Kwenda na mambu ke na kati

Kwenda na tansi ya malongi

Keti Nzambi Ke Kuditulaka na Kisika na Beto?

Keti Nzambi Ke Kuditulaka na Kisika na Beto?

MAMBU YINA LUGANGU KE LONGA BETO

Kuditula na kisika ya muntu ke tendula “kuwa mpasi yina yandi ke wa to kuyindula mutindu mambu zolaka kuvanda kana nge muntu kutanaka ti mambu yina.” Rick Hanson, munganga mosi ya ke longukaka maladi ya ntu, ke tuba nde “beto ke butukaka ti kikalulu ya kuditula na kisika ya bantu ya nkaka.”

TADILA DIAMBU YAI: Sambu na nki beto ke vandaka ti kikalulu ya kuditula na kisika ya bantu ya nkaka, kikalulu yina bigangwa ya nkaka ke vandaka ve ti yo? Biblia ke tuba nde Nzambi me salaka bantu na kifwani na yandi. (Kuyantika 1:26) Nzambi me salaka beto na kifwani na yandi sambu beto lenda monisa kimuntu mpi bikalulu na yandi mingi ya mbote. Yo yina, ntangu kikalulu ya kuditula na kisika ya bantu ya nkaka ke pusaka bantu na kusadisa bantu ya nkaka, bo ke landaka kikalulu ya Ngangi na bo ya mawa, Yehowa Nzambi.—Bingana 14:31.

MAMBU YINA BIBLIA KE LONGA BETO SAMBU NA KIKALULU YA NZAMBI YA KUDITULA NA KISIKA YA BANTU

Nzambi ke kuditulaka na kisika na beto mpi yandi ke zolaka ve nde beto mona mpasi. Sambu na bantu ya Izraele ya ntama yina kangaka ntima na kimpika ya ngolo na Ezipte, mpi na bampasi ya bamvula 40 na ntoto ya zelo na zelo, Biblia ke tuba nde: “Na ntangu yonso yina bo vandaka kumona mpasi, yo vandaka kupesa yandi mpasi.” (Yezaya 63:9) Zaba nde Nzambi vandaka kaka ve kuzaba bampasi na bo. Yandi vandaka kuwa mpasi yina bo vandaka kuwa. Yandi tubaka nde: “Mono me zaba mbote bampasi yina bo ke mona.” (Kubasika 3:7) Nzambi ke tuba nde: “Muntu yina ke simba beno ke simba mbuma ya disu na mono.” (Zekaria 2:8) Ntangu bantu ya nkaka ke pesaka beto mpasi, yandi ke waka mpasi yina beto ke waka.

Biblia ke ndimisa beto nde ata beto lenda kudibedisa mpi kumona nde yo me fwana ve nde Nzambi kuditula na kisika na beto, “Nzambi kele nene kuluta bantima na beto mpi yandi me zaba mambu yonso.” (1 Yoane 3:19, 20) Nzambi ke zabaka beto mbote kuluta beto mosi. Yandi ke zabaka kibeni mambu na beto yonso, bangindu na beto mpi mutindu beto ke kudiwaka. Yandi ke kuditulaka na kisika na beto.

Beto lenda sosa kikesa, mayele mpi lusadisu na Nzambi sambu beto me zaba nde yandi ke sadisaka bantu yina kele na mpasi

 Biblia ke ndimisa beto nde

  • “Nge ta binga, mpi Yehowa ta ndima; nge ta dila sambu na kulomba lusadisu, mpi yandi ta tuba nde, ‘Mono yandi yai!’”—YEZAYA 58:9.

  • “‘Sambu mono me zaba mbote bangindu yina mono ke yindula sambu na beno,’ Yehowa muntu me tuba, ‘bangindu ya ngemba, kansi ya mpasi ve, sambu na kupesa beno makwisa mpi kivuvu. Beno ta binga mono, beno ta kwisa, mpi beno ta samba mono, ebuna mono ta wa beno.’”—YEREMIA 29:11, 12.

  • “Baka mansanga na mono na dibungu na nge ya mpusu ya mbisi. Keti bo me sonikaka yo ve na mukanda na nge?”—NKUNGA 56:8.

NZAMBI KE TUDILAKA BETO DIKEBI, KE BAKISAKA MPI KE WILAKA BETO MAWA

Keti kuzaba nde Nzambi ke kuditulaka na kisika na beto lenda sadisa beto na kununga bampasi? Beto tadila mambu yina Maria kutanaka ti yo; yandi ke tuba nde:

“Mono monaka nde luzingu vandaka mpasi kibeni mpi ya kukonda lunungu ntangu mono kutanaka ti mpasi ya ngolo ntangu mwana na mono ya bakala ya bamvula 18 fwaka; yandi belaka maladi ya kansere bamvula zole. Mono wilaka Yehowa makasi sambu yandi sadisaka ve mwana na mono mpi belulaka yandi ve!

“Bamvula sambanu na nima, nduku mosi ya zola mpi ya mawa na dibundu waka ntangu mono vandaka kutuba nde Yehowa ke zolaka mono ve. Na nima ya kuwidikila mono kukonda kuzenga mono ndinga, yandi tangaka verse mosi yina simbaka ntima na mono. Verse yango kele 1 Yoane 3:19, 20 yina ke tuba nde: ‘Nzambi kele nene kuluta bantima na beto mpi yandi me zaba mambu yonso.’ Yandi tubaka nde Yehowa ke bakisaka bampasi na beto.

“Ata mpidina, yo vandaka mpasi sambu mono yambula kuwila Nzambi makasi! Na nima, mono tangaka Nkunga 94:19 yina ke tuba nde: ‘Ntangu basusi lutilaka mono, nge pesaka mono kikesa mpi nge lembikaka mono.’ Mono monaka bonso nde bo sonikaka baverse yai sambu na mono! Nsuka-nsuka, yo pesaka mono kikesa kibeni ya kusonga Yehowa bampasi na mono, sambu mono zabaka nde yandi ke waka mpi ke bakisaka mono.”

Kuzaba nde Yehowa ke bakisaka beto mpi ke wilaka beto mawa ke pesaka kikesa kibeni! Kansi, sambu na nki bampasi kele mingi? Keti yo kele sambu Nzambi ke pesaka beto ndola sambu na mambu ya mbi? Keti Nzambi ta katula bampasi yonso? Masolo yai ke landa ta pesa mvutu na bangiufula yai.