Kwenda na mambu ke na kati

Kwenda na tansi ya malongi

Tula Meso na Nge na Mambu ya Kuluta Mfunu

Tula Meso na Nge na Mambu ya Kuluta Mfunu

“Bika bantu kuzaba nde nge, yina zina na nge kele Yehowa, nge mpamba kele Muntu ya Kuluta Zulu na ntoto ya mvimba.”—NKUNGA 83:18.

BANKUNGA: 9, 22

1, 2. (a) Inki kele mambu ya kuluta mfunu sambu na bantu yonso? (b) Sambu na nki yo kele mfunu sambu na beto?

BANTU mingi bubu yai ke monaka nde mbongo kele kima ya kuluta mfunu. Bo ke yindulaka mingi mambu ya mbongo mpi ke kudiyangisaka sambu na yo. Bo ke bakaka ntangu mingi na kusosa mbongo, kukuma ti yo mingi to kutanina yo. Bantu ya nkaka ke monaka nde balukanu na bo, mabuta mpi sante na bo kele bima ya kuluta mfunu.

2 Kansi, mambu yina Yehowa ke sala sambu bantu yonso kundima nde yandi kele Mfumu me luta bima yonso na mfunu. Yo kele mfunu mingi nde beto landa kutula dikebi na mambu yai ya kuluta mfunu. Kana beto keba ve, bisalu na beto mpi basusi ya luzingu lenda katula beto dikebi na mambu yai ya kuluta mfunu. Kana beto ke pesa maboko na luyalu ya Yehowa, beto ta kudiyangisa diaka ve mingi sambu na luzingu mpi beto ta kuma banduku ya Yehowa.

SAMBU NA NKI YO KELE MFUNU?

3. Inki Satana tubaka sambu na luyalu ya Nzambi?

3 Satana Diabulu monisaka nde Yehowa kele ve ti nswa ya kuyala. Yandi ke zolaka nde bantu kuyindula nde Yehowa kele Mfumu  ya mbi mpi yandi ke zolaka ve nde beto zinga mbote. Satana monisaka nde bantu ta zinga kibeni na kiese kana bo mosi ke twadisa luzingu na bo. (Kuyantika 3:1-5) Yandi tubaka diaka nde ata muntu mosi ve lenda landa kukangama na Nzambi mpi nde kana muntu ke kutana ti bampasi, yandi ta buya Nzambi. (Yobi 2:4, 5) Yehowa me bikaka ntangu sambu bantu yonso kubakisa nde kuzinga kukonda lutwadisu ya Nzambi ke nataka bampasi mingi.

4. Sambu na nki Yehowa fwete sukisa ntembe yina Satana basisaka sambu na luyalu na yandi?

4 Ya kieleka, Yehowa ke zaba nde mambu yina Diabulu tubaka kele luvunu. Ebuna sambu na nki Yehowa me bikilaka Satana ntangu ya kundimisa mambu yina yandi tubaka? Mvutu ya ngiufula yai ke tadila bigangwa yonso, yo vanda bantu to bawanzio. (Tanga Nkunga 83:18.) Adami ti Eva buyaka luyalu ya Yehowa, bantu mingi mpi me landaka mbandu na bo. Mambu yai lenda pusa bantu ya nkaka na kuyindula nde Satana tubaka masonga. Ngemba ya kieleka mpi bumosi lenda vanda ve sambu bantu mpi bawanzio me bakaka ntete ve mvutu ya pwelele na ntembe yina Satana basisaka. Kansi Yehowa ta sala mambu yina ta ndimisa bigangwa yonso nde yandi kele Mfumu, na nima bantu ta kuma kuzinga mvula na mvula. Ngemba ta vanda na zulu mpi na ntoto ya mvimba.—Baefezo 1:9, 10.

5. Inki mutindu mambu ya luyalu ya Nzambi me tala beto mpi?

5 Nzambi ta ndimisa bigangwa yonso nde yandi kele Mfumu, bo ta bakisa nde Satana mpi bantu me fwana ve na kuyala, ebuna Nzambi ta katula luyalu ya Satana mpi ya bantu. Luyalu ya Nzambi, disongidila Kimfumu ya Mesia ta nunga. Bansadi ya Nzambi ke landa kumonisa pwelele nde bantu lenda landa kukangama na Nzambi mpi kupesa maboko mbote-mbote na luyalu na yandi. (Yezaya 45:23, 24) Keti nge ke zola kuvanda na kati ya bantu yai? Kana mpidina, yo kele mbote nde nge bakisa kibeni mfunu ya kundimisa bantu nde Nzambi kele Mfumu.

