Kwenda na mambu ke na kati

Kwenda na tansi ya malongi

Yehowa Ke Sadisaka Beto na Bampasi na Beto Yonso

Yehowa Ke Sadisaka Beto na Bampasi na Beto Yonso

“Nzambi yina ke lembikaka bantu yonso . . . ke lembikaka beto na bampasi na beto yonso.”—2 BAKORINTO 1:3, 4.

BANKUNGA: 33, 41

1, 2. Inki mutindu Yehowa ke sadisaka beto na ntangu ya mpasi, mpi nki lusilu kele na Ndinga na yandi?

LEKE mosi ya bakala yina me kwelaka ntete ve vandaka kuyindula mingi 1 Bakorinto 7:28, yina ke tuba nde bantu yina ke kwela “ta kutana ti bampasi na nitu na bo.” Leke yai yulaka nkuluntu mosi ya me kwelaka nde: “Inki kele ‘bampasi’ yango mpi kana mono me kwela, nki mutindu mono lenda nunga yo?” Na ntwala ya kupesa mvutu, nkuluntu songaka yandi na kuyindula mambu yai ya nkaka ya ntumwa Polo sonikaka: Yehowa kele “Nzambi yina ke lembikaka bantu yonso; yandi ke lembikaka beto na bampasi [to na mimekamu] na beto yonso.”—2 Bakorinto 1:3, 4.

2 Beto ke zaba nde Yehowa, Tata na beto ke zolaka beto mpi ke sadisaka beto na ntangu ya mpasi. Ziku nge ke yibuka bantangu yina Yehowa sadisaka mpi twadisaka nge na nsadisa ya Ndinga na yandi. Beto ke ndima nde yandi ta sadila beto mambu ya mbote mutindu yandi sadilaka bansadi na yandi ya ntangu ya ntama.—Tanga Yeremia 29:11, 12.

3. Inki bangiufula beto ta tadila na disolo yai?

 3 Mbala mingi yo ke vandaka pete na kukanga ntima na bampasi kana beto me zaba kisina na yo. Yo yina, nki ke salaka nde bankwelani mpi mabuta kukutana ti bampasi? Inki bambandu ya ntangu ya ntama mpi ya bilumbu na beto lenda pesa beto kikesa? Beto tadila bangiufula yai, yo lenda sadisa beto na kukanga ntima na bampasi.

BAMPASI NA MAKWELA

4, 5. Inki bampasi bankwelani lenda kutana ti yo?

4 Ntangu Yehowa gangaka nkento ya ntete, yandi nataka yandi na bakala mpi bo kumaka bankwelani. Na nima Yehowa tubaka nde: “Bakala ta bikisa tata na yandi ti mama na yandi mpi yandi ta kangama ti nkento na yandi, ebuna bo ta kuma nsuni mosi.” (Kuyantika 2:24) Kansi, bubu yai beto yonso kele bantu ya kukonda kukuka. (Baroma 3:23) Yo yina, ntangu bantu me kwelana, bo lenda kutana ti bampasi. Mu mbandu, na ntwala ya kukwela, nkento vandaka kulemfukila bibuti na yandi. Kansi Ndinga ya Nzambi ke tuba nde bakala kele mfumu ya nkento na yandi. (1 Bakorinto 11:3) Na luyantiku, yo lenda vanda mpasi sambu bakala kuyala nkento na yandi. Yo lenda vanda mpasi mpi sambu nkento kulemfukila bakala mutindu yandi vandaka kulemfukila bibuti na yandi. Diaka, ntangu bantu me kwelana, mavwanga lenda basika na kati na bo ti bantu ya mabuta na bo, mambu yai lenda natila bo mpi bampasi.

5 Yindula mpi mutindu bakala ti nkento ke kudiwaka ntangu bo ke bakisa nde ntama mingi ve bo ta buta mwana. Bo ke waka kiese, kansi bo lenda kudiyangisa mpi mingi. Mu mbandu, bo lenda kudiyangisa sambu na sante ya nkento mpi ya mwana yina kele na divumu. Bo ke zabaka mpi nde bo fwete sumba bima mingi. Ntangu mwana ke butuka, luzingu ya bankwelani ke sobaka. Mama ke kumaka kulutisa ntangu mingi ti bebe sambu na kutanina yandi. Kinduku ya bakala ti nkento ke vandaka diaka ve mutindu yo vandaka ntete. Tata ke kumaka ti mambu mingi ya kusala. Yandi ke salaka bikesa sambu na kulungisa bampusa ya nkento ti ya mwana.

6-8. Inki mutindu bankwelani ke kudiwaka kana bo ke buta ve?

6 Mpasi ya bankwelani ya nkaka kele kukonda kubuta. Kana nkento ke buta ve, yo ke pesaka yandi mpasi mingi. (Bingana 13:12) Na ntangu ya ntama, yo vandaka mfunu nde bankento kukwela mpi kubuta. Yo yina Rashele, nkento ya Yakobi vandaka kudiyangisa mingi sambu yandi vandaka ve kubuta ata mpangi na yandi vandaka kubuta. (Kuyantika 30:1, 2) Na bansi ya nkaka, bantu mingi ke zolaka kubuta bana mingi. Na bansi ya mutindu yina, bantu mingi ke yulaka bamisionere sambu na nki bo ke butaka ve. Ata bamisionere kutendudila bo mbote-mbote, bankaka ke tubaka nde, “Beto ta samba sambu Nzambi kupesa beno bana!”

7 Beto tubila mbandu ya mpangi-nkento mosi na Angleterre yina vandaka kibeni na mfunu ya kubuta. Ntangu yandi bakisaka nde yandi kele mukobo, yandi kudiyangisaka mingi. Na nima yandi ti bakala na yandi kumaka kusansa mwana ya muntu ya nkaka. Ata mpidina, mpangi-nkento vandaka kaka kudiyangisa bantangu ya nkaka. Yandi ke tuba nde: “Mono zabaka nde kusansa mwana ya muntu kele ve kiteso mosi ti kusansa mwana na mono mosi.”

8 Biblia ke tuba nde “bo ta tanina” nkento na “nzila ya kubuta.” (1 Timoteo 2:15)  Yo ke tendula ve nde nkento ta baka luzingu ya mvula na mvula kaka sambu yandi butaka bana. Kansi nki verse yai ke zola kutuba? Nkento yina me butaka ke lutisaka ntangu mingi na kuyidika bana ti nzo na yandi, yandi ke vandaka ve ti ntangu ya kutonga to kudikotisa na mambu yina me tala yandi ve. (1 Timoteo 5:13) Ata mpidina, yandi lenda kutana ti bampasi na makwela mpi na dibuta na yandi.

Kana nkwelani na nge me fwa, nki lenda pesa nge kikesa? (Tala baparagrafe 9, 12)

9. Inki mpasi ya nkaka bankwelani lenda kutana ti yo?

9 Mpasi ya nkaka na makwela kele lufwa ya nkwelani. Bankwelani lenda yindula nde mambu ya mutindu yai lenda kumina bo ve, ata mpidina bankwelani mingi me bikalaka mifwidi. Bambangi ya Yehowa ke kwikilaka ngolo na lufutumuku mpi yo ke pesaka bo kikesa mingi. (Yoane 5:28, 29) Na Ndinga na yandi, Yehowa, Tata na beto me silaka mambu mingi yina ke pesaka beto kikesa ya kukanga ntima. Beto tadila mutindu bansadi ya Yehowa ya nkaka me bakaka kikesa na balusilu yai mpi mutindu yo sadisaka bo.

