Kwenda na mambu ke na kati

Kwenda na tansi ya malongi

Inki Ta Salama Ntangu Kimfumu ya Nzambi Ta Kwisa?

Inki Ta Salama Ntangu Kimfumu ya Nzambi Ta Kwisa?

“Nsi-ntoto ke luta, nzala na yo mpi ke luta, kansi muntu yina ke salaka luzolo ya Nzambi ke bikalaka kimakulu.”—1 YOANE 2:17.

BANKUNGA: 134, 24

1, 2. (a) Inki mutindu nsi-ntoto kele bonso muntu yina bo me zengila nkanu ya lufwa? (Tala kifwanisu ya luyantiku ya disolo.) (b) Inki mutindu bigangwa yonso na zulu mpi na ntoto ta kudiwa ntangu nsi-ntoto yai ta fwa?

YINDULA mambu yai. Muntu mosi ya mbi ke tambula na boloko, kansi bantu yina ke kengilaka boloko ke tuba na ndinga ya ngolo nde “Muntu ya kufwa ke tambula!” Sambu na nki bo ke binga yandi muntu ya kufwa? Bo me zaba nde ata yandi ke tambula, ntama mingi ve yandi ta fwa sambu bo me zengila yandi nkanu ya lufwa. *

2 Beto ke zinga na nsi-ntoto yai ya mbi, yo kele bonso muntu yina bo me zengila nkanu ya lufwa. Biblia ke tuba nde: “Nsi-ntoto ke luta.” (1 Yoane 2:17) Lukanu ya Yehowa kele ya kufwa nsi-ntoto yai ntama mingi ve, yo yina beto fwete ndima nde nsi-ntoto yai ta fwa. Kansi lukanu ya kufwa muntu yina ya mbi me swaswana ti lukanu ya kufwa nsi-ntoto. Bantu ya nkaka lenda tuba nde bazuzi zengaka ve mbote mambu ya muntu yina ya mbi mpi bo lenda telamina lukanu  yina ya kufwa yandi. Kansi Yehowa kele zuzi ya kukuka, lukanu na yandi ya kufwa nsi-ntoto kele mpi ya kukuka. (Kulonga 32:4) Muntu mosi ve lenda telamina lukanu yai. Ntangu nsi-ntoto yai ta fwa, bigangwa yonso na zulu mpi na ntoto ta ndima mpenza nde Yehowa me sala mbote kibeni. Bantu ta sepela mingi kibeni!

3. Inki mambu iya ta luta ntangu Kimfumu ya Nzambi ta kwisa?

3 “Nsi-ntoto” yina “ke luta” ke tendula nki? Yo lenda tendula mambu ya mbi yina bantu ke salaka bubu yai. Ntama mingi ve mambu yonso ya mbi ta luta. Yai kele kibeni ‘nsangu ya mbote ya Kimfumu.’ (Matayo 24:14) Disolo yai ta tubila mambu iya yina ta luta ntangu Kimfumu ya Nzambi ta kwisa: bantu ya mbi, bimvuka yina ke salaka mambu ya mbi, bisalu ya mbi mpi bampasi. Ntangu beto ke tadila konso diambu, beto ta sosa kuzaba (1) mutindu yo ke niokulaka beto bubu yai, (2) mambu yina Yehowa ta sala, mpi (3) mambu ya mpa yina Yehowa ta tula na kisika na yo.

BANTU YA MBI

4. Inki mutindu bantu ya mbi ke niokulaka beto bubu yai?

4 Inki mutindu bantu ya mbi ke niokulaka beto bubu yai? Ntumwa Polo tubaka nde na bilumbu ya nsuka, “bantangu ya mpasi mpi ya nku ta vanda.” Yandi yikaka nde “bantu ya mbi mpi bantu ya luvunu ta salaka diaka mbi kuluta.” (2 Timoteo 3:1-5, 13) Keti nge ke mona nde mambu yai ke salama? Bampangi mingi ke niokwama na mambu yina bantu ya mbi ke sala, mu mbandu mbangika, kuzola ve bantu ya mpusu ya nkaka, mpi mubulu. Bantu ya nkaka ke waka nsoni ve na kusala mambu ya mbi. Bankaka ke monisaka nde bo ke sadisa bantu, kansi bo kele kibeni bantu ya mbi. Mbala ya nkaka mambu ya mbi me kuminaka nge ntete ve, kansi mambu yina bantu ya mbi ke salaka ke pesaka beto yonso mpasi. Beto ke waka mpasi ntangu beto ke waka nde bantu ke niokula bana-fioti, minunu, mpi bantu yina kele ngolo ve. Bantu yai ya mbi ke salaka mambu bonso bambisi ya makasi to bademo. (Yakobo 3:15) Ata mpidina, Ndinga ya Nzambi ke tuba mambu yina ke pesa beto kiese mpi kivuvu.

