Kwenda na mambu ke na kati

Kwenda na tansi ya malongi

Inki Mutindu Nzambi Ta Katula Lufwa?

Inki Mutindu Nzambi Ta Katula Lufwa?

ATA bibuti na beto ya ntete Adami ti Eva lemfukilaka ve Nzambi mpi yo me natilaka bantu yonso disumu mpi lufwa, lukanu ya Nzambi sambu na bantu me sobaka ve. Na Biblia, Nzambi ke monisaka mbala na mbala nde lukanu na yandi me sobaka ve.

  • “Bantu ya lunungu ta baka ntoto, mpi bo ta zinga kimakulu na zulu na yo.”Nkunga 37:29.

  • “Yandi ta mina lufwa kimakulu, mpi Yehowa Mfumu ya Kuluta Nene ta kusula mansanga na baluse yonso.”Yezaya 25:8.

  • “Yandi ta katula lufwa, mbeni ya nsuka.”1 Bakorinto 15:26.

  • “Lufwa ta vandaka diaka ve; mawa, bidilu, mpi mpasi ta vandaka diaka ve.”Kusonga 21:4.

Inki mutindu Nzambi ta “mina lufwa” to ta “katula” lufwa? Mutindu beto me mona yo, Biblia ke tuba pwelele nde “bantu ya lunungu . . . ta zinga kimakulu.” Kansi yo ke tuba mpi nde “kele ve ti muntu ya lunungu na ntoto yina ke salaka kaka mambu ya mbote mpi ke salaka ve masumu ata fioti.” (Longi 7:20) Keti yo ke lomba nde Nzambi kubika nde bantu kuzitisa diaka ve bansiku na yandi sambu na kukatula lufwa? Ata fioti ve! Yandi ta sala ve ata fioti mutindu yina sambu “Nzambi . . . lenda kusa ve.” (Tito 1:2) Ebuna, Nzambi ta sala nki sambu na kulungisa lukanu ya zola yina yandi vandaka ti yo ntangu yandi salaka bantu?

NZAMBI “TA MINA LUFWA KIMAKULU.”—YEZAYA 25:8

NZAMBI TA KATULA LUFWA NA NZILA YA KIMENGA YA YEZU

Yehowa Nzambi bakaka ngidika mosi ya zola sambu na kukatula bantu na kimpika ya lufwa; yandi pesaka kimenga ya Yezu (nkudulu). Mbala mingi, bo ke sadilaka ngogo nkudulu sambu na kutubila mbongo yina bo ke futaka sambu na kukatula muntu na kimpika. Biblia ke sadilaka ngogo nkudulu sambu na kutubila kima yina bo ke pesaka sambu na kufuta kima mosi ya me beba mpi kima yango fwete vanda kiteso mosi ti yina ya bebaka. Sambu bantu yonso kele bantu ya masumu mpi bo me bakaka ndola ya lufwa, Biblia ke tuba pwelele nde: “Muntu mosi ve na kati na bo lenda sumba diaka mpangi na yandi ata fioti to kupesa Nzambi nkudulu sambu na yandi, (ntalu ya nkudulu sambu na luzingu na bo kele na mfunu kibeni yo yina bo ke kukaka ve ntangu yonso kufuta yo).”—Nkunga 49:7, 8.

Kana muntu ya kukonda kukuka me fwa, yandi lenda futa kaka mfuka ya masumu na yandi mosi; yandi lenda kudisumba diaka ve to kufuta mfuka ya masumu ya muntu ya nkaka. (Baroma 6:7) Yo lombaka nde muntu mosi ya kukuka mpi yina salaka ve masumu kupesa luzingu na yandi, sambu na masumu na yandi ve kansi sambu na masumu na beto.—Baebreo 10:1-4.

Yo kele kibeni mambu yina Nzambi yidikaka. Yandi tindaka Mwana na yandi, Yezu, na kubutuka awa na ntoto bonso muntu ya kukuka mpi ya me salaka ve masumu. (1 Piere 2:22) Yezu tubaka nde yandi kwisaka sambu na “kupesa luzingu na yandi bonso nkudulu sambu na bantu mingi.” (Marko 10:45) Yandi fwaka sambu na kukatula beto na kimpika ya lufwa sambu beto zinga mvula na mvula.—Yoane 3:16.

INKI NTANGU NZAMBI TA KATULA LUFWA?

Mutindu bambikudulu ya Biblia ke lungana ke monisa nde beto ke zinga na “bantangu ya mpasi mpi ya nku” mpi yo ke monisa nde beto ke zinga na “bilumbu ya nsuka” ya nsi-ntoto yai ya mbi. (2 Timoteo 3:1) Bilumbu ya nsuka ta suka na “kilumbu ya kusambisa mpi ya lufwa ya bantu yina ke vwezaka  Nzambi.” (2 Piere 3:3, 7) Kansi bantu yina ke zolaka Nzambi ta fwa ve na kilumbu yina mpi bo ta baka “luzingu ya mvula na mvula.”—Matayo 25:46.

Yezu kwisaka sambu na “kupesa luzingu na yandi bonso nkudulu sambu na bantu mingi.”—Marko 10:45

Bantu mingi ta vanda ti dibaku ya kuzinga mvula na mvula ntangu bo ta futumuka. Yezu futumunaka mwana mosi ntangu yandi kwendaka na mbanza Naini. Mufwidi mosi vandaka kaka ti mwana mosi mpi mwana yango fwaka. Sambu Yezu “wilaka yandi mawa,” yandi futumunaka mwana yina. (Luka 7:11-15) Ntumwa Polo tubaka mpi nde: “Mono kele ti kivuvu na Nzambi . . . nde bantu ya lunungu ti bantu ya kukonda lunungu ta futumuka.” Kivuvu yai ya ngolo ke monisa kibeni nde Nzambi ke zolaka bantu.—Bisalu 24:15.

Bantu mingi ke vingila ti nzala ya ngolo luzingu ya mvula na mvula. Biblia ke tuba nde: “Bantu ya lunungu ta baka ntoto, mpi bo ta zinga kimakulu na zulu na yo.” (Nkunga 37:29) Na ntangu yina, bo ta vanda na kiese mingi mpi bo ta baka diaka kikesa ntangu bo ta mona kulungana ya mambu yina ntumwa Polo sonikaka kiteso ya bamvula 2 000 me luta: “Lufwa, wapi kununga na nge? Lufwa, wapi ntunga na nge?” (1 Bakorinto 15:55) Nzambi ta katula kibeni lufwa, mbeni ya nsuka ya bantu.