Kwenda na mambu ke na kati

Kwenda na tansi ya malongi

 DISOLO YA LUZINGU

Mono Ke Longaka Bantu Ata Mono Kele Kifwa-Makutu

Mono Ke Longaka Bantu Ata Mono Kele Kifwa-Makutu

Mono bakaka mbotika na 1941 ntangu mono vandaka ti bamvula 12. Kansi mono bakisaka kibeni kieleka na 1946. Sambu na nki? Bika mono tela beno disolo ya luzingu na mono.

NA BAMVU 1910, bibuti na mono yina vandaka kuzinga na mbanza Tbilisi na provense ya Georgie na États-Unis, kwendaka kuzinga na Canada. Bo vandaka kuzinga na ferme na nzo mosi ya fioti pene-pene ya mbanza Pelly, na provense ya Saskatchewan na westi ya Canada. Mono butukaka na 1928, beto butukaka bantu sambanu, mono kele mwana ya nsuka. Papa fwaka bangonda sambanu na ntwala nde mono butuka, mama fwaka ntangu mono vandaka ntete mwana. Bamvula fioti na nima, Lucy, yaya na mono ya nkento fwaka ti bamvula 17. Yo yina, beto kumaka kuzinga na nzo ya noko Nick.

Kilumbu mosi, ntangu mono vandaka leke, mono bendaka mpunda na beto na mukila. Bantu ya dibuta na beto monaka, bo waka boma nde mpunda ta niata mono, yo yina bo nganinaka mono na kuyambula. Sambu mono pesaka bo mukongo, mono bakisaka ve mambu yina bo vandaka kutuba. Diambu ya mbote kele nde mpunda niataka mono ve. Kilumbu yina, bo bakisaka nde mono kele kifwa-makutu.

Nduku mosi ya dibuta songaka bantu ya dibuta na beto na kukotisa mono na nzo-nkanda ya bifwa-makutu. Yo yina, noko Nick tindaka mono na nzo-nkanda ya bifwa-makutu na mbanza Saskatoon na Saskatchewan. Nzo-nkanda yango vandaka ntama mpi mono vandaka kuwa boma sambu mono vandaka kaka ti bamvula tanu. Mono vandaka kuvutuka na dibuta na beto kaka na bakonzie. Nsuka-nsuka, mono longukaka ndinga-bidimbu mpi kumaka kusakana ti bana ya nkaka.

MONO LONGUKAKA KIELEKA

Na 1939, yaya na mono Marion kwelanaka ti Bill Danylchuck, bo kumaka kusansa mono ti Frances mpangi na mono ya nkento. Bo vandaka bantu ya ntete na dibuta ya longukaka Biblia ti Bambangi ya  Yehowa. Na konzie ya nene, bo salaka bikesa ya kulonga mono malongi ya Biblia yina bo vandaka kulonguka. Yo vandaka mpasi sambu mono solula ti bo sambu bo zabaka ve ndinga-bidimbu. Ata mpidina, bo bakisaka nde mono vandaka kuzola kibeni kulonguka mambu ya Yehowa. Mono bakisaka nde bo vandaka kusala mambu yina Biblia ke tubaka, yo yina mono vandaka kukwenda kusamuna ti bo. Ntangu fioti na nima, mono kumaka ti mpusa ya kubaka mbotika mpi na Septembri 5, 1941, Bill pesaka mono mbotika na dilonga mosi ya nene ya masa ya madidi kibeni!

Mono ti bampangi ya bifwa-makutu na lukutakanu ya distrike na mbanza Cleveland, na Ohio, na 1946

Na 1946, ntangu mono vutukaka na nzo na konzie ya nene, beto kwendaka na lukutakanu mosi ya nene na mbanza Cleveland na provense ya Ohio na États-Unis. Kilumbu ya ntete, bampangi na mono ya bankento sonikilaka mono mambu yina mitubi vandaka kulonga sambu mono landa lukutakanu mbote. Kansi na kilumbu ya zole, mono waka kiese ya kuzaba nde bifwa-makutu vandaka kulanda lukutakanu na ndinga-bidimbu. Yo yina, mono landaka lukutakanu mbote mpi mono vandaka na kiese ya kubakisa mbote kibeni malongi ya Biblia!

MONO KUMAKA KULONGA KIELEKA

Na ntangu yina, Mvita ya Zole ya Ntoto ya Mvimba vandaka me mana mpi bantu kumaka kuzola bansi na bo mingi. Na nima ya lukutakanu mono vutukaka na nzo mpi kwendaka diaka na nzo-nkanda, mono bakaka lukanu ya kukangama kaka na Yehowa. Yo yina mono yambulaka kupesa lusaku na drapo, kuyimba nkunga ya kukumisa insi mpi kuta bankinsi. Mono vandaka kukwenda diaka ve na nzo-nzambi ti banduku na mono ya nzo-nkanda. Bamfumu ya nzo-nkanda sepelaka ve, bo bangikaka mono mpi pusaka mono na kusoba mabanza na mono. Banduku ya nzo-nkanda monaka mutindu bamfumu vandaka kubangika mono, yo pesaka mono nzila ya kulonga bo. Banduku na mono ya nkaka, mu mbandu Larry Androsoff, Norman Dittrick, mpi Emil Schneider ndimaka kieleka mpi bo ke sadilaka Yehowa tii bubu yai.

Ntangu mono vandaka kukwenda na bambanza ya nkaka, mono vandaka kusala ngolo na kulonga bifwa-makutu. Mu mbandu, na mbanza Montréal, mono kwendaka kisika yina bifwa-makutu vandaka kukutana. Mono longaka Eddie Tager, leke mosi ya bakala yina vandaka na kimvuka mosi ya babandi. Yandi kumaka kuvukana na dibundu ya ndinga-bidimbu na mbanza Laval, na provense ya Québec tii na lufwa na yandi na mvula ya me luta. Mono longaka mpi Juan Ardanez, leke mosi ya bakala. Bonso bantu ya Berea, yandi vandaka kutanga na Biblia sambu na kuzikisa kana mambu yina yandi vandaka kulonguka vandaka kieleka. (Bisalu 17:10, 11) Yandi kumaka Mbangi ya Yehowa mpi vandaka nkuluntu na mbanza Ottawa na provense ya Ontario tii ntangu yandi fwaka.

Beto ke samuna na bala-bala na luyantiku ya bamvu 1950

Na 1950, mono kwendaka na mbanza Vancouver. Ata mono ke zolaka kulonga bifwa-makutu, mono ke vilaka ve ata fioti kilumbu yina mono longaka Chris Spicer, nkento mosi yina vandaka ve kifwa-makutu.  Beto kutanaka na nzila. Yandi ndimaka nde mono natila yandi mikanda na beto mbala na mbala. Chris lombaka mono na kusolula ti bakala na yandi Gary. Mono kwendaka na nzo na bo mpi beto solulaka mingi. Ntangu beto vandaka kusolula, mono vandaka kusonikila Gary mpi yandi vandaka kusonikila mono. Mwa bamvula lutaka, beto vandaka diaka ve kukutana. Kansi mono yitukaka mingi ntangu yandi kwisaka kupesa mono mbote na lukutakanu mosi na mbanza Toronto na provense ya Ontario. Gary bakaka mbotika kilumbu yina. Mambu yina yibukisaka mono mfunu ya kulanda kusamuna sambu beto me zaba ve kana muntu yina beto me longa ta kuma Mbangi ya Yehowa.

Na nima, mono vutukaka na Saskatoon. Kuna, nkento mosi lombaka mono na kulonguka Biblia ti mapasa na yandi zole ya bankento ya bifwa-makutu, Jean ti Joan Rothenberger. Bo vandaka kutanga na kisika yina mono vandaka kutanga. Ntangu fioti na nima, mapasa yina vandaka kuzabisa banduku na bo mambu yina bo vandaka kulonguka na Biblia. Nsuka-nsuka, banduku na bo tanu kumaka Bambangi ya Yehowa, mu mbandu Eunice Colin. Mono kutanaka ti Eunice ntangu mono vandaka na nzo-nkanda ya nsuka. Na ntangu yina, yandi pesaka mono bombo mpi songaka mono nde beto kuma banduku. Na nima, yandi kumaka mfunu mingi na luzingu na mono disongidila yandi kumaka nkento na mono.

Mono ti Eunice na 1960 mpi na 1989

Ntangu mama ya Eunice zabaka nde Eunice ke longuka Biblia, yandi lombaka mfumu ya nzo-nkanda na kubuyisa Eunice kulonguka Biblia. Mfumu ya nzo-nkanda botulaka mikanda ya Eunice, kansi Eunice kangamaka kaka na Yehowa. Ntangu Eunice zolaka kubaka mbotika, bibuti na yandi songaka yandi nde, “Kana nge kuma Mbangi ya Yehowa, nge ta katuka na nzo na beto.” Ntangu Eunice lungisaka bamvula 17, yandi kwendaka kuzinga na dibuta mosi ya Bambangi ya Yehowa. Yandi landaka kulonguka Biblia mpi bakaka mbotika. Ntangu beto kwelanaka na 1960, bibuti na yandi kwisaka ve na feti na beto ya makwela. Kansi na nima ya bamvula, bo kumaka  kuzitisa beto mingi sambu na mambu yina beto vandaka kukwikila mpi mutindu beto vandaka kusansa bana na beto.

YEHOWA KE TANINAKA MONO

Mwana na mono Nicholas ti nkento na yandi, Debora, na Betele ya Londres

Yo vandaka ve pete sambu na beto bifwa-makutu na kusansa bana nsambwadi ya babakala yina kele ve bifwa-makutu. Ata mpidina, beto salaka bikesa ya kulonga bo ndinga-bidimbu sambu na kusolula mbote ti bo mpi kulonga bo kieleka. Bampangi sadisaka beto mingi. Mu mbandu, kibuti mosi sonikilaka beto na mukanda nde mwana na beto ke tuba mambu ya mbi na Nzo ya Kimfumu. Na mbala mosi, beto sungikaka mwana. Bubu yai, bana na beto iya, James, Jerry, Nicholas, mpi Steven kele bankuluntu mpi bo ke sadilaka Yehowa mbote ti bankento na bo. Nicholas ti nkento na yandi Debora ke balulaka mikanda na ndinga-bidimbu na Betele ya Londres, Steven ti nkento na yandi Shannan ke balulaka mikanda na ndinga-bidimbu na Betele ya États-Unis.

Bana na mono James, Jerry, mpi Steven ti bankento na bo ke samuna na mitindu ya kuswaswana na ndinga-bidimbu

Ngonda mosi na ntwala nde beto lungisa bamvula 40 na makwela, Eunice belaka kansere mpi fwaka. Na bamvula yina yandi vandaka kubela, yandi kumaka kukwikila ngolo na lufutumuku. Mono ke vingilaka na kiese yonso kilumbu yina mono ta kutana ti yandi.

Faye ti James, Jerry ti Evelyn, Shannan ti Steve

Na Februari 2012, mono bwaka, mukwa na mono ya luketo bukanaka. Mono kumaka na mfunu ya lusadisu mingi, yo yina mono ti mwana na mono ya bakala mpi nkento na yandi beto kwendaka kuzinga na mbanza Calgary na Canada. Bubu yai mono kele nkuluntu na dibundu ya ndinga-bidimbu ya Calgary. Yai kele mbala ya ntete ya mono kele na dibundu ya ndinga-bidimbu. Kansi nki me sadisaka mono na kutanina kinduku ya ngolo ti Yehowa bamvula yai yonso ya mono vandaka na mabundu ya Kingelesi? Yehowa sadisaka mono. Yandi me lungisaka lusilu na yandi ya kutanina bana yina me konda bibuti. (Nkunga 10:14) Mono ke tondaka bampangi yonso yina vandaka kusonikila mono mambu yina mitubi vandaka kulonga, bayina longukaka ndinga-bidimbu mpi bayina vandaka kubalula bangogo ya mitubi na ndinga-bidimbu.

Na nzo-nkanda ya bapasudi-nzila ya ndinga-bidimbu, ntangu mono vandaka ti bamvula 79

Bantangu ya nkaka, mono vandaka ve kubakisa mambu yina mitubi vandaka kulonga, na bantangu ya mutindu yina, mono vandaka kumona nde ata muntu mosi ve vandaka kuzaba mutindu ya mbote ya kusadisa bifwa-makutu. Yo yina, mono vandaka kuwa makasi to kulemba. Kansi mono vandaka kuyibuka mambu yina Piere zabisaka Yezu: “Mfumu, na nani beto ta kwenda? Nge kele ti bangogo ya luzingu ya mvula na mvula.” (Yoa. 6:66-68) Mono ke kangaka ntima bonso bampangi mingi ya bifwa-makutu ya me salaka bamvula mingi na dibundu ya Yehowa. Mono ke kangamaka na dibundu ya Yehowa mpi ke tudilaka Yehowa ntima, yo me natilaka mono mambote mingi. Bubu yai, dibundu ya Yehowa ke basisaka mikanda mingi na ndinga na beto, diaka mono kele na kiese ya kukwenda na balukutakanu na ndinga-bidimbu ya Amerika. Ya kieleka, mono me zinga luzingu ya kiese mpi me baka balusakumunu mingi na kusadila Yehowa, Nzambi ya Nene.