Kwenda na mambu ke na kati

Kwenda na tansi ya malongi

Nzambi Ta Sala Nki?

Nzambi Ta Sala Nki?

Ya kieleka, kana nge kele na mpasi, nge ta zola nde nduku mosi ya mbote kusadisa nge. Bantu ya nkaka ke tubaka nde Nzambi kele ve nduku ya mbote sambu bo ke yindulaka nde yandi ke salaka ve ata kima sambu na kusadisa bo. Ya kieleka, Nzambi me salaka dezia mambu mingi sambu na beto mpi yandi ta sala diaka mambu ya nkaka sambu na kukatula bampasi yina beto ke kutana ti yo bubu yai. Nzambi ta sala nki?

NZAMBI TA MANISA MAMBU YONSO YA MBI

Nzambi ta manisa mambu yonso ya mbi; yandi ta fwa muntu yina kele na kisina na yo. Biblia ke tubila muntu yango, yo ke tuba nde: “Nsi-ntoto ya mvimba kele na nsi ya kiyeka ya muntu ya mbi.” (1 Yoane 5:19) ‘Muntu yina ya mbi’ kele Satana Diabulu yina Yezu bingaka “mfumu ya nsi-ntoto yai.” (Yoane 12:31) Bupusi yina Satana kele na yo na nsi-ntoto kele na kisina ya bampasi yina kele na ntoto. Inki Nzambi ta sala?

Kubika fioti, Yehowa Nzambi ta sadila Mwana na yandi, Yezu Kristu, sambu na kufwa “muntu yina kele ti ngolo ya kufwa, disongidila, Diabulu.” (Baebreo 2:14; 1 Yoane 3:8) Ya kieleka, Biblia ke tuba nde Diabulu me zaba nde “yandi kele ti ntangu fioti” na ntwala nde bo fwa yandi. (Kusonga 12:12) Nzambi ta fwa mpi bantu yonso yina ke salaka mambu ya mbi.​—Nkunga 37:9; Bingana 2:22.

NZAMBI TA KUMISA NTOTO PALADISU

Ntangu Ngangi na beto ta katula mambu yonso ya mbi na ntoto, yandi ta sala mambu sambu na kulungisa lukanu na yandi sambu bantu kuzinga mvula na mvula awa na ntoto. Inki ta salama?

Ngemba mpi lutaninu ya kukonda nsuka. Biblia ke tuba nde: “Bantu ya kudikulumusa ta baka ntoto, mpi bo ta wa kiese mingi kibeni na ngemba ya mingi.”​—Nkunga 37:11.

Madia ya mbote mpi ya mingi. Biblia ke tuba nde: “Mbuma ta vanda mingi kibeni na ntoto; yo ta fuluka na nsongi ya bangumba.”—Nkunga 72:16.

Banzo ya kitoko mpi kisalu ya mbote. Biblia ke tuba nde: “Bo ta tunga banzo mpi ta zinga muna, bo ta kuna bilanga ya vinu mpi ta dia mbuma na yo. . . . Bantu ya mono me solaka ta wa kiese kibeni sambu na kisalu ya maboko na bo.”—Yezaya 65:21, 22.

Keti nge ke vandaka ti nzala ya kumona mutindu mambu yai ta lungana? Kubika fioti, bantu yonso ta monaka mambu yai konso kilumbu.

NZAMBI TA KATULA MALADI MPI LUFWA

Bubu yai, bantu yonso ke belaka mpi ke fwaka, kansi mambu yai ta salamaka diaka ve. Kubika fioti, Nzambi ta sadila mambote ya kimenga ya Yezu sambu “konso muntu yina ke monisa lukwikilu na Mwana kufwa ve kansi kubaka luzingu ya mvula na mvula.” (Yoane 3:16) Inki ta salama?

Maladi ta vanda diaka ve. Biblia ke tuba nde: “Ata muntu mosi ve ya ke zingaka na insi ta tuba nde: ‘Mono ke bela.’ Bantu yina ke zinga na insi yina, bo ta lolula kifu na bo.”—Yezaya 33:24.

Lufwa ta niokulaka diaka ve bantu. Biblia ke tuba nde: “Yandi ta mina lufwa kimakulu, mpi Yehowa Mfumu ya Kuluta Nene ta kusula mansanga na baluse yonso.”—Yezaya.”​—Isaiah 25:8.

Bantu ta zinga mvula na mvula. Biblia ke tuba nde: “Dikabu yina Nzambi ke pesaka kele luzingu ya mvula na mvula na nzila ya Mfumu na beto Kristu Yezu.”—Baroma 6:23.

Bantu yina me fwaka ta futumuka. Biblia ke tuba nde: “Bantu ya lunungu ti bantu ya kukonda lunungu ta futumuka.” (Bisalu 24:15) Dikabu ya Nzambi ya kimenga ya Yezu ta natila bafwa mambote.

Inki mutindu Nzambi ta lungisa mambu yai yonso?

 NZAMBI TA TULA KIMFUMU MOSI YA KUKUKA

Nzambi ta lungisa lukanu na yandi sambu na bantu mpi sambu na ntoto na nzila ya kimfumu ya zulu, yina Yezu Kristu kele Ntotila ya yandi me tulaka. (Nkunga 110:1, 2) Yezu songaka balongoki na yandi na kusamba mutindu yai sambu na kimfumu yango: “Tata na beto yina kele na zulu, . . . Kimfumu na nge kukwisa.”—Matayo 6:9, 10.

Kimfumu ya Nzambi ta yala ntoto mpi yo ta katula bampasi yonso ya kele na zulu ya ntoto. Kimfumu yai kele kibeni luyalu ya kuluta mbote sambu na bantu! Yo yina, Yezu kudipesaka na kuzabisa ‘nsangu ya mbote ya Kimfumu’ ntangu yandi vandaka kusala kisalu ya kulonga na ntoto mpi yandi songaka balongoki na yandi na kusala mutindu mosi.—Matayo 4:23; 24:14.

Na nsadisa ya zola na yandi ya mingi sambu na bantu, Yehowa Nzambi me sila na kusala mambu yai yonso ya kitoko sambu na bo. Keti mambu yai ke pusa nge ve na kusosa kuzaba yandi mpi na kukuma nduku na yandi? Inki mambote nge ta baka kana nge sala mutindu yai? Disolo ya ke landa ta pesa mvutu.

NZAMBI TA SALA NKI? Nzambi ta katula maladi mpi lufwa, yandi ta sala nde bantu kuzinga na bumosi na nsi ya luyalu ya Kimfumu na yandi, mpi yandi ta kumisa ntoto paladisu