Kwenda na mambu ke na kati

Kwenda na tansi ya malongi

 BIBLIA KE SOBAKA LUZINGU YA BANTU

Sadisa Mono na Kuzinga Ata Mvula Mosi Mpamba na Ngemba mpi na Kiese

Sadisa Mono na Kuzinga Ata Mvula Mosi Mpamba na Ngemba mpi na Kiese
  • MVULA YINA YANDI BUTUKAKA: 1971

  • NSI: FRANCE

  • LUZINGU NA YANDI YA NTAMA: YANDI VANDAKA KUSALA MUBULU, MANSONI, MPI KUSADILA BIMA YA KE LAWUSAKA

MUTINDU MONO VANDAKA:

Dibuta na mono vandaka kuzinga na Tellancourt, bwala mosi na nordi-esti ya France. Papa vandaka muntu ya France, kansi mama vandaka muntu ya Italie. Ntangu mono vandaka ti bamvula nana, beto kwendaka kuzinga na bwala mosi pene-pene ya mbanza ya Rome, na Italie. Bantu mingi ya bwala yina vandaka bansukami mpi vandaka kusala kisalu ya maboko. Kuna, dibuta na beto kumaka kuniokwama. Bibuti na mono vandaka kuswana ngolo sambu na mpasi ya mbongo.

Ntangu mono kumaka ti bamvula 15, mama siamisaka mono na kusosa banduku. Yo yina, mono yantikaka kulutisa ntangu mingi ti banduku na mono. Na nima, mono kumaka ti banduku ya mbi. Kilumbu mosi, muntu mosi yina vandaka kumonana bonso muntu ya mawete kwisaka pene-pene na mono. Yandi pesaka mono bima ya ke lawusaka, mpi mono bakaka yo sambu na kumonisa nde mono me kuma mbuta. Na nima, mono kumaka kusadila bima ya ke lawusaka mpi kusala mansoni. Mbala mingi bantu vandaka kuvukisa nitu ti mono na kingolo-ngolo. Mono vandaka kumona diaka ve mfunu ya luzingu. Sambu na mono, luzingu to lufwa vandaka diaka ve na mfunu. Mono vandaka kudiwa mono mosi. Ntangu mono kumaka ti bamvula 16, mono nwaka mulangi ya wiski mpi kwendaka kudilosa na dizanga ya masa sambu na kudifwa. Mono salaka bilumbu tatu mono ke kudizaba diaka ve.

Mono kumaka kusakana ti luzingu, mpi mono kumaka muntu ya nku mpi ya luvunu. Mono vandaka kulomba bantu na kuvukisa nitu ti bo. Na nima, mono vandaka kulawusa bo mpi kuyiba bo bima yonso ya mfunu ya bo vandaka na yo. Bimvuka ya bantu ya nku vandaka kusadila mono sambu na kukwenda kuteka bima ya ke lawusaka na kinsweki. Bapolisi vandaka kukanga mono mbala na mbala. Yo vandaka kumonana bonso nde luzingu na mono kele ve na lukanu mpi nde mono ke kuka ve kuyala yo. Ata mpidina, mono vandaka kukwikila mpenza nde luzingu na mono fwete vanda ti lukanu. Mono sambaka Nzambi sambu yandi sadisa mono na kuzinga ata mvula mosi mpamba na ngemba mpi na kiese.

MUTINDU BIBLIA SOBAKA LUZINGU NA MONO:

Ntangu mono kumaka ti bamvula 24, mono bakaka lukanu ya kukwenda na Angleterre. Luzingu na mono kumaka na kigonsa sambu na bisalu ya mono vandaka kusala ti bantu ya ke tekaka bima ya ke lawusaka. Kansi na ntwala ya kukwenda na Angleterre, mono kwendaka kutala mama mpi mono yitukaka na kumona muntu mosi ke longa yandi Biblia.  Zina ya muntu yango Annunziato Lugarà. * Sambu mono zabaka mambu ya nku ya muntu yai vandaka kusala, mono waka boma mpi mono yulaka yandi kikuma yina yandi kwisaka na nzo ya mama. Yandi zabisaka mono bansoba ya nene yina yandi salaka na luzingu sambu na kukuma Mbangi ya Yehowa, mpi yandi lombaka mono na kusolula ti Bambangi ya Yehowa ntangu mono ta kuma na Angleterre. Mono ndimaka na kusala mutindu yandi tubaka. Kansi, ntangu mono kumaka kuna, mono vutukilaka luzingu na mono ya ntama.

