambu mingi yina bantu ke kutana ti yo bubu yai ke ndimisa nde bawanzio ke pesaka maboko na kisalu ya kusamuna Kimfumu ya Nzambi na ntoto ya mvimba. Ya kieleka, kana muntu mosi ya masumu me balula ntima mpi me vutukila Yehowa, “bawanzio ya Nzambi ke vandaka na kiese mingi.”—Luka 15:10.

Inki ta salama ntangu kisalu ya kusamuna ta suka? “Makesa ya zulu” yina me salama na bawanzio ta pesa maboko na Yezu Kristu, Ntotila ya bantotila, ntangu yandi ta nwana “bitumba ya kilumbu ya nene ya Nzambi Nkwa-Ngolo Yonso” na Armagedoni. (Kusonga 16:14-16; 19:14-16) Bawanzio ya ngolo ta pesa bantu ndola ntangu Yezu “ta vutula mbi na bantu yina . . . ke lemfukaka ve na nsangu ya mbote ya Mfumu na beto Yezu.”—2 Batesalonika 1:7, 8.

Yo yina, ndima nde bawanzio ke tudilaka nge dikebi. Bo ke kudiyangisaka mingi sambu na mambote ya bantu yina ke vandaka na mpusa ya kusadila Nzambi, mpi Yehowa me sadilaka bo mbala mingi sambu na kupesa kikesa na bansadi na yandi ya kwikama na ntoto mpi kutanina bo.—Baebreo 1:14.

Yo yina, Konso muntu na kati na beto kele ti lukanu ya mfunu ya kubaka. Keti nge ta widikila mpi ta lemfuka na nsangu ya mbote yina bo ke longa na ntoto ya mvimba? Bambangi ya Yehowa ya bwala na beno ta vanda na kiese ya kusadisa nge na kubaka mambote na lusadisu yina ke katukaka na bawanzio ya Nzambi.