5. (a) Inki dibaku Nzambi me pesaka bantu ya mbi? (b) Inki ta kumina bantu yina ke buya kusoba bikalulu?

5 Inki Yehowa ta sala? Bubu yai, Yehowa ke pesa bantu ya mbi dibaku ya kusoba bikalulu na bo. (Yezaya 55:7) Ata Yehowa ta fwa nsi-ntoto yai ntama mingi ve, yandi me zengila ntete ve bantu ya mbi nkanu ya lufwa. Kansi nki ta kumina bantu yina ke buya kusoba mpi bayina ta landa kudikotisa na mambu ya nsi-ntoto yai? Yehowa ke sila nde yandi ta fwa bantu yonso ya mbi. (Tanga Nkunga 37:10.) Bubu yai, bantu mingi ke salaka mambu ya mbi na kinsweki mpi mbala mingi bo ke bakaka ve ndola. (Yobi 21:7, 9) Biblia ke tuba nde: “Meso ya Nzambi ke vandaka na zulu ya banzila ya muntu, mpi yandi ke monaka bitambi na yandi yonso. Mudidi to mpimpa ya ngolo kele ve kisika bantu ya ke salaka mambu ya mbi lenda bumbana.” (Yobi 34:21, 22) Bantu kele ve ata ti kisika ya kubumbana sambu Yehowa kumona bo ve. Yehowa ke monaka mambu yonso ya mbi yina bantu ke salaka. Na  nima ya Armagedoni, beto ta tala kisika yina bantu ya mbi vandaka kansi beto ta mona bo ve. Bo ta vila kimakulu!—Nkunga 37:12-15.

6. Banani ta bikala ntangu bantu ya mbi ta fwa, mpi sambu na nki nsangu yai ke pesa kiese?

6 Banani ta bikala na ntoto ntangu bantu ya mbi ta fwa? Yehowa ke sila nde: “Bantu ya kudikulumusa ta baka ntoto, mpi bo ta wa kiese mingi kibeni na ngemba ya mingi.” Biblia ke yika nde: “Bantu ya lunungu ta baka ntoto, mpi bo ta zinga kimakulu na zulu na yo.” (Nkunga 37:11, 29) “Bantu ya kudikulumusa” kele bantu yina ke longukaka mambu ya Yehowa mpi ke zitisaka yo. “Bantu ya lunungu” kele bantu yina ke salaka mambu yina Nzambi ke zolaka. Bubu yai, bantu ya mbi kele mingi kuluta bantu ya lunungu. Kansi na ntoto ya mpa, kaka bantu ya kudikulumusa mpi ya lunungu ta vanda, bo ta kumisa ntoto paladisu!

BIMVUKA YA KE SALAKA MAMBU YA MBI

7. Inki mutindu bimvuka ya mbi ke niokula beto bubu yai?

7 Inki mutindu bimvuka yina ke salaka mambu ya mbi ke niokula beto bubu yai? Bubu yai, bimvuka ke sala mambu mingi ya mbi. Mu mbandu, mabundu ke kusa bantu mingi. Yo ke tuba mambu ya luvunu sambu na Nzambi, sambu na luzingu na bilumbu ke kwisa, mpi ke pusa bantu na kundima ve mambu ya Biblia. Baluyalu ya mbi ke zola bamvita, mubulu mpi ke niokula bansukami mpi bantu yina kele ve ngolo. Baluyalu yai ke landa kukuma ti bimvwama mingi mpi ngolo sambu bo kele ti kikalulu ya kupona-pona mpi ke baka mbongo na mutindu ya mbi. Bimvuka yai ya lukasi ke monaka ve mbi ntangu bo ke bebisa mupepe, mfinda, masa mpi bima ya nkaka ya lugangu sambu na mambote na bo. Ya kieleka, bimvuka mingi ke sala mambu ya mbi yina ke niokula bantu mpi ke bebisa ntoto.

