Kwenda na mambu ke na kati

Kwenda na tansi ya malongi

 DISOLO YA KULONGUKA 24

Bwisa Bangindu Yonso Yina Ke Kangaka Nzayilu ya Nzambi!

Bwisa Bangindu Yonso Yina Ke Kangaka Nzayilu ya Nzambi!

“Beto ke bwisaka bangindu mpi konso kima ya kunanguka yina ke kangaka nzayilu ya Nzambi.”—2 BAK. 10:5.

NKUNGA 124 Vanda Kwikama

MAMBU YINA DISOLO YAI KE TUBILA *

1. Inki lukebisu ntumwa Polo pesaka Bakristu yina bo me tulaka mafuta?

NTUMWA POLO pesaka lukebisu yai: “Beno yambula.” Beto yambula nki? Yandi ke tuba nde: “Beno yambula kulanda ngidika yai ya bima.” (Bar. 12:2) Polo pesaka lukebisu yai na Bakristu ya mvu-nkama ya ntete. Sambu na nki yandi pesaka lukebisu yai na Bakristu yina kudipesaka na Nzambi mpi bayina bo tulaka mafuta na mpeve santu?—Bar. 1:7.

2-3. Inki mutindu Satana ke sosaka kukatula beto na lweka ya Yehowa, kansi nki mutindu beto lenda yambula bangindu yina me “kangamaka ngolo” na mabanza na beto?

2 Polo vandaka kudiyangisa ziku sambu Bakristu ya nkaka kumaka kundima bangindu ya luvunu mpi ya kukonda mfunu ya nsi-ntoto ya Satana. (Baef. 4:17-19) Yo lenda kumina beto mpi. Satana, nzambi ya nsi-ntoto yai, ke sadilaka mayele mingi sambu na kukatula beto na lweka ya Yehowa. Mu mbandu, yandi ke sadilaka mpusa na beto ya kusosa kiyeka to ya kuzabana mingi. Nkutu, yandi lenda sadila mutindu beto yelaka, kisika beto ke zingaka mpi mambu ya beto me longukaka na nzo-nkanda sambu na kupusa beto na kuyindula bonso yandi.

3 Keti beto lenda yambula bangindu yina “me kangamaka ngolo” na mabanza na beto? (2 Bak. 10:4) Mvutu kele na mambu yai ya Polo ke tuba: “Beto ke bwisaka bangindu mpi konso kima ya kunanguka yina ke kangaka nzayilu ya Nzambi, mpi beto ke tulaka konso dibanza na kimpika sambu na kunata  yo na kulemfukila Kristu.” (2 Bak. 10:5) Ee, Yehowa ta sadisa beto na kuyambula bangindu ya mbi. Mutindu nkisi ke lembikaka ngolo ya ndikila (poison), Ndinga ya Nzambi ke sadisaka beto mpi na kulembika ngolo ya ndikila ya nsi-ntoto ya Satana.

“BENO KUMISA MABANZA NA BENO YA MPA”

4. Inki bansoba bampangi mingi salaka ntangu bo zabaka kieleka?

4 Yindula bansoba yina nge salaka ntangu nge zabaka kieleka ya Ndinga ya Nzambi mpi nge bakaka lukanu ya kusadila Yehowa. Mu mbandu, bampangi mingi me yambulaka mambu ya mbi. (1 Bak. 6:9-11) Beto ke waka kiese mutindu Yehowa ke sadisaka beto na kuyambula bikalulu ya mbi.

5. Inki mambu zole kele na Baroma 12:2?

5 Ata mpidina, beto fwete landa kusala bansoba. Ata beto me yambulaka kusala masumu ya nene yina beto vandaka kusala na ntwala ya kubaka mbotika, beto fwete sala ngolo sambu kima mosi ve kupusa beto na kuvutukila masumu yina. Inki lenda sadisa beto? Polo tubaka nde: “Beno yambula kulanda ngidika yai ya bima, kansi beno soba kimuntu na beno mpi beno kumisa mabanza na beno ya mpa.” (Bar. 12:2) Yo yina, beto fwete sala mambu zole. Ya ntete, beto fwete “yambula kulanda” nsi-ntoto yai. Ya zole, beto fwete “soba kimuntu na [beto]” mpi kukumisa mabanza na beto ya mpa.

6. Bangogo ya Yezu ya kele na Matayo 12:43-45 ke longa beto nki?

6 Nsoba yina Polo ke tubila kele ve ya zulu-zulu. Yo ke tadila kimuntu na beto ya mvimba. (Tala lupangu “ Kimuntu ya Mpa to Nsoba ya Zulu-Zulu?”) Beto fwete kumisa mabanza na beto ya mpa disongidila bikalulu, mawi mpi bampusa na beto. Yo yina beto yonso fwete kudiyula nde, ‘Keti bansoba yina mono me salaka sambu na kukuma Mbangi ya Yehowa kele ya zulu-zulu to ya kieleka?’ Nsoba yai kele  mfunu. Bangogo ya Yezu yina kele na Matayo 12:43-45 ke monisa mambu yina beto fwete sala. (Tanga.) Baverse yai ke monisa kieleka mosi ya mfunu: Yo me fwana kaka ve na kuyambula bangindu ya mbi kansi beto fwete fulusa mabanza na beto ti bangindu ya Nzambi.

‘KUMA YA MPA NA NGOLO YINA KE TWADISA MABANZA NA NGE’

7. Inki mutindu beto lenda soba kibeni kimuntu na beto ya kati?

7 Keti yo kele pete na kusoba kibeni kimuntu na beto ya kati? Ndinga ya Nzambi ke tuba nde: “Beno fwete landa kukuma ya mpa na ngolo yina ke twadisaka mabanza na beno, mpi beno fwete lwata kimuntu ya mpa yina bo gangaka na kuwakana ti luzolo ya Nzambi na lunungu mpi na kwikama ya kieleka.” (Baef. 4:23, 24) Ee, beto lenda soba kimuntu na beto ya kati kansi yo kele pete ve. Beto fwete sala bikesa mingi sambu na kubuya bangindu mpi mambu ya mbi, diaka beto fwete soba “ngolo yina ke twadisaka mabanza” na beto. Yo ke tadila mpi kusoba banzala na beto, bikalulu na beto mpi bikuma yina ke pusaka beto na kusala mambu. Yo ke lombaka kusala bikesa ntangu yonso.

8-9. Inki mutindu mbandu ya mpangi mosi ke monisa mfunu ya kusoba kibeni kimuntu na beto ya kati?

8 Beto tadila mbandu ya mpangi-bakala mosi yina vandaka mubulu. Na ntwala ya kubaka mbotika, yandi yambulaka kunwa makaya mpi kunwana, nsoba yina taka kimbangi ya mbote kisika yina yandi vandaka kuzinga. Kansi mwa bilumbu fioti na nima ya mbotika na yandi, yandi kutanaka ti mumekamu. Muntu mosi yina lawukaka malafu kwisaka na nzo na yandi mpi yantikaka kusosila yandi. Ntete mpangi-bakala buyaka kunwana. Kansi ntangu muntu yina vwezaka zina ya Yehowa, mpangi-bakala waka makasi kibeni. Yandi basikaka mpi bulaka muntu yina. Sambu na nki yandi salaka mutindu yina? Ata kulonguka ya Biblia sadisaka yandi na kuyambula kikalulu ya mubulu kansi yandi sobaka ntete ve ngolo yina ke twadisaka mabanza na yandi disongidila yandi sobaka ntete ve kibeni kimuntu na yandi ya kati.

9 Ata mpidina, mpangi-bakala landaka kusala bikesa. (Bing. 24:16) Bankuluntu sadisaka yandi mpi yandi landaka kuyela. Nsuka-nsuka yandi kumaka nkuluntu. Kilumbu mosi na nkokila, na nganda ya Nzo ya Kimfumu, yandi kutanaka diaka ti diambu ya mutindu mosi. Muntu mosi yina lawukaka malafu zolaka kubula nkuluntu mosi. Inki mpangi-bakala salaka? Na mawete yonso, yandi solulaka ti muntu yango, lembikaka yandi mpi nataka yandi na nzo na yandi. Inki salamaka? Mpangi-bakala sobaka kibeni ngolo yina ke twadisa mabanza na yandi. Kima ya mfunu kele nde yandi kumaka muntu ya ngemba, ya kudikulumusa mpi yo pesaka Yehowa kiese.

10. Kusala bansoba ke lombaka nki?

10 Bansoba ya mutindu yai ke lombaka ntangu mpi bikesa. Beto fwete “sala ngolo kibeni” ata na nima ya bamvula. (2 Pie. 1:5) Bansoba yai ta salama ve kaka sambu beto me salaka bamvula mingi “na kieleka.” Beto fwete sala bikesa sambu na kusoba kimuntu na beto ya kati. Kele ti mambu yina beto fwete sala sambu na kusoba kimuntu na beto. Bika beto tubila mambu yango.

MUTINDU YA KUSOBA NGOLO YINA KE TWADISAKA MABANZA NA BETO

11. Inki mutindu kisambu ke sadisaka beto na kusoba ngolo yina ke twadisaka mabanza na beto?

11 Kisambu kele diambu ya ntete mpi yo kele mfunu mingi. Beto fwete samba mutindu muyimbi-bankunga sambaka nde: “Ganga ntima  ya mpembe na kati na mono, O Nzambi, mpi tula na kati na mono mpeve ya mpa, mpeve ya ngolo.” (Nk. 51:10) Sambu na kusoba ngolo yina ke twadisa mabanza na beto, beto fwete lomba Yehowa na kusadisa beto. Inki ke ndimisa beto nde Yehowa ta sadisa beto? Mambu yina Yehowa silaka bantu ya Izraele yina vandaka ntu-ngolo na bilumbu ya Ezekiele lenda pesa beto kikesa: “Mono ta pesa bo ntima yina kele na bumosi, mpi mono ta tula mpeve mosi ya mpa na kati na bo . . . mpi ta pesa bo ntima ya nsuni, [disongidila, yina ke lemfukaka kukonda mpasi na lutwadisu ya Nzambi].” (Ezek. 11:19; noti na nsi ya lutiti) Yehowa vandaka ti luzolo ya kusadisa bantu yina ya Izraele na kusoba; yandi kele ti luzolo ya kusadisa beto mpi.

12-13. (a) Mutindu Nkunga 119:59 ke monisa yo, nki mambu beto fwete yindula mingi? (b) Inki bangiufula beto fwete kudiyula?

12 Kuyindula mingi kele diambu ya zole mpi yo kele mfunu. Ntangu beto ke tanga Ndinga ya Nzambi konso kilumbu, beto fwete baka ntangu ya kuyindula mingi bangindu mpi bikalulu yina beto fwete soba. (Tanga Nkunga 119:59; Baeb. 4:12; Yak. 1:25) Beto fwete zaba bikalulu yina ke pusaka beto na kulanda mabanza ya mbi ya nsi-ntoto. Beto fwete ndima na masonga yonso bifu na beto mpi kusala ngolo na kuyambula yo.

13 Mu mbandu, kudiyula nde: ‘Keti na ntima na mono, mono kele diaka ti mwa kikalulu ya kulula to ya kimpala?’ (1 Pie. 2:1) ‘Keti mono ke vandaka diaka ti mwa lulendo na mutindu mono yelaka, sambu na nzo-nkanda ya mono salaka to sambu mono kele ti mbongo?’ (Bing. 16:5) ‘Keti mono ke vwezaka bantu ya nkaka yina kele ve ