Kwenda na mambu ke na kati

Kwenda na tansi ya malongi

Lukanu ya Yehowa Ta Lungana!

Lukanu ya Yehowa Ta Lungana!

“Mono me tuba, mpi mono ta sala yo. Mono me baka lukanu, mono ta lungisa yo mpi.”YEZAYA 46:11.

BANKUNGA: 147, 149

1, 2. (a) Inki Yehowa me zabisaka beto? (b) Inki lusilu Yezaya 46:10, 11 mpi 55:11 ke tubila?

VERSE ya ntete ya Biblia kele ti nsa mosi ya nkufi kansi yo ke tendula mambu mingi. Yo ke tuba nde: “Na luyantiku Nzambi gangaka zulu ti ntoto.” (Kuyantika 1:1) Beto ke monaka kaka bima fioti na bima mingi yina Nzambi me gangaka na zulu ti na ntoto, diaka beto ke zabaka kaka mambu fioti na yina me tala zulu, nsemo mpi bangolo ya lugangu. (Longi 3:11) Kansi Yehowa me zabisaka beto lukanu na yandi sambu na ntoto mpi sambu na bantu. Yandi gangaka bantu na kifwani na yandi mpi zolaka nde bo zinga na kiese. (Kuyantika 1:26) Bantu zolaka kuvanda bana na yandi mpi yandi zolaka kuvanda Tata na bo.

2 Kapu ya tatu ya Kuyantika ke monisa nde kigangwa mosi sosaka kubebisa lukanu ya Yehowa. (Kuyantika 3:1-7) Kansi, na meso ya Yehowa kima ya mpasi ke vandaka ve. Ata muntu mosi ve lenda kanga yandi nzila ya kusala mambu yina yandi me zola. (Yezaya 46:10, 11; 55:11) Beto fwete ndima nde nsuka-nsuka, lukanu ya Yehowa ta lungana na ntangu ya me fwana!

3. (a) Inki malongi ya mfunu ke sadisaka beto na kubakisa Biblia? (b) Sambu na nki yo kele mfunu nde beto longuka malongi yai? (c) Inki bangiufula beto ta tadila?

3 Beto me zaba lukanu ya Nzambi sambu na ntoto mpi sambu na  bantu mpi mukumba yina Yezu ke lungisa na lukanu yango. Yai kele kibeni bakieleka ya mfunu ya Biblia, bakieleka ya ntete-ntete ya beto ke zabaka ntangu beto ke yantikaka kulonguka Ndinga ya Nzambi. Bubu yai, beto ke sadisaka bantu na kuzaba malongi yai ya mfunu. Beto kele ti dibaku ya nene ya kulonga bantu bakieleka yai, mingi-mingi na nsungi ya Lusungiminu ya lufwa ya Kristu. (Luka 22:19, 20) Bantu yina ke kwisaka na lukutakanu yai ya mfunu ke longukaka mambu mingi ya kitoko ya lukanu ya Nzambi. Yai kele ntangu ya mbote ya kuyindula bangiufula yina beto lenda yula bantu sambu na kusiamisa bo na kukwisa na Lusungiminu. Na disolo yai, beto ta tadila bangiufula tatu: Inki kele lukanu ya Nzambi sambu na ntoto mpi sambu na bantu? Inki diambu ya mbi salamaka? Sambu na nki kimenga ya Yezu ke sadisaka sambu lukanu ya Nzambi kulungana?

INKI VANDAKA LUKANU YA NGANGI?

4. Inki mutindu lugangu “ke zabisaka nkembo ya Nzambi”?

4 Yehowa kele Ngangi ya kuluta nene. Yandi gangaka konso kima na mutindu ya mbote mpi ya kuyituka. (Kuyantika 1:31; Yeremia 10:12) Bima ya kitoko yina beto ke monaka mpi ndonga yina beto ke monaka na bima yango ke longa beto nki? Yo ke longa beto nde bima yonso yina Yehowa gangaka, ya fioti to ya nene, kele mfunu. Diaka, nki mutindu nge ke kudiwaka ntangu nge ke yindulaka to ke monaka bima ya kuyituka bonso baselile ya muntu, bebe ya me butuka, mpi kulere ya kitoko yina beto ke monaka kana ntangu ke dinda? Beto ke sepelaka ti bima yai sambu Yehowa me gangaka beto ti mayele ya kuzaba bima yina kele kibeni kitoko.—Tanga Nkunga 19:1; 104:24.

5. Inki Yehowa me salaka sambu ndonga kuvanda na bima yina yandi me gangaka?

5 Yehowa me tudilaka bigangwa na yandi yonso bandilu na mayele yonso. Yandi me tulaka bansiku na lugangu mpi me tudilaka bantu bansiku yina ta sadisaka bo na kuzinga mbote. Yandi tulaka bansiku sambu bima yonso na lugangu kuvanda na ndonga mpi kusala na bumosi. (Nkunga 19:7-9) Konso kima yina Nzambi me gangaka kele mfunu mpi kele ti kisalu na yo. Mu mbandu, ngolo yina ntoto ke vandaka ti yo ya kubenda bima na zulu na yo ke salaka nde ntoto kubenda mupepe na nziunga na yo mpi mupepe kuvanda ntangu yonso na nziunga ya ntoto; yo ke taninaka mpi banzadi mpi bitembo yina ke nikisaka masa ya banzadi. Kana ntoto vandaka ve ti ngolo yai, bantu mpi bima lendaka ve kuzinga na ntoto. Bansiku yina Yehowa me tulaka na lugangu me sadisaka sambu ndonga kuvanda. Yo ke monisaka nde yandi kele ti lukanu sambu na ntoto mpi sambu na bantu. Ntangu beto ke samuna, beto fwete sadisa bantu na kuzaba Nzambi yina gangaka bima yai ya kitoko.—Kusonga 4:11.

6, 7. Inki makabu Yehowa pesaka Adami ti Eva?

6 Lukanu ya Yehowa vandaka nde bantu kuzinga na ntoto kimakulu. (Kuyantika 1:28; Nkunga 37:29) Yandi kele ntima-mbote, yo yina yandi pesaka Adami ti Eva bima ya kitoko ya mutindu na mutindu. (Tanga Yakobo 1:17.) Yehowa pesaka bo kimpwanza, mayele ya kuyindula, ya kuzola, mpi dibaku ya kuvanda ti banduku. Ngangi solulaka ti Adami mpi longaka yandi mutindu ya kusala mambu ya mbote. Diaka, Adami longukaka mutindu ya kulungisa bampusa na yandi, ya kuyala bambisi mpi kuyidika ntoto. (Kuyantika 2:15-17, 19, 20) Yehowa pesaka Adami ti Eva makuki ya kuwa ntomo ya bima, kusimba bima, kumona, kuwidikila mpi kuwa nsudi ya bima ya kitoko  yina yandi sadilaka bo, sambu bo zinga na kiese na kisika ya kitoko yina yandi tulaka bo. Bo vandaka ti mambu mingi ya mbote ya kusala. Bo vandaka mpi ti dibaku ya kulanda kulonguka mvula na mvula mpi kuzaba diaka mambu ya nkaka ya mpa.

7 Inki kele mambu ya nkaka ya lukanu ya Nzambi? Yehowa pesaka Adami ti Eva makuki ya kubuta bana ya kukuka. Bana na bo mpi zolaka kubuta tii kuna ntoto ya mvimba zolaka kufuluka ti bantu. Yehowa ke zolaka nde bibuti kuzola bana na bo mutindu yandi zolaka Adami ti Eva, bana na yandi ya ntete ya kukuka. Yandi pesaka bantu ntoto mpi bima yonso ya mbalu mpi ya kitoko yina kele na ntoto. Yandi pesaka bo ntoto sambu bo zinga na kati mpi ata muntu mosi ve lendaka kubotula bo yo.—Nkunga 115:16.