KUNDIMISA BANTU NDE NZAMBI KELE MFUMU KELE MFUNU MINGI KULUTA LUGULUKU NA BETO

6. Kundimisa bantu nde Yehowa kele Mfumu kele mfunu mingi kuluta nki?

6 Kundimisa bantu nde Yehowa kele Mfumu kele mfunu mingi kuluta mambote na beto. Kansi yo ke tendula ve nde Yehowa ke bakaka ve luguluku na beto na valere, to nde yandi ke zolaka beto ve mingi. Inki ke sadisa beto na kubakisa yo?

7, 8. Inki mambote beto ta baka ntangu Nzambi ta ndimisa bantu nde yandi kele Mfumu?

7 Yehowa ke zolaka beto mingi. Yandi ke bakaka beto na valere, yo yina yandi pesaka Mwana na yandi sambu beto zinga mvula na mvula. (Yoane 3:16; 1 Yoane 4:9) Kana Yehowa silaka beto ve luzingu ya mbote na bilumbu ke kwisa, mambu yina Satana ti bambeni ya nkaka tubaka zolaka kumonana ya kieleka. Satana tubaka nde Yehowa kele muntu ya luvunu, yandi ke zolaka ve nde bantu kuzinga mbote mpi yandi ke yalaka mbote ve. Bambeni ke ndimaka ve balusilu ya Yehowa, bo ke tubaka nde: “Wapi kukala na yandi yina yandi silaka? Ya kieleka, katuka kilumbu yina ba-nkaka na beto me fwaka, mambu yonso kele kaka mutindu yo vandaka katuka luyantiku ya lugangu.” (2 Piere 3:3, 4) Yehowa ta lungisa balusilu na yandi. Yandi me silaka nde yandi ta sala mambu yina ta ndimisa bigangwa yonso nde yandi kele Mfumu, na ntangu yina yandi ta gulusa mpi bantu ya bulemfu. (Tanga Yezaya 55:10, 11.) Yehowa ke yalaka na zola, yo yina beto ke ndima nde yandi ta landa kuzola beto bansadi na yandi mpi kubaka beto na valere.—Kubasika 34:6.

 8 Ata mambu ya me tala luyalu ya Yehowa kele mfunu mingi, yo ke tendula ve nde Yehowa ke monaka nde luguluku na beto kele mfunu ve. Yehowa ke zolaka beto mingi. Beto fwete tula dikebi na mambu ya kuluta mfunu mpi kupesa maboko mbote-mbote na luyalu ya Yehowa.

YOBI SOBAKA MABANZA

9. Inki Satana tubaka sambu na Yobi? (Tala kifwanisu ya luyantiku ya disolo.)

9 Beto fwete bakisa mbote mambu ya me tala luyalu ya Yehowa. Mukanda ya Yobi lenda sadisa beto na kubakisa yo. Mukanda yai ke zabisa beto nde Satana tubaka nde kana Yobi kuniokwama mingi, yandi ta buya Nzambi. Nkutu Satana lombaka Nzambi na kuniokula Yobi. Yehowa vandaka ve na mfunu ya kuniokula Yobi, ata mpidina yandi pesaka Satana nswa ya kumeka Yobi. Yehowa songaka Satana nde: “Yonso yina yandi kele na yo kele na maboko na nge.” (Tanga Yobi 1:7-12.) Ntangu fioti na nima, bansadi ya Yobi fwaka mpi yandi vidisaka bima na yandi yonso. Bana na yandi kumi mpi fwaka. Satana zolaka kundimisa Yobi nde Nzambi muntu natilaka yandi bampasi yina. (Yobi 1:13-19) Na nima Satana losilaka Yobi maladi ya ngolo mpi ya nsoni. (Yobi 2:7) Yobi waka diaka mpasi mingi kuluta ntangu nkento na yandi mpi banduku na yandi tatu tubaka mambu yina pesaka yandi mpasi.—Yobi 2:9; 3:11; 16:2.

10. (a) Inki mutindu Yobi monisaka nde yandi me kangamaka ngolo na Nzambi? (b) Sambu na nki yo lombaka nde Yehowa kusadisa Yobi na kusoba mabanza?

