Kisono ya Kuluta Fioti ya Kiebreo Ke Bwisa Beto Mpenza Ntima
Keti beto lenda tula kibeni ntima nde balusilu yonso ya Nzambi ta lungana? Yezu vandaka kundima diambu yai, mpi malongi na yandi kumisaka lukwikilu ya bawi na yandi ngolo. Beto tadila mbandu yina yandi pesaka na Disolo na Zulu ya Ngumba, yina kele na Matayo 5:18. Yo ke tuba nde: “Ya kieleka mono ke tubila beno nde zulu ti ntoto lenda luta, kansi ata kisono mosi ya kuluta fioti to kitini mosi ya kisono ya Nsiku ta luta ve tii kuna mambu yonso ta salama.”
Kisono ya kuluta fioti ya alfabe ya Kiebreo kele י (yod), yina kele kisono ya ntete ya bisono iya ya ke salaka zina ya santu ya Nzambi, Yehowa. * Sambu na bansekudi ti Bafarize, bangogo mpi bisono ya Nsiku ya Nzambi vandaka ti ntendula ya mingi; yo vandaka mutindu mosi sambu na konso ‘kitini ya kisono’ ya Nsiku.
Yezu vandaka kutuba nde zulu ti ntoto lenda luta kansi ka diambu ya kuluta fioti ya Nsiku ta lungana kibeni. Kansi, Biblia ke ndimisa beto nde zulu mpi ntoto ya ke monanaka ta bikala kimakulu. (Nkunga 78:69) Yo yina, mambu yai ya Yezu tubaka ke monisa nde mambu yonso ya Nsiku ta lungana kibeni, ata ka diambu ya kuluta fioti.
Keti Yehowa Nzambi ke tulaka dikebi na mambu ya fioti? Ee. Beto tadila diambu yai: Nzambi songaka bantu ya Izraele ya ntama nde bo fwete buka ve ata mukwa mosi ya mwana-dimeme ya Paki. (Kubasika 12:46) Ziku yo kele ka diambu ya fioti. Keti bo bakisaka sambu na nki bo fwete buka ve ata mukwa mosi? Ziku bo bakisaka ve. Kansi, Yehowa Nzambi zabaka nde ka diambu yina vandaka mbikudulu ya ke monisa nde bo ta buka ve ata mukwa mosi ya Mesia ntangu bo ta fwa yandi na nti ya mpasi.—Nkunga 34:20; Yoane 19:31-33, 36.
Bangogo yina ya Yezu ke longa beto inki? Beto mpi lenda tula ntima ya mvimba nde balusilu yonso ya Yehowa Nzambi ta lungana, ata mambu na yo ya fioti-fioti. Kisono ya kuluta fioti ya Kiebreo ke bwisa beto kibeni ntima!
^ par. 3 Kisono ya kuluta fioti ya alfabe ya Kigreki kele iota mpi yo ke monana nde yo me fwanana ti ngogo ya Kiebreo י (yod). Sambu na kisina bo sonikaka Nsiku ya Moize na Kiebreo mpi bo vandaka kusala bakopi na yo na ndinga yina, yo ke monana nde Yezu vandaka kutubila kisono yina ya Kiebreo.
Nge Lenda Sepela Mpi Ti
BAMVUTU NA BANGIUFULA YA BIBLIA
Yehowa Kele Nani?
Keti yandi kele Nzambi kaka ya dikanda mosi buna, mu mbandu bantu ya Izraele?
MBALULA YA NSI-NTOTO YA MPA YA MASONUKU YA SANTU (2013 YA MPA)
Inki Mambu Biblia Ke Sila Sambu na Bilumbu Ke Kwisa?
Kivuvu na yo ya kitoko lenda yitukisa nge.