INKI KIMA YA MBI SALAMAKA?

8. Sambu na nki Nzambi pesaka Adami ti Eva nsiku yina kele na Kuyantika 2:16, 17?

8 Mambu salamaka ve kaka mutindu Yehowa zolaka. Inki salamaka? Yehowa pesaka Adami ti Eva nsiku mosi ya pete sambu yo sadisa bo na kuzaba bandilu na bo. Yandi tubaka nde: “Nge lenda dia mbuma ya konso nti ya kilanga mutindu nge me zola. Kansi nge fwete dia ve mbuma ya nti ya kuzaba mambu ya mbote ti ya mbi, sambu kilumbu yina nge ta dia yo, nge ta fwa kibeni.” (Kuyantika 2:16, 17) Nsiku yina vandaka ve mpasi sambu nde bo bakisa yo. Mpi yo vandaka ve mpasi na kuzitisa yo sambu na kilanga, bima ya kitoko ya kudia vandaka mingi.

9, 10. (a) Inki mambu Satana tubaka sambu na Yehowa? (b) Inki lukanu Adami ti Eva bakaka? (Tala kifwanisu ya luyantiku ya disolo.)

9 Satana Diabulu sadilaka nioka sambu na kupusa Eva na kukolama na Yehowa, Tata na yandi. (Tanga Kuyantika 3:1-5; Kusonga 12:9) Satana monisaka nde bantu kele ti nswa ya kudia bambuma ya konso nti ya kilanga. Na bangogo ya nkaka, Satana sosaka kuyula Eva nde, “Keti nge ke zola kutuba nde nge kele ve ti nswa ya kusala konso kima yina nge me zola?’ Diaka, yandi songaka Eva nde: “Beno ta fwa ve ata fioti.” Yandi kusaka yandi. Na nima, yandi ndimisaka Eva nde yo kele mfunu ve nde yandi lemfukila Nzambi. Satana tubaka nde: “Nzambi me zaba nde kaka kilumbu yina beno ta dia yo meso na beno ta kanguka.” Satana tubaka nde Yehowa buyisaka bo mbuma ya nti yina sambu yandi zabaka nde yo ta kumisa bo mayele mingi. Nsuka-nsuka, yandi tubaka mambu yai ya luvunu: “Beno ta kuma bonso Nzambi, beno ta zaba mambu ya mbote ti ya mbi.”

10 Yo lombaka nde Adami ti Eva kupona kulemfukila Nzambi to Satana. Diambu ya mawa, bo kolamaka na Nzambi. Bo buyaka Yehowa, Tata na bo mpi bo landaka Satana. Banda na ntangu yina, bo kumaka kuzinga na mutindu na bo, kukonda lutaninu ya Yehowa.—Kuyantika 3:6-13.

11. Sambu na nki yo lombaka kaka nde Yehowa kusungika disumu ya Adami ti Eva?

11 Na nima ya kukolama, Adami ti Eva vandaka diaka ve bantu ya kukuka. Diaka, bo kumaka bambeni ya Nzambi sambu yandi ke mengaka mambi. ‘Meso na yandi kele bunkete mingi yo yina yandi lenda tala ve mambu ya mbi.’ (Habakuki 1:13) Kana Yehowa salaka ata kima mosi ve sambu na disumu ya Adami ti Eva, luzingu ya bigangwa na yandi yonso zolaka kubeba. Bawanzio ti bantu zolaka kudiyula kana yo me fwana mpenza nde bo tula diaka ntima na mambu yina Yehowa ke tuba. Kansi Yehowa ke kangamaka na minsiku na yandi, yandi ke fwaka ve ata fioti bansiku na yandi. (Nkunga 119:142) Ata Adami ti Eva vandaka ti kimpwanza, bo vandaka ve ti kiyeka ya kuditanina na bampasi yina kukolama natilaka bo.  Nsuka-nsuka bo fwaka mpi bo vutukaka na mfututu, yina Nzambi sadilaka sambu na kuganga bo.—Kuyantika 3:19.

