Bantu yonso ke ndimaka nde kele ti mambu ya mbote mpenza to mambu ya mbi. Mu mbandu kufwa muntu kukonda kikuma, kuvukisa nitu na kingolongolo mpi kubebisa bana na mambu ya kuvukisa nitu kele mambu yina bantu yonso ke teleminaka. Mpi bantu yonso ke sepelaka ti bikalulu mu mbandu mawete, kuditula na kisika ya bantu ya nkaka mpi kusala mambu ya mbote. Kansi na mambu ya me tala kuvukisa nitu, kutuba masonga to kusansa bana, bantu mingi ke yindulaka nde kele ve ti mutindu ya mbote to ya mbi ya kusala yo. Bo ke yindulaka nde bo fwete sala yo na konso mutindu yina. Mbala mingi bantu ke bakaka badesizio na kulanda bangindu na bo to na kulanda bangindu ya bantu yina ke zingaka pene-pene ti bo. Keti yo ke vandaka ntangu yonso ngindu ya mbote?

Mbala mingi beto ke bakaka balukanu na kulanda bangindu na beto to na kulanda mambu yina beto ke yindulaka nde yo kele mbote to mbi, yina bantu mingi ke bingaka nde kansansa. (Baroma 2:14, 15) Nkutu ata bana ya fioti ke zabaka mambu ya kele mbote to mbi mpi bo ke kudiyangisaka kana bo me sala kima mosi ya mbi. Ntangu beto ke yelaka, beto ke zabaka mambu ya mbote mpi ya mbi na bantu ya dibuta na beto, banduku na beto, balongi na beto, dibundu to bantu ya ke zingaka kisika mosi ti beto. Ntangu beto ke bakaka badesizio, kansansa na beto ke songaka beto kana yo me wakana ti mambu yina beto ke zabaka nde yo kele mbote to mbi.

Kansansa na beto lenda pusa beto na kuditula na kisika ya bantu ya nkaka, na kumonisa ntonda, na kusala mambu ya mbote mpi kuwila bantu ya nkaka mawa. Yo lenda kanga beto mpi nzila ya kusala mambu yina lenda pesa bantu ya nkaka mpasi to mambu yina lenda sala nde beto wa nsoni, bo seka beto mpi beto kuma kudiyangisa.

Keti beto fwete baka balukanu na kulanda ntangu yonso bangindu na beto? Ntangu Garrick vandaka leke, yandi vandaka kutuba nde: “Mono lenda sala mambu yonso ya me zola.” Kansi yandi bakisaka nde kusala mambu yina yandi ke mona mbote na meso na yandi natilaka yandi ve mambote. Yandi tubaka nde yandi “vandaka ve na kiese na luzingu sambu yandi vandaka kusala mansoni, yandi vandaka kusadila drogue, kulawuka malafu mpi kusala mubulu mingi.”

Katula mutindu beto ke kudiwa, mbala mingi beto ke bakaka balukanu na kulanda mambu yina bantu ta tuba sambu na balukanu yango. Yo ke sadisaka beto na kubaka mambote na eksiperiansi mpi mayele na bo. Kana beto ke sala mambu yina dibuta, banduku mpi bantu ya beto ke zingaka ti bo ke monaka nde yo ke mbote, bo ta kuma kuzitisa beto mingi.

Keti beto fwete baka balukanu na kulanda ntangu yonso bangindu ya bantu ya nkaka? Ntangu Priscila vandaka leke, yandi vandaka kusala mambu yina banduku na yandi vandaka kusala mpi yantikaka kuvukisa nitu na ntwala ya kukwela. Kansi ata bantu ya nkaka vandaka kutuba nde mambu yina vandaka ve mbi, yandi mosi vandaka ve na kiese. Yandi ke tuba nde: “Kusala mambu yina bantu yonso vandaka kusala pesaka mono ve kiese. Yo pusaka mono na kusala mambu yina vandaka mpenza mbi mpi kigonsa sambu na mono.”

Ntangu beto ke sosa kuzaba mambu ya mbote mpi ya mbi, bangindu na beto mpi mambu yina bantu ya nkaka ke tuba ke vandaka mfunu. Kansi mambu yai yo mosi ke salaka ve nde beto baka ntangu yonso balukanu ya mbote. Beto lenda kudipesa mpasi to kupesa bantu ya nkaka mpasi sambu beto ke mona ve malanda yina balukanu ya beto me baka ta natila beto. (Bingana 14:12) Nkutu ata beto mosi to bantu ya nkaka ke mona nde kima mosi kele mbote, yo lenda vanda kigonsa mpi yo lenda lomba nde beto soba bangindu na beto. Sambu mambu ya nkaka ya bantu vandaka kumona ntete mbi, bubu bo ke monaka yo diaka ve mbi mpi mambu ya nkaka ya bantu vandaka kumona mbote, bubu bo ke monaka yo mbi.

Keti kele ti kima ya kuluta mbote ya lenda sadisa beto na kuzaba mambu ya mbote mpi ya mbi? Keti kele ti minsiku ya beto lenda landa bubu yai yina ta sala ve nde beto kuma na mpasi na bilumbu ke kwisa?

Kima ya ke pesa kiese kele nde, kele ti mukanda ya lenda twadisa beto mpi ya beto lenda tudila ntima. Yo ke sadisaka bantu yonso na ntoto ya mvimba. Disolo ya ke landa ta tubila na wapi beto lenda zwa minsiku yina ta sadisa beto na kuzaba mambu ya mbote mpi ya mbi.