8. Inki Biblia ke tuba sambu na bimvuka yina ke monana ngolo bubu yai?

8 Inki Yehowa ta sala? Mpasi ya nene ta yantika ntangu bimvuka ya ngolo ya politiki ta nwanisa mabundu ya luvunu yina Biblia ke binga nkento ya ndumba to Babilone ya Nene. (Kusonga 17:1, 2, 16; 18:1-4) Mabundu yai ta fwa kimakulu. Kansi nki ta kumina bimvuka ya mbi? Biblia ke tuba nde yo kele ngolo bonso bangumba mpi bisanga. (Kusonga 6: 14.) Ata mpidina, Biblia ke tuba nde baluyalu mpi bimvuka yonso ya mbi ya ke ndimaka ve Kimfumu ya Nzambi ta fwa. Mambu yai ta salama na kitini ya nsuka ya mpasi ya nene. (Yeremia 25:31-33) Na nima, bimvuka ya ke salaka mambu ya mbi ta vila kimakulu!

9. Inki ke ndimisa beto nde ntoto ya mpa ta vanda ya kuyidika mbote?

9 Inki kima ya mpa Nzambi ta tula na kisika ya bimvuka ya mbi? Keti kele ti kimvuka yina ta bikala awa na ntoto na nima ya Armagedoni? Biblia ke tuba nde: “Beto ke vingila zulu ya mpa mpi ntoto ya mpa, mpi na kati na yo lunungu ta vanda.” (2 Piere 3:13) Zulu ya ntama kele baluyalu ya mbi, ntoto ya ntama kele bantu yina bo ke yala. Inki Nzambi ta tula na kisika na yo ntangu yo ta vanda diaka ve? Yandi ta tula “zulu ya mpa mpi ntoto ya mpa.” Zulu ya mpa kele luyalu ya mpa, yina Yezu ta yala ti bantu 144 000. Ntoto ya mpa kele bantu  yina Kimfumu ya Nzambi ta yala. Yezu mpi bantu yina ta yala ti yandi ta landa mbote-mbote mbandu ya Yehowa, Nzambi ya ndonga. (1 Bakorinto 14:33) Yo yina, ndonga ya mbote ta vanda na “ntoto ya mpa.” Bantu ya mbote ta kumisa ntoto kitoko. (Nkunga 45:16) Bo ta vanda na nsi ya lutwadisu ya Kristu mpi bantu 144 000. Yindula mutindu luzingu ta vanda ntangu bimvuka yonso ya mbi ta vanda diaka ve mpi ntoto ya mvimba ta vanda kaka ti kimvuka mosi ya mbote yina ta bebaka ve ata fioti!

BISALU YA MBI

10. Inki mambu ya mbi bantu ke sala na kisika yina nge ke zingaka, mpi nki mutindu yo ke niokula nge ti bantu ya dibuta na beno?

10 Inki mutindu bisalu ya mbi ke niokula beto bubu yai? Bubu yai, ntoto me fuluka ti mansoni, luvunu, mpi mubulu. Bantu ke vweza bansiku ya Yehowa, bo ke sala mambu mingi yina ke pusa bantu na kumona nde mansoni, luvunu mpi mubulu kele mbi ve. (Yezaya 5:20) Bibuti fwete tanina bana na bo na mambu yai ya mbi. Sambu beto ke zinga na nsi-ntoto yina ke zitisaka ve bansiku ya Nzambi, beto yonso fwete sala ngolo sambu na kutanina kinduku na beto ti Yehowa.

11. Lufwa ya Sodome ti Gomore ke longa beto nki?

11 Inki Yehowa ta sala? Yibuka mambu yina Yehowa salaka ntangu mambu ya mbi vandaka kusalama na Sodome ti Gomore. (Tanga 2 Piere 2:6-8.) Loti, muntu ya mbote, ti dibuta na yandi vandaka kuniokwama sambu na mambi yina bantu vandaka kusala. Yehowa fwaka bantu yonso na bambanza yina sambu na kumanisa mambi yina vandaka kusalama kuna. Kansi mambu yina yandi salaka ke monisa mambu yina yandi ta sala bantu ya mbi ya bilumbu na beto. Mutindu Yehowa manisaka mansoni na ntangu ya ntama, yandi ta sala yo mpi na bilumbu na beto ntangu yandi ta fwa nsi-ntoto yai.

12. Inki nge ke vingala kusala na ntoto ya mpa?

12 Inki mambu ya mpa bantu ta sala na kisika ya bisalu ya mbi? Na ntoto ya mpa, beto ta salaka mambu mingi ya mbote. Mu mbandu, kukumisa ntoto paladisu, kutunga banzo na beto mosi mpi ya bantu yina beto ke zolaka. Beto ta yamba bantu mingi yina ta futumuka, ta longa bo mambu ya Yehowa mpi mambu ya mbote yina yandi me sadila beto. (Yezaya 65:21, 22; Bisalu 24:15) Na ntoto ya mpa, beto ta salaka mambu yina ta pesa beto kiese mpi ta kumisa Yehowa.