10 Keti Satana tubaka masonga? Ve. Sambu ata Yobi kutanaka ti bampasi mingi, yandi buyaka ve Yehowa ata fioti. (Yobi 27:5) Kansi na ntangu mosi buna, Yobi vilaka mambu ya kuluta mfunu mpi yandi kumaka kutula dikebi mingi na kimuntu na yandi. Yandi vandaka kutuba mbala na mbala nde yandi me sala ve ata mbi mosi. Diaka, Yobi zolaka kibeni kuzaba sambu na nki yandi ke mona mpasi. (Yobi 7:20; 13:24). Beto lenda bakisa mpasi yina Yobi vandaka na yo. Ata mpidina, Yehowa bakisaka nde Yobi ke tadila ve mambu na mutindu ya mbote, yo yina yandi sadisaka Yobi na kusoba mabanza. Inki mutindu Yehowa sadisaka yandi?

11, 12. Yehowa sadisaka Yobi na kubakisa nki? Inki mutindu Yobi tadilaka yo?

11 Mukanda ya Yobi kapu 38 tii na 41 ke monisa mambu yina Yehowa songaka Yobi. Yehowa tendudilaka ve Yobi sambu na nki yandi ke mona mpasi. kansi, Yehowa sadisaka Yobi na kubakisa nde yandi kele mfututu na ntwala ya Nzambi. Yandi monisaka Yobi nde kele ti mambu ya nkaka ya mfunu mingi  kuluta bampasi na yandi. (Tanga Yobi 38:18-21.) Mambu yina Yehowa tubaka sadisaka Yobi na kusoba mabanza.

12 Yehowa sungikaka Yobi na nsungi yina Yobi vandaka na mpasi, keti yo ke tendula nde Yehowa vandaka ve mawete? Ve. Nkutu Yobi yandi mosi yindulaka mpidina ve ata fioti. Yandi bakisaka bandongisila ya Yehowa mpi ndimaka yo. Yobi tubaka nkutu nde: “Mono me wa mawa sambu na mambu yina mono tubaka, mpi mono me vanda na mfututu mpi na putulu ya tiya sambu na kumonisa nde mono me balula ntima.” (Yobi 42:1-6) Na ntwala nde Yehowa kusadisa Yobi, Elihu, leke mosi ya bakala, sadisaka dezia Yobi na kusoba mabanza. (Yobi 32:5-10) Na nima ya kuwidikila bandongisila ya zola ya Yehowa, Yobi sobaka mabanza. Yehowa zabisaka banduku ya Yobi nde yandi sepelaka na mutindu Yobi kangamaka na yandi.—Yobi 42:7, 8.

13. Inki mutindu bandongisila ya Yehowa sadisaka Yobi na nima ya bampasi na yandi?

13 Bandongisila ya Yehowa natilaka Yobi mambote mingi, ata na nima ya bampasi na yandi. “Yehowa sakumunaka nsuka ya luzingu ya Yobi kuluta nkutu luyantiku.” Na nima, “[Yobi] butaka bana ya nkaka nsambwadi ya babakala mpi tatu ya bankento.” (Yobi 42:12-14) Ata Yobi vandaka kuzola bana yai, ziku yandi landaka kuyindula bana yina fwaka. Yo kele pwelele nde Yobi vilaka ve bampasi ya ngolo yina kuminaka yandi ti dibuta na yandi. Kana Yobi bakisaka na nima kikuma ya bampasi na yandi, mbala ya nkaka yandi kudiyulaka sambu na nki Yehowa bikaka nde yandi mona mpasi mingi. Kana mpidina, ziku yandi yibukaka diaka bandongisila yina Yehowa pesaka yandi. Yo kele pwelele nde yo pesaka Yobi kikesa mpi sadisaka yandi na kuvanda ti mambanza ya mbote.—Nkunga 94:19, noti na nsi ya lutiti.

Keti nge lenda tula dikebi mingi na luyalu ya Yehowa na kisika ya kutula dikebi na bampasi na nge? (Tala paragrafe 14)

14. Mambu yina kuminaka Yobi ke longa beto nki?

14 Kuyindula mambu yina kuminaka Yobi lenda sadisa beto na kusoba mabanza na beto mpi yo lenda pesa beto kikesa. Yehowa lombaka bantu na kusonika mukanda ya Yobi sambu “na kulonga beto, sambu na nzila ya kukanga-ntima mpi ya kulembika yina ke katukaka na Masonuku beto vanda ti kivuvu.” (Baroma 15:4) Mukanda ya Yobi ke monisa nde yo kele mbote ve na kutula dikebi mingi na kimuntu na beto sambu yo lenda katula dikebi na beto na mambu yina Yehowa ke sala sambu na kundimisa bantu nde yandi kele Mfumu. Bonso Yobi, beto ta monisa nde beto ke pesa maboko na luyalu ya Yehowa kana beto ke landa kukangama na Yehowa ata na ntangu ya mpasi.

15. Inki mambote beto ta baka kana beto ke kanga ntima na bampasi?

 15 Mbandu ya Yobi ke pesa beto kikesa, yo ke monisa nde kana beto ke kutana ti bampasi, yo ke tendula ve nde Yehowa me wila beto makasi. Bampasi ke pesaka beto dibaku ya kupesa maboko na luyalu ya Yehowa. (Bingana 27:11) Kana beto ke kanga ntima na bampasi, beto ta pesa Yehowa kiese mpi kivuvu na beto na mambu yina beto ke vingila ta kuma ngolo. (Tanga Baroma 5:3-5.) Mbandu ya Yobi ke monisa nde “Yehowa kele kibeni ti lutondo mpi yandi ke wilaka bantu mawa.” (Yakobo 5:11) Kana beto ke pesa maboko na luyalu ya Yehowa, yandi ta sakumuna beto. Kuzaba mambu yai ke sadisaka beto na ‘kukanga kibeni ntima mpi kutanina kiese.’—Bakolosai 1:11.

LANDA KUTULA DIKEBI

16. Sambu na nki beto fwete yibuka ntangu yonso nde luyalu ya Yehowa kele mfunu mingi?

16 Ya kieleka, ntangu beto ke kutana ti bampasi, yo ke vandaka mpasi na kutula dikebi na mambu yina Yehowa ke sala sambu na kundimisa bantu nde yandi kele Mfumu. Nkutu bampasi ya fioti-fioti lenda monana nene kana beto ke tudila yo dikebi mingi. Yo yina, ata beto ke kutana ti bampasi, beto fwete yibuka ntangu yonso nde kupesa maboko na luyalu ya Nzambi kele mfunu mingi kuluta.

17. Inki mutindu kudipesa mingi na kisalu ya Yehowa lenda sadisa beto na kutula dikebi na mambu ya kuluta mfunu?

17 Kudipesa mingi na kisalu ya Yehowa ta sadisa beto na kutula dikebi na mambu ya kuluta mfunu. Mu mbandu, mpangi-nkento Renee belaka maladi ya ngolo yina vandaka kupesa yandi mpasi ntangu yonso, na nima yandi belaka mpi kansere. Ntangu yandi vandaka na lopitalu, yandi vandaka kulonga minganga, bambefo mpi bantu yina vandaka kutala bambefo. Na nima ya bamposo zole ti ndambu, Renee longaka bangunga 80. Ata Renee zabaka nde ntama mingi ve yandi ta fwa, yandi vilaka ve ata fioti mambu ya kuluta mfunu. Kupesa maboko na luyalu ya Yehowa pesaka Renee kiese.

18. Mbandu ya Jennifer ke longa beto nki na yina me tala kupesa maboko na luyalu ya Yehowa?

18 Beto lenda mpi kupesa maboko na luyalu ya Yehowa ata ntangu beto ke kutana ti mambu ya fioti-fioti na luzingu. Mpangi-nkento Jennifer salaka bilumbu tatu na kisika yina bo ke bakaka avio sambu avio na bo vandaka kaka kusoba bilumbu. Jennifer kudiyangisaka mpi vandaka kudiwa yandi mosi. Na kisika ya kulanda kudiyangisa, Jennifer sambaka Yehowa na kusadisa yandi na kulonga bantu yina vandaka kuvingila avio. Yandi longaka bantu mingi mpi kabulaka mikanda mingi. Jennifer ke tuba nde: “Mono monaka mutindu Yehowa sakumunaka mono ata na ntangu yina ya mpasi, mpi yandi pesaka mono ngolo ya kuzabisa mbote zina na yandi.”

19. Inki me sadisaka beto na kuvanda bansadi ya kieleka ya Yehowa?

19 Bansadi ya Yehowa mpamba ke bakisaka nde luyalu ya Yehowa kele kima ya kuluta mfunu. Kuzaba kieleka yai me sadisaka beto na kuvanda bansadi ya kieleka ya Yehowa. Yo yina, konso nsadi ya Yehowa fwete pesa maboko na luyalu ya Yehowa.

20. Inki mutindu Yehowa ke tadilaka bikesa yina nge ke salaka sambu na kupesa maboko na luyalu na yandi?

20 Ata beto ke kutana ti bampasi, beto ke salaka bikesa sambu na kupesa maboko na luyalu ya Yehowa, Yehowa ke monaka bikesa yina mpi yandi ke bakaka yo na valere. (Nkunga 18:25) Disolo yina ke landa ta tendula mambu ya nkaka yina ke pusaka beto na kupesa maboko na luyalu ya Yehowa mpi mutindu beto lenda sala yo mbote-mbote.