12. Inki me kuminaka bana ya Adami?

12 Na nima ya kudia mbuma, Yehowa lendaka diaka ve kundima Adami ti Eva na dibuta na yandi. Yandi kulaka bo na kilanga ya Edeni, mpi bo lendaka diaka ve kuvutuka. (Kuyantika 3:23, 24) Yehowa bikaka nde bo niokwama sambu na lukanu ya mbi yina bo bakaka. (Tanga Kulonga 32:4, 5.) Mambu yai salaka nde bo kuka diaka ve kufulula bikalulu ya Yehowa na mutindu ya kukuka. Adami bebisaka luzingu ya kitoko, ya yandi mosi mpi ya bana na yandi. Yandi me natilaka bana na yandi kukonda kukuka, disumu mpi lufwa. (Baroma 5:12) Adami vidisaka dibaku ya bana na yandi ya kuzinga mvula na mvula. Adami ti Eva lendaka diaka ve kubuta bana ya kukuka, bana na bo lendaka mpi ve kubuta bana ya kukuka. Satana pusaka Adami ti Eva na kupesa Nzambi mukongo, banda na ntangu yina, Diabulu ke pusaka bantu yonso mpi na kuyambula kusadila Nzambi.—Yoane 8:44.

NKUDULU ME PESAKA BANTU DIBAKU YA KUKUMA BANDUKU YA NZAMBI

13. Inki Yehowa ke zolaka sambu na bantu?

13 Yehowa ke landaka kaka kuzola bantu. Ata Adami ti Eva buyaka yandi, yandi ke zolaka kaka nde bantu kuvanda ti kuwakana ya mbote ti yandi. Yandi ke zolaka ve ata mosi na kati na bo kufwa. (2 Piere 3:9) Yo yina, Nzambi bakaka bangidika nswalu sambu bantu kukuma diaka banduku na yandi. Inki mutindu yandi salaka yo kukonda kufwa bansiku na yandi? Beto tadila mutindu yandi salaka yo.

14. (a) Yoane 3:16 ke monisa nde Nzambi salaka nki sambu na kukatula bantu na disumu mpi na lufwa? (b) Inki ngiufula beto lenda tadila ti bantu?

14 Tanga Yoane 3:16. Bantu mingi yina beto ke bingisaka na Lusungiminu, ke zabaka mbote-mbote verse yai. Kansi nki mutindu kimenga ya Yezu ke pesaka bantu dibaku ya kuzinga mvula na mvula? Beto ke sadisaka bantu na kubakisa mvutu na ngiufula yai ntangu beto ke solulaka ti bo sambu na kubingisa bo na Lusungiminu, ntangu beto ke vandaka ti bo na Lusungiminu mpi ntangu beto ke vutukilaka bo na nima ya Lusungiminu. Kana bantu me bakisa mfunu ya nkudulu, bo ta bakisa nde Yehowa ke zolaka beto mingi mpi yandi kele Nzambi ya mayele. Inki bakieleka ya me tala nkudulu beto lenda longa bantu?

15. Inki mutindu Yezu swaswanaka ti Adami?

15 Yehowa bakaka ngidika sambu muntu ya kukuka kutambika luzingu na yandi bonso nkudulu. Yo lombaka nde muntu yango kuvanda ya kukuka, kubikala ya kwikama na Yehowa, mpi kundima na luzolo yonso kupesa luzingu na yandi sambu na kugulusa bantu. (Baroma 5:17-19) Yehowa katulaka Yezu, kigangwa na yandi ya ntete, na zulu mpi tindaka yandi na ntoto. (Yoane 1:14) Mpidina, Yezu butukaka muntu ya kukuka mutindu Adami vandaka na ntwala ya kusala disumu. Kansi na kuswaswana ti Adami, Yezu zitisaka bansiku yina Yehowa zolaka nde bantu ya kukuka kuzitisa. Yezu kolamaka ve ata fioti na bansiku ya Nzambi ata na ntwala ya mimekamu ya kuluta nene.