KIKESA YINA BETO KE BAKAKA NA NTANGU YA MPASI

10. Inki pesaka Ana kikesa? (Tala kifwanisu ya luyantiku ya disolo.)

10 Beto tadila mambu yina kuminaka Ana, nkento ya Elkana, yina yandi vandaka kuzola mingi. Mbanda na yandi Penina butaka bana mingi. (Tanga 1 Samuele 1:4-7.) Kima ya mpasi mingi kele nde Penina vandaka kuseka Ana “konso mvula” sambu yandi vandaka ve kubuta. Inki pesaka Ana kikesa? Yandi sambaka Yehowa. Nkutu yandi kwendaka tii na kisika yina bantu vandaka kusambila Yehowa mpi yandi salaka kisambu ya nda. Yandi lombaka Yehowa na kupesa yandi mwana-bakala mpi ndimaka nde Yehowa ta sadisa yandi. Na nima ya kusamba, Ana kudiwaka mbote mpi “luse na yandi vandaka diaka ve mawa-mawa.” (1 Samuele 1:12, 17, 18) Ana zabaka nde Yehowa ta sadisa yandi disongidila, Yehowa ta pesa yandi mwana to kupesa yandi kikesa na mutindu ya nkaka.

11. Inki mutindu kisambu lenda pesa beto kikesa?

11 Sambu beto kele bantu ya kukonda kukuka mpi ke zinga na nsi-ntoto ya Satana, beto ta kutana ti bampasi. (1 Yoane 5:19) Ata mpidina, beto lenda samba Yehowa “Nzambi yina ke lembikaka bantu yonso.” Ana salaka mutindu yina. Yandi zabisaka Yehowa mambu yonso yina vandaka kupesa yandi mpasi mpi bondilaka Yehowa na kusadisa yandi. Mutindu mosi mpi, ntangu beto ke kutana ti bampasi, beto fwete suka ve kaka na kuzabisa Yehowa mpasi na beto. Beto fwete bondila Yehowa na kusadisa beto mpi beto fwete zabisa yandi bampasi na beto yonso.—Bafilipi 4:6, 7.

12. Inki sadisaka Ana na kuvanda na kiese ata na ntangu ya mpasi?

12 Kukonda kubuta to lufwa ya muntu mosi yina beto ke zolaka lenda pesa beto mpasi mingi. Ata mpidina Nzambi lenda pesa beto kikesa. Beto tadila mbandu ya Ana, yina zingaka na bilumbu ya Yezu. Bakala na yandi fwaka bamvula nsambwadi na nima ya makwela. Yo ke monana nde bo butaka ve ata mwana mosi. Kansi nki sadisaka yandi? “Yandi vandaka kukonda ve na tempelo ata fioti.” Ata ntangu yandi lungisaka bamvula 84, yandi vandaka kaka kukwenda na tempelo sambu na kusamba mpi kusambila Yehowa. (Luka 2:37) Yo pesaka yandi kikesa mpi sadisaka yandi na kuvanda na kiese ata na ntangu ya mpasi.

13. Inki mutindu bampangi lenda pesa beto kikesa kana muntu ya dibuta na beto me sala mambu yina ke pesa beto mpasi?

 13 Bampangi lenda pesa beto mpi kikesa. (Bingana 18:24) Paula vandaka kaka ti bamvula tanu ntangu mama na yandi yambulaka kusambila Yehowa. Yo pesaka Paula mpasi mingi mpi luzingu na yandi vandaka diaka mbote ve. Kansi Anna, mupasudi-nzila mosi, pesaka yandi kikesa mpi monisilaka yandi zola mingi. Paula ke tuba nde: “Ata Anna vandaka ve mpangi na mono ya kinsuni, yandi monisilaka mono zola mpi sadisaka mono kibeni. Yandi sadisaka mono na kulanda kusadila Yehowa.” Na nima ya bantangu, mama ya Paula kumaka diaka kusambila Yehowa mpi Paula kele na kiese mingi. Anna mpi kele na kiese mutindu yandi sadisaka Paula na kulanda kusadila Yehowa.