Kilumbu mosi, mono monaka Mbangi ya Yehowa mosi ke kabula Nzozulu ya Nkengi mpi Réveillez-vous ! na bala-bala mosi ya nene ya Londres. Mono yibukaka mambu yina Annunziato songaka mono na kusala, yo yina mono lombaka Mbangi yango kana yandi lenda longuka Biblia ti mono.

Mambu yina mono longukaka na Biblia yitukisaka mono mpenza. Mu mbandu, mambu ya kele na 1 Yoane 1:9 simbaka ntima na mono. Verse yango ke tuba sambu na Nzambi nde: “Kana beto funguna masumu na beto, yandi kele ya kwikama mpi ya lunungu yo yina yandi ta lolula masumu na beto mpi ta katula mambu na beto yonso ya kukonda lunungu.” Verse yango vandaka na bupusi ya ngolo na luzingu na mono sambu mono vandaka kudimona mpenza mvindu na mambu yina mono vandaka kusala na luzingu. Na mbala mosi, mono yantikaka kukwenda na balukutakanu na Nzo ya Kimfumu ya Bambangi ya Yehowa. Bambangi yambaka mono na kiese yonso. Ntangu mono monaka bangwisana ya ngolo yina bo ke vandaka na yo, mono sosaka kukota na dibundu na bo sambu bo vandaka bonso dibuta. Yo kele kima ya mono vandaka kusosa banda ntama.

Ata yo vandaka ve mpasi sambu mono bika bima ya ke lawusaka mpi luzingu ya mansoni, kusoba bikalulu na mono ya nkaka vandaka mpasi mingi. Mono bakisaka nde mono fwete sadila bantu mambu na luzitu mpi na mawete. Nkutu tii bubu yai, mono ke nwanaka ti bikalulu ya nkaka ya mbi. Kansi, Yehowa me sadisaka mono na kuyela na kimpeve. Na nima ya kulonguka Biblia bangonda sambanu, mono bakaka mbotika na 1997 mpi kumaka Mbangi ya Yehowa.

MAMBOTE YA MONO ME BAKAKA:

Na nima ya kubaka mbotika, mono kwelaka Barbara, mwana-nkento mosi yina katukaka mpi kukuma Mbangi ya Yehowa. Ntangu nduku na mono mosi ya ntama monaka mutindu mono sobaka, yandi yantikaka kulonguka Biblia. Na nima, yandi ti mpangi na yandi ya nkento kumaka Bambangi ya Yehowa. Diaka, mbuta ya nkaka na mono ya nkento yina vandaka ti bamvula kuluta 80 yantikaka kulonguka Biblia mpi bakaka mbotika na ntwala nde yandi fwa.

Bubu yai mono kele nkuluntu na dibundu mpi mono ti nkento na mono ke salaka bangunga kiteso ya 70 na kisalu ya kusamuna. Beto ke longaka Biblia na bantu ya ke tubaka Italien na Londres. Bantangu ya nkaka, mono ke lembaka nitu ntangu mono ke yindulaka luzingu na mono ya ntama, kansi Barbara ke sadisaka mono mingi. Dibuta na mono kele na kiese, kima ya mono vandaka kusosa ntangu yonso. Mono me kumaka ti Tata ya zola yina mono vandaka kusosa banda ntama. Mono sambaka Nzambi sambu yandi sadisa mono na kuzinga ata mvula mosi mpamba na ngemba mpi na kiese, kansi yandi me pesaka mono mingi kuluta!

Dibuta na mono kele na kiese, kima ya mono vandaka kuzola ntangu yonso. Mono me kumaka ti Tata ya zola yina mono vandaka kusosa banda ntama

^ par. 10 Tala disolo “Biblia Ke Sobaka Luzingu ya Bantu​—Mono Vandaka Kutambula ti Munduki na Mono Konso Kisika,” ya Annunziato Lugarà, na Nzozulu ya Nkengi ya Yuli 1, 2014, balutiti 8-9.