16. Sambu na nki nkudulu kele dikabu mosi ya mbalu?

16 Sambu Yezu fwaka ya kukuka, yandi me katulaka bantu na disumu mpi na lufwa. Yandi lungisaka mbote-mbote mambu yina lombaka nde Adami kulungisa, disongidila Yezu vandaka muntu ya kukuka, yandi bikalaka ya kwikama mpi lemfukilaka Nzambi na mambu yonso. (1 Timoteo 2:6) Yandi fwaka sambu na kugulusa beto mpi kimenga na yandi ke pesaka bantu yonso, babakala, bankento mpi bana dibaku  ya kuzinga mvula na mvula. (Matayo 20:28) Nkudulu kele nsapi yina me kangulaka kielo sambu lukanu ya Nzambi kulungana.—2 Bakorinto 1:19, 20.

YEHOWA ME PESAKA BETO DIAKA LUZINGU

17. Inki mambote nkudulu me natilaka beto?

17 Yehowa salaka bibansa ya nene sambu na kufuta nkudulu. (1 Piere 1:19) Sambu yandi ke zolaka beto mingi, yandi ndimaka nde Mwana na yandi yina yandi ke zolaka mingi kufwa sambu na beto. (1 Yoane 4:9, 10) Yezu me bakaka kisika ya Adami, beto lenda tuba nde yandi me kumaka tata na beto. (1 Bakorinto 15:45) Yezu me pesaka beto dibaku ya kuzinga mvula na mvula mpi ya kukuma diaka bantu ya dibuta ya Nzambi. Nkudulu me pesaka beto dibaku ya kukuma bantu ya kukuka mpi Yehowa lenda ndima beto diaka na dibuta na yandi kukonda kufwa bansiku na yandi. Yindula kiese yina ta vanda ntangu bantu yonso ya kwikama ta kuma bantu ya kukuka! Nsuka-nsuka, bigangwa yonso na zulu ti bantu yonso na ntoto ta kuma na dibuta mosi. Beto yonso ta kuma bana ya Nzambi.—Baroma 8:21.

18. Inki ntangu Yehowa ta kuma “bima yonso sambu na bantu yonso”?

18 Ata bibuti na beto ya ntete buyaka Yehowa, yandi ke landaka kaka kuzola bantu, mpi yandi me futaka nkudulu. Ata beto kele bantu ya kukonda kukuka, Satana lenda kanga beto ve nzila ya kuvanda ya kwikama na Yehowa. Na nzila ya nkudulu, Yehowa ta sadisa beto na kukuma kibeni bantu ya lunungu. Yindula mutindu luzingu ta vanda ntangu “konso muntu yina ke zaba Mwana mpi ke kwikila na yandi” ta baka luzingu ya mvula na mvula. (Yoane 6:40) Tata na beto ya zola mpi ya mayele ta lungisa lukanu na yandi mpi ta kumisa bantu ya kukuka. Ebuna, Yehowa ta kuma “bima yonso sambu na bantu yonso.”—1 Bakorinto 15:28.

19. (a) Ntonda sambu na nkudulu fwete pusa beto na kusala nki? (Tala lupangu “ Landa na Kusosa Bantu Yina Me Fwana.”) (b) Inki beto ta longuka na disolo ya ke landa?

19 Ntonda sambu na nkudulu fwete pusa beto na kuzabisa bantu dikabu yai ya mbalu mingi. Bantu fwete zaba nde na nzila ya nkudulu, Yehowa me pesaka bantu yonso dibaku ya kuzinga mvula na mvula. Kansi nkudulu me nataka diaka mambote ya nene kuluta yina. Yo me pesaka mvutu na ntembe yina Satana basisaka na Edeni. Beto ta tubila mvutu yina nkudulu me pesaka na disolo yina ke landa.