14. Inki mambote beto ke bakaka ntangu beto ke pesaka bantu ya nkaka kikesa?

14 Kana beto ke sadila bantu mambu ya mbote ntangu yonso, yo ta sadisa beto na kutula diaka ve dikebi na bampasi na beto. Mu mbandu, bampangi-bankento mingi ya me kwelaka mpi bayina me kwelaka ve ke zabaka nde kulonga nsangu ya mbote ya Kimfumu ke sadisaka bo na kukuma banduku ya kisalu ya Yehowa mpi na kusala  luzolo na yandi. Yo ke pesaka bo kiese. Ya kieleka, beto yonso lenda monisila bantu zola kana beto ke longa bo nsangu ya mbote. Kana beto ke sadila bampangi mambu ya mbote, kinduku na beto ti bo ta kuma ngolo. (Bafilipi 2:4) Ntumwa Polo salaka mutindu yina. Yandi vandaka kutudila bantu dikebi “mutindu mama yina ke nwisa ke kebaka bana na yandi na zola yonso.” Polo pesaka mpi bampangi kikesa “mutindu tata ke salaka na bana na yandi.”—Tanga 1 Batesalonika 2:7, 11, 12.

MABUTA KE BAKAKA KIKESA

15. Nani fwete longa bana malongi ya Yehowa?

15 Inki mutindu beto lenda pesa mabuta kikesa? Bantangu ya nkaka, mabuta yina me zaba kieleka ntama mingi ve lenda lomba beto na kulonguka Biblia ti bana na bo. Biblia ke monisa nde Yehowa ke lombaka bibuti na kulonga mpi kusadisa bana na bo. (Bingana 23:22; Baefezo 6:1-4) Ata mambu ya nkaka lenda sala nde bibuti kulomba bampangi na kulonga bana na bo, yo kele mfunu nde bibuti bo mosi kulonga bana na bo. Bibuti fwete solula ti bana na bo mbala na mbala.

16. Inki beto fwete vila ve ntangu beto ke longuka Biblia ti bana ya bantu ya nkaka?

16 Ntangu kibuti ke lomba beto na kulonguka Biblia ti mwana na yandi, beto fwete zaba nde beto me kuma ve kibuti ya mwana yina. Bantangu ya nkaka, beto lenda longuka Biblia ti mwana yina bibuti na yandi kele ve Bambangi ya Yehowa. Kana beto ke longuka Biblia ti bana ya bantu ya nkaka, yo kele mbote na kulonguka na nzo na bo ntangu bibuti to mbuta mosi kele pana to kulonguka ti bo na kisika yina bantu yonso lenda mona beto. Kana beto ke sala mpidina, bantu ta yindudila beto ve mambu ya mbi. Mbala ya nkaka na nima ya bantangu, bibuti lenda zola diaka kulonguka Biblia ti bana na bo.

17. Inki mutindu bana lenda pesa bantu ya mabuta na bo kikesa?

17 Baleke yina ke zolaka Yehowa lenda pesa mpi bantu ya mabuta na bo kikesa. Inki mutindu? Kana bo ke zitisa bibuti na bo mpi ke sadisa bo na mambu ya nkaka. Diaka, kana bana ke landa kukangama na Yehowa, yo ke pesaka bantu yonso ya dibuta kikesa. Lameki, yina zingaka na ntwala ya Mvula ya Ngolo, vandaka kusambila Yehowa. Yandi tubaka mambu yai sambu na mwana na yandi Noa: “Mwana yai ta lembika beto na kisalu na beto ya ngolo mpi na kisalu ya mpasi ya maboko na beto sambu na ntoto yai ya Yehowa me singaka.” Mambu yai lunganaka na nima ya Mvula ya Ngolo, ntangu Yehowa katulaka mpasi yina yandi singaka ntoto. (Kuyantika 5:29; 8:21) Bubu yai, bana yina ke kangamaka na Yehowa ke pesaka mpi bantu ya mabuta na bo kikesa. Bo lenda sadisa mabuta na bo na kukanga ntima na bampasi yina bo ke kutana ti yo bubu yai mpi yina bo lenda kutana ti yo na bilumbu ke kwisa.

18. Inki lenda sadisa beto na kukanga ntima ata beto ke kutana ti bampasi?

18 Bubu yai, mambu mingi ke pesaka bansadi ya Yehowa kikesa, mu mbandu kisambu, bambandu ya bantu yina Biblia ke tubila, mpi bampangi na beto. (Tanga Nkunga 145:18, 19.) Beto ke ndima nde Yehowa ta sadisa beto ntangu yonso yina beto ke kutana ti bampasi mpi yandi ta sadisa beto na kukanga ntima.