BAMPASI

13. Inki bampasi kukolama ya Satana, Adami mpi Eva me natilaka beto?

13 Inki mutindu bampasi ke niokula beto bubu yai? Ntoto yai me fuluka ti bantu ya mbi, bimvuka ya mbi mpi bisalu ya mbi, yo yina bampasi kele mingi. Beto yonso ke niokwama na mpasi ya bitumba, ya kinsukami, ya kupona-pona bampusu ya nitu, maladi mpi lufwa. Bampasi yantikaka sambu Satana, Adami mpi Eva kolamaka na Yehowa. Kukolama na bo me natilaka beto yonso bampasi.

14. Inki Yehowa ta sala sambu na bampasi?

14 Inki Yehowa ta sala sambu na bampasi? Yehowa me sila nde yandi ta manisa bitumba. (Tanga nkunga 46:8, 9.) Yandi ta katula maladi. (Yezaya  33:24) Yandi ta katula lufwa kimakulu. (Yezaya 25:8) Yandi ta manisa kinsukami. (Nkunga 72:12-16) Yehowa ta katula mpi bampasi yonso yina ke yangisaka bantu bubu yai. Nkutu, yandi ta katula mpeve ya mbi ya Satana ti bademo na yandi, mpeve yina ke pusaka bantu na kusala mambu ya mbi!—Baefezo 2:2.

Yindula mutindu luzingu ta vanda ntangu bitumba, maladi mpi lufwa ta vanda diaka ve! (Tala paragrafe 15)

15. Inki mambu ta vanda diaka ve na nima ya Armagedoni?

15 Yindula mutindu luzingu ta vanda ntangu bitumba, maladi mpi lufwa ta vanda diaka ve! Bantu ta yindula diaka ve mambu ya bitumba. Beto ta vanda diaka ve na mfunu ya lopitalu, ya minganga, ya bisika ya kubumba bamvumbi mpi maziamu. Sambu bantu ya mbi ta vanda diaka ve, beto ta vanda ve na mfunu ya bapolisi, nkutu beto ta vanda ve na mfunu ya bansapi na banzo na beto! Mambu yonso ya mbi yina ke yangisaka bantu bubu yai ta vanda diaka ve, yo ta vila kimakulu.

16, 17. (a) Inki mutindu bantu yina ta guluka na Armagedoni ta kudiwa? Pesa mbandu. (b) Inki ke ndimisa beto nde beto ta guluka ntangu nsi-ntoto yai ta fwa?

16 Inki mutindu luzingu ta vanda ntangu bampasi ta mana? Yo kele pete ve na kubakisa. Beto me yikanaka kuzinga na bampasi, yo yina bantangu ya nkaka beto lenda bakisa kibeni ve mutindu yo ke niokulaka beto. Mu mbandu, bantu ya ke zingaka pene-pene ya nzila yina bakamio ke lutaka mingi me yikanaka ti makelele ya kamio, nkutu bo ke waka diaka ve makelele. Bantu yina ke zingaka na kisika ya mvindu mingi me yikanaka ti nsudi na yo, nkutu bo ke waka diaka ve nsudi yina. Kansi ntangu Yehowa ta katula mambi yonso, luzingu ya bantu ta soba kibeni, bantu ta vanda na kiese mingi!

17 Inki mambu ya mpa ta vanda na kisika ya bampasi yina ke niokula beto bubu yai? Nkunga 37:11 ke tuba nde bantu ta wa kiese mingi kibeni mpi bo ta vanda na ngemba ya mingi. Yo kele kiese na kuzaba nde Yehowa ke yidikila beto luzingu ya mutindu yai! Na bilumbu yai ya mpasi, konso muntu lenda sala bikesa ya kulanda kukangama ngolo na Yehowa mpi na dibundu na yandi. Mambu ya nge ke vingila na bilumbu ke kwisa kele ya mbote kuluta, yo yina yindula yo mbala na mbala, ndima nde yo kele ya kieleka, mpi zabisa yo bantu ya nkaka. (1 Timoteo 4:15, 16; 1 Piere 3:15) Kana nge sala mpidina, ntangu nsi-ntoto yai ta fwa, nge ta guluka mpi ta zinga na kiese mvula na mvula!

^ par. 1 Paragrafe yai ke tubila mambu yina vandaka kusalama ntama na baboloko ya nkaka ya Etats-Unis.