Kwenda na mambu ke na kati

Kwenda na tansi ya malongi

“Beno kele na mfunu mingi.”—MATAYO 10:31

Keti Nzambi Ke Tudilaka Nge Dikebi?

Keti Nzambi Ke Tudilaka Nge Dikebi?

MAMBU YINA LUGANGU KE LONGA BETO

Ngunga ya ntete yina bebe ke butukaka, ke vandaka nsungi mosi ya mfunu yina bansoba mingi ke salamaka. Sambu na nki? Sambu kana mama kele kibeni pene-pene ya bebe na yandi na nsungi yai ya mfunu, yo ke sadisaka bebe yango na kuyela mbote. *

Inki ke pusaka mama na kukeba na zola yonso bebe yina me butuka? Longi mosi, Jeannette Crenshaw, ke tuba na mukanda mosi (The Journal of Perinatal Education) nde kumata ya ntalu ya kima mosi (hormone ocytocine) “yina ke salaka nde na nima ya kubuta mama kuzola bebe na yandi mingi na mutindu yandi ke simbaka yandi, ke talaka yandi mpi ke nwisaka yandi.” Kima ya nkaka (hormone) yina ke basikaka na ntangu yina “ke sadisaka mama na kulungisa bampusa ya bebe na yandi” mpi yo ke salaka nde yandi kangama ngolo ti bebe na yandi. Sambu na nki yo kele mfunu?

Yehowa Nzambi * mpi Ngangi na beto ya zola, muntu me salaka nde mama kukangama ngolo ti bebe na yandi. Ntotila Davidi tubaka nde Nzambi muntu basisaka yandi “na divumu” mpi salaka nde yandi kudiwa na lutaninu na maboko ya mama na yandi. Yandi sambaka nde: “Katuka ntangu yina mono butukaka, bo me pesaka mono na maboko na nge sambu nge keba mono; katuka na divumu ya mama na mono, nge kele Nzambi na mono.”—Nkunga 22:9, 10.

TADILA DIAMBU YAI: Kana Nzambi salaka mambu ya kuyituka mutindu yai yina ke salaka nde mama kukeba mbote-mbote bebe na yandi mpi kulungisa bampusa na yandi, keti yo me fwana ve na kutuba nde Nzambi ke tudilaka mpi konso muntu na kati na beto, disongidila “bana ya Nzambi,” dikebi?—Bisalu 17:29.

MAMBU YINA BIBLIA KE LONGA BETO SAMBU NA DIKEBI YINA NZAMBI KE TUDILAKA BETO

Yezu Kristu, yina zabaka Ngangi mbote kibeni kuluta bantu yonso, tubaka nde: “Keti bo ke tekaka ve tu-bandeke zole na mbongo mosi ya kibende ya mfunu mingi ve? Kansi ata mosi ve na kati na yo ta bwa na ntoto kukonda nde Tata na beno kuzaba yo. Kansi, ata nsuki ya ntu na beno, yandi ke tangaka yo yonso. Yo yina, beno wa boma ve; beno kele na mfunu mingi kuluta tu-bandeke mingi.”—Matayo 10:29-31.

Bantu fioti ke tudilaka bandeke yonso ya fioti dikebi mpi ke monaka ntangu mosi na kati na yo ke bwaka na ntoto. Kansi Tata na beto ya zulu ke tudilaka konso ndeke dikebi! Mpi bandeke, ata yo kele mingi, yo ke vandaka ve ata fioti mfunu kuluta muntu. Yo yina, dilongi kele pwelele: Beno fwete “wa boma ve” mpi beno fwete tuba ve nde Nzambi ke tudilaka beno ve dikebi. Kansi, yandi ke tudilaka beno dikebi ya mingi!

Nzambi ke sosaka kibeni mambote na beto mpi ke tudilaka beto dikebi na zola yonso

 Biblia ke ndimisa beto nde

  • “Meso ya Yehowa kele bisika yonso, yo ke talaka bantu ya mbi ti bantu ya mbote.”—BINGANA 15:3.

  • “Meso ya Yehowa ke talaka bantu ya lunungu, mpi makutu na yandi ke waka kudila na bo sambu na kulomba lusadisu.”—NKUNGA 34:15.

  • “Mono ta wa kiese mingi na zola na nge ya kwikama, sambu nge me mona mpasi na mono; nge me zaba mpasi na mono ya ngolo.”—NKUNGA 31:7.

“MONO VANDAKA KUYINDULA NDE YEHOWA VANDAKA KUZOLA MONO VE”

Keti kuzaba nde Nzambi ke sosaka kibeni mambote na beto mpi ke tudilaka beto dikebi na zola yonso lenda vanda kibeni ti bupusi na luzingu na beto? Ee, mutindu Hannah * na Angleterre ke tuba:

“Banda ntama, mono vandaka kuyindula nde Yehowa vandaka kuzola mono ve mpi nde yandi vandaka kuwa ve bisambu na mono. Mono yindulaka nde mambu vandaka kusalama mutindu yina sambu mono kondaka lukwikilu. Mono monaka nde Nzambi vandaka kupesa mono ndola mpi kutudila mono ve dikebi sambu mono vandaka mfunu ve. Mono yindulaka nde Nzambi vandaka ve kudiyangisa sambu na mono.”

Kansi, Hannah ke yindulaka diaka ve nde Yehowa ke tudilaka yandi ve dikebi mpi ke zolaka yandi ve. Inki sobaka mutindu na yandi ya kutadila mambu? Yandi ke tuba nde: “Mono yantikaka kusoba malembe-malembe. Mono ke yibuka diskure mosi yina salamaka bamvula mingi me luta; yo tubilaka kimenga ya Yezu mpi yo vandaka ti bupusi ya ngolo na luzingu na mono; yo sadisaka mono na kundima nde Yehowa ke zolaka mono. Mpi ntangu mono zwaka mvutu na bisambu na mono, mono dilaka mingi sambu mono bakisaka nde Yehowa ke zolaka mono mpenza. Diaka, kulonguka Biblia mpi kukwenda na balukutakanu ya Bukristu me longaka mono mambu mingi ya me tala Yehowa, kimuntu na yandi, mpi mutindu yandi ke tadilaka beto. Ntangu yai, mono ke monaka pwelele lusadisu mpi zola yina Yehowa ke monisilaka beto yonso mpi mpusa na yandi ya kutanina konso muntu.”

Mambu yina Hannah ke tuba ke pesa kikesa. Kansi, nki lenda sadisa nge na kundima nde Nzambi ke bakisaka nge mpi ke zabaka mutindu nge ke kudiwaka? Disolo yina ke landa ta pesa mvutu na ngiufula yai.

^ par. 3 Bamama ya nkaka yina ke kudiyangisaka na mabanza na nima ya kubuta ke vandaka na mpasi ya kukangama ti babebe na bo. Kansi, bo fwete kudipesa ve foti sambu na yo. Kimvuka mosi (Institut américain de la santé mentale) ke tuba nde bamama mingi ke kudiyangisaka na mabanza na nima ya kubuta “ziku sambu bansoba ke salamaka na nitu mpi na mawi, kansi ve sambu na kima mosi yina mama ke salaka to yina yandi ke salaka ve.” Sambu na kuzaba mambu mingi ya me tala diambu yai, tala disolo Comprendre la dépression postnatalena Telama! ya Kifalansa ya Yuni 8, 2003.

^ par. 5 Yehowa kele zina ya Nzambi mutindu Biblia ke zabisaka beto.—Nkunga 83:18.

^ par. 15 Beto me soba bazina ya nkaka na masolo yai.