Kwenda na mambu ke na kati

Kwenda na tansi ya malongi

Nzambi Salaka Beto Sambu Beto Zinga Mvula na Mvula

Nzambi Salaka Beto Sambu Beto Zinga Mvula na Mvula

BANTU yonso ke zolaka kuzinga mingi mpi na kiese. Yindula mutindu beto zolaka kudiwa kana beto zolaka kuzinga mvula na mvula, na kiese mpi na sante ya mbote! Beto zolaka kulutisa ntangu mingi ti bantu yina beto ke zolaka, kukwenda bisika ya nkaka, kuzaba mambu mingi ya mpa, kuyedisa mayele na beto mpi kulonguka mambu yina ke pesaka beto kiese.

Ya kieleka, beto ke butukaka ti mpusa ya kuzinga mvula na mvula. Sambu na nki? Biblia ke tuba nde Nzambi me salaka beto ti mpusa yina. (Longi 3:11) Yo ke tubaka mpi nde: “Nzambi kele zola.” (1 Yoane 4:8) Nzambi ke zolaka beto. Kana yandi zolaka ve nde beto zinga mvula na mvula, yandi zolaka ve kuganga beto ti mpusa yina.

Ya kieleka, ata muntu mosi ve ke zolaka kufwa. Yo yina, Biblia ke bingaka lufwa “mbeni ya nsuka.” (1 Bakorinto 15:26) Bantu ya nkaka ke fwaka nswalu, bankaka ke zingaka mingi; kansi nsuka-nsuka beto yonso ta fwa. Bantu mingi ke waka boma ntangu bo ke yindulaka mambu ya me tala lufwa. Keti kilumbu kele Nzambi ta katula mbeni yai? Keti yo ta salama kibeni?

MAMBU YINA KE PESAKA BETO KIVUVU

Keti yo ke yitukisa nge na kuzaba nde lukanu ya Nzambi vandaka ve nde bantu kufwa? Mambu yina mukanda ya Kuyantika ke tuba, ke monisa nde Nzambi zolaka nde bantu kuzinga mvula na mvula na ntoto. Yehowa Nzambi salaka ntoto ti bima mingi ya mbote yina bantu ke vandaka ti yo mfunu sambu na kuzinga mpi kuvanda na kiese. Na nima, yandi gangaka Adami, bakala ya ntete mpi tulaka yandi na paladisu, kilanga ya Edeni. Na nima “Nzambi monaka bima yonso ya yandi salaka, mpi tala! yo vandaka mbote kibeni.”—Kuyantika 1:26, 31.

Nzambi gangaka Adami muntu ya kukuka mpi na kifwani na yandi. (Kulonga 32:4) Eva, nkento na yandi mpi vandaka ve ata ti kifu mosi; mabanza mpi  nitu na yandi ya mvimba vandaka ya kukuka. Yehowa songaka bo nde: “Beno buta mingi mpi beno kuma mingi, beno fulusa ntoto mpi beno yala yo, mpi beno yala bambisi ya masa ya nzadi-mungwa mpi bigangwa ya ke pumbukaka mpi konso kigangwa ya ke zingaka yina ke tambulaka na ntoto.”—Kuyantika 1:28.

Adami ti Eva zolaka kubaka ntangu mingi sambu na kufulusa ntoto. Eva zolaka kubuta bana mpi bana yango zolaka kubuta bana ya nkaka tii ntangu ntoto zolaka kufuluka ti bantu mutindu Nzambi zolaka. (Yezaya 45:18) Kana yo lombaka nde Adami ti Eva kuzinga kaka sambu na mwa ntangu sambu na kumona bana na bo mpi ziku bantekolo na bo ebuna na nima bo fwa, keti Yehowa zolaka kupesa bo dibaku yai?

Yindula mpi mukumba yina Nzambi pesaka bo ya kuyala bambisi. Nzambi songaka Adami na kupesa bambisi bazina mpi yo zolaka kubaka ntangu mingi. (Kuyantika 2:19) Kansi sambu na kuyala bo, yo lombaka nde Adami kuzaba mbote-mbote konso mbisi mpi mutindu ya kukeba yo. Yo zolaka kubaka ntangu mingi kibeni.

Nzambi pesaka Adami ti Eva kisalu ya kufulusa ntoto mpi ya kuyala bambisi. Yo ke monisa nde Nzambi salaka bo sambu bo zinga mingi. Ya kieleka, Adami zingaka mpi bamvula mingi kibeni.

NZAMBI KE ZOLA NDE BANTU KUZINGA MVULA NA MVULA NA PALADISU AWA NA NTOTO

BANTU YINA ZINGAKA BAMVULA MINGI KIBENI

Adami: bamvula 930

Metusela: bamvula 969

Noa: bamvula 950

Bubu yai, bantu ke zingaka bamvula 70 to 80

Biblia ke monisaka nde bantu ya ntangu ya ntama zingaka mingi kuluta beto. Yo ke tuba nde: “Bilumbu yonso ya luzingu ya Adami vandaka bamvula 930.” Diaka, yo ke tubila babakala ya nkaka sambanu yina zingaka bamvula kuluta 900! Babakala yango kele: Seti, Enosi, Kenani, Yaredi, Metusela mpi Noa. Bo yonso zingaka na ntwala ya Mvula ya Ngolo yina nokaka na bilumbu ya Noa mpi Noa zingaka bamvula 600 na ntwala nde Mvula ya Ngolo kunoka. (Kuyantika 5:5-27; 7:6; 9:29) Sambu na nki bantu vandaka kuzinga bamvula mingi?

Bo yonso zingaka pene-pene ya nsungi yina bantu vandaka ya kukuka. Ziku yo kele diambu yina salaka nde bo zinga mingi. Sambu na nki muntu fwete vanda ya kukuka sambu na kuzinga mingi? Mpi nki mutindu Nzambi ta katula lufwa? Sambu na kuzwa bamvutu na bangiufula yai, beto fwete bakisa ntete sambu na nki beto ke nunaka mpi ke fwaka.