Kwenda na mambu ke na kati

Kwenda na tansi ya malongi

Mutindu Zola ya Nzambi Lenda Natila Nge Mambote

Mutindu Zola ya Nzambi Lenda Natila Nge Mambote

Nzambi me salaka nitu na beto ti makuki ya kitoko ya kudibelula. Kana muntu me lwala, to me kuluka, nitu “ke yantikaka kusala mambu mingi ya kuyituka sambu na kubelula bamputa ya nene mpi ya fioti.” (Johns Hopkins Medicine) Na mbala mosi, nitu ke salaka mambu yina ke salaka nde menga kubasika diaka ve mingi, ke kumisaka misisa yina ke lutisaka menga nene, ke fwaka mputa, mpi ke kumisaka mpusu ngolo.

TADILA DIAMBU YAI: Kana Ngangi salaka nitu na beto ti makuki ya kubelula bamputa, keti yo me fwana ve nde beto tula ntima na lusilu na yandi ya kubelula mpi bamputa yina beto ke vandaka ti yo na mawi? Muyimbi-bankunga sonikaka nde: “Yandi ke belulaka bantu yina kele na mawa; yandi ke sansaka bamputa na bo.” (Nkunga 147:3) Kana nge ke kudiyangisaka na mawi sambu na diambu mosi yina salamaka na ntangu ya ntama to yina me salama bubu yai, inki mutindu nge lenda ndima nde Yehowa ta sansa bamputa na nge bubu yai mpi na bilumbu ke kwisa?

MAMBU YINA BIBLIA KE LONGA BETO SAMBU NA ZOLA YA NZAMBI

Nzambi ke sila nde: “Kuwa boma ve, sambu mono kele ti nge. Kudiyangisa ve, sambu mono kele Nzambi na nge. Mono ta pesa nge kikesa, ee, mono ta sadisa nge.” (Yezaya 41:10) Muntu yina ke zabaka nde Yehowa ke zolaka yandi, ke vandaka na ngemba ya mabanza mpi kikesa ya kunwana ti bampasi ya mutindu na mutindu. Ntumwa Polo bingaka yo “ngemba ya Nzambi yina me luta mayele yonso ya kubakisa mambu.” Yandi yikaka nde: “Sambu na mambu yonso, mono kele ti ngolo na nzila ya muntu yina ke pesaka mono ngolo.”—Bafilipi 4:4-7, 9, 13.

Biblia ke sadisaka beto na kukumisa lukwikilu na beto ngolo na balusilu ya Yehowa sambu na bantu na bilumbu ke kwisa. Mu mbandu, Kusonga 21:4, 5 (yina kele na lutiti yina me landa) ke songa beto mambu yina Nzambi ta sala mpi sambu na nki beto fwete tula ntima nde yandi ta sala yo:

  • “Yandi ta kusula mansanga yonso na meso” ya bantu. Yehowa ta katula bampasi mpi basusi yonso, ata yina bantu ke monaka ya kukonda mfunu.

  • “Muntu yina me vanda na kiti ya kimfumu” na zulu, disongidila Ntotila Nkwa-Ngolo Yonso ya lugangu ya mvimba, ta sadila ngolo mpi kiyeka na yandi sambu na kukatula bampasi mpi kupesa beto lusadisu yina beto kele na yo mfunu.

  • Yehowa ke ndimisa beto nde balusilu na yandi kele “ya kwikama mpi ya kieleka.” Disongidila, yandi ke ndimisa beto nde sambu na zina mpi lukumu na yandi, yandi ta lungisa balusilu na yandi.

Bima ya Nzambi me salaka mpi Biblia ke monisaka kimuntu mpi bikalulu ya Tata na beto ya zulu. Ata lugangu ke sadisaka beto na kukuma banduku ya Nzambi, Biblia ke sadisaka beto na mutindu mosi ya pwelele, yo ke tuba nde: “Beno kwenda pene-pene na Nzambi, ebuna yandi ta kwisa pene-pene na beno.” (Yakobo 4:8) Bisalu 17:27 ke tuba nde: “Yandi kele ntama ve ti konso muntu na kati na beto.”

Kana nge longuka na kuzaba Nzambi, nge ta kuma kundima mpenza nde “yandi ke kudibanzaka sambu na” nge. (1 Piere 5:7) Inki mambote nge ta baka kana nge ke tudila Yehowa ntima?

Beto tadila mbandu ya Toru na Japon. Mama na yandi vandaka Mukristu, kansi Toru kudikotisaka na mambu ya mubulu ya yakuza, kimvuka mosi ya bantu ya ke salaka mubulu na Japon. Yandi ke tuba nde, “Mono vandaka kuyindula nde Nzambi vandaka kumenga mono, mpi nde yandi fwaka bantu yina vandaka kuzinga ti mono, mingi-mingi bantu yina mono vandaka kuzola mingi sambu na kupesa mono ndola.” Toru ke tuba nde na kimvuka yai ya mbi mpi ya nku, yandi kumaka “nku mpi ntima-mbi.” Sambu na balukanu ya nku yina Toru bakaka, yandi ke tuba nde, “Mono zolaka kufwa na kileke na nima ya kufwa muntu mosi yina zabanaka mingi kuluta mono mpi yo salaka nde mono zabana mingi.”

 Kansi, ntangu Toru ti nkento na yandi Hannah longukaka Biblia, Toru salaka bansoba ya ngolo na luzingu mpi na mutindu na yandi ya kutadila luzingu. Hannah ke tuba nde: “Mono monaka kibeni bansoba yina bakala na mono salaka.” Bubu yai, Toru ke ndima nde: “Kele ti Nzambi yina ke zolaka kibeni konso muntu na kati na beto. Yandi ke zolaka ve nde ata muntu mosi kufwa, mpi yandi ke lolulaka na ntima ya mvimba bantu yina ke balulaka ntima na masonga yonso na bifu na bo. Yandi ke tulaka dikebi na mambu yina beto lenda songa ve ata muntu mosi mpi yina ata muntu mosi ve lenda bakisa. Kubika fioti, Yehowa ta katula bampasi yonso. Ata bubu yai, yandi ke sadisaka beto na mitindu ya kuyituka kibeni. Yandi ke zolaka mpi ke sadisaka beto ntangu beto me lemba.”—Nkunga 136:23.

Mutindu mbandu ya Toru me monisa yo, kuzaba nde ntama mingi ve Nzambi ta katula bampasi mpi mansanga yonso na meso ya bantu, ke pesa beto kivuvu ya kieleka sambu na bilumbu ke kwisa mpi yo ke sadisa beto na kuzinga mbote bubu yai. Ee, ata na nsi-ntoto yai ya me fuluka ti bampasi, nge lenda baka mambote ya zola ya Nzambi.

“‘Yandi ta kusula mansanga yonso na meso na bo, lufwa ta vandaka diaka ve; mawa, bidilu, mpi mpasi ta vandaka diaka ve. Mambu ya ntama me vila.’ Ebuna Muntu yina me vanda na kiti ya kimfumu tubaka nde: ‘Tala! Mono ke sala bima yonso ya mpa.’ Yandi tubaka diaka nde: ‘Sonika, sambu mambu yai kele ya kwikama mpi ya kieleka.’”—Kusonga 21:4, 5.