Kwenda na mambu ke na kati

Kwenda na tansi ya malongi

Inki Mutindu Nge Lenda Vanda ti Luzingu ya Mbote?

Inki Mutindu Nge Lenda Vanda ti Luzingu ya Mbote?

BUBU yai luzingu kele ve mutindu Nzambi yidikaka yo na luyantiku. Ntoto zolaka kufuluka ti bantu yina ke zolaka nde Ngangi na beto kuyala beto, bo zolaka kubaka mambote na bandongisila na yandi mpi kulanda mbandu na yandi ya zola mpi ya bikalulu na yandi ya nkaka ya kitoko. Nzambi zolaka nde bo zinga na kiese na mabuta na bo, bo zaba mambu mingi ya mpa mpi bo kumisa ntoto ya mvimba paladisu.

NZAMBI KE SILA NA KUKUMISA LUZINGU MUTINDU YANDI KANAKA

  • “Yandi ke sukisa bitumba na ntoto ya mvimba.”Nkunga 46:9.

  • “Ntangu ya bo me tulaka kwisaka sambu na . . . kubebisa bantu yina ke bebisaka ntoto.”Kusonga 11:18.

  • “Ata muntu mosi ve ya ke zingaka na insi ta tuba nde: ‘Mono ke bela.’”Yezaya 33:24.

  • “Bantu ya mono me solaka ta wa kiese kibeni sambu na kisalu ya maboko na bo.”Yezaya 65:22.

Inki mutindu bambikudulu yai ta lungana? Nzambi me tulaka Mwana na yandi, Yezu, Ntotila ya luyalu mosi ya mbote ya kele na zulu, yina ta yala ntoto. Biblia ke bingaka yo Kimfumu ya Nzambi. (Daniele 2:44) Biblia ke tubaka sambu na Yezu nde: “Nzambi ta pesa yandi kiti ya kimfumu . . . mpi yandi ta yala bonso Ntotila.”—Luka 1:32, 33.

Ntangu Yezu vandaka na ntoto, yandi salaka mambu mingi ya kuyituka sambu na kumonisa nde na Kimfumu na yandi, luzingu ya bantu ta vanda mbote kibeni.

YEZU MONISAKA MAMBU YA MBOTE YINA YANDI TA SADILA BANTU YA BULEMFU

  • Yezu belulaka maladi ya mitindu yonso mpi monisaka mutindu yandi ta belula bifu na nitu ya bantu.Matayo 9:35.

  • Yezu nganinaka mupepe mpi monisaka nde yandi kele ti ngolo ya kuluta bangolo ya lugangu sambu na kutanina bantu.Marko 4:36-39.

  • Yezu disaka bantu mingi mpi monisaka nde yandi ta sadisa bantu na kuvanda ti bima yina kele mfunu.Marko 6:41-44.

  • Na feti mosi ya makwela, Yezu kumisaka masa malafu mpi monisaka nde yandi ta sala na mpila nde bantu kusepela ti luzingu.Yoane 2:7-11.

Inki nge fwete sala sambu na kuzwa luzingu yina Nzambi ke kana kupesa bantu yina ke zolaka yandi? Nge fwete sala diambu mosi. Biblia ke tuba nde nge fwete landa “nzila yina . . . ke nataka na luzingu, mpi bantu fioti ke monaka yo.”—Matayo 7:14.

MUTINDU YA KUZWA NZILA YINA KE NATAKA NA LUZINGU YA MBOTE

Nzila yina ke nataka na luzingu kele nki? Nzambi ke tuba nde: “Mono, Yehowa, mono kele Nzambi na nge, Muntu yina ke longa nge sambu na mambote na nge mosi, Muntu yina ke twadisa nge na nzila yina nge fwete tambula.” (Yezaya 48:17) Kana nge landa ndongisila yai, luzingu na nge ta kuma mbote.

Yezu tubaka nde: “Mono kele nzila mpi kieleka mpi luzingu.” (Yoane 14:6) Kana beto ke kwikila mambu yina Yezu tubaka mpi ke landa mbandu na yandi, beto ta kwenda pene-pene na Nzambi mpi luzingu na beto ta kuma mbote.

 Inki mutindu nge lenda zwa nzila yina ke nataka na luzingu? Mabundu kele mingi, kansi Yezu tubaka nde: “Bantu yonso ve yina ke tubilaka mono nde, ‘Mfumu, Mfumu,’ ta kota na Kimfumu ya zulu, kansi muntu yina ke salaka luzolo ya Tata na mono yina kele na zulu, yandi mpamba muntu ta kota.” (Matayo 7:21) Yandi tubaka mpi nde: “Beno ta zaba bo na bambuma na bo.” (Matayo 7:16) Biblia lenda sadisa nge na kuzaba mbote dibundu ya kieleka.—Yoane 17:17.

Inki mutindu nge lenda landa nzila yina ke nataka na luzingu? Nge fwete longuka mambu ya me tala Muntu yina salaka beto: Yandi kele nani? Zina na yandi nani? Inki mutindu yandi kele? Inki yandi ke salaka sambu na beto? Yandi ke zolaka nde beto sala nki? *

Katula kusala kisalu, kudia mpi kuvanda ti dibuta, Nzambi ke zola nde bantu kusala mambu mingi ya nkaka. Beto lenda zaba Ngangi na beto mpi kukuma banduku na yandi. Beto ta monisa nde beto ke zolaka yandi kana beto ke sala luzolo na yandi. Yezu tubaka nde: “Luzingu ya mvula na mvula ke tendula nde, bo zaba nge, Nzambi mosi kaka ya kieleka.”—Yoane 17:3.

NZAMBI KE LONGA NGE “SAMBU NA MAMBOTE NA NGE MOSI” NA NZILA YA BIBLIA.—YEZAYA 48:17

DIAMBU YA NTETE YINA NGE FWETE SALA SAMBU NA KULANDA NZILA YINA KE NATAKA NA LUZINGU

Kana beto me zaba mambu yina Nzambi ke lomba beto, beto lenda sala bansoba na mambu ya nkaka na luzingu na beto. Yo lenda vanda mpasi na kusala yo. Kansi na kutuba ya masonga, beto ta kuma ti luzingu ya mbote kaka kana beto ke landa nzila yina ke nataka na luzingu. Sambu na kusadisa nge na kuzwa bamvutu na bangiufula ya mfunu ya me tala Nzambi, Bambangi ya Yehowa lenda longuka Biblia ti nge na ntangu mpi na kisika yina nge ta zola. Nge lenda kota na site Internet www.jw.org. sambu na kulomba kulonguka Biblia ti Bambangi ya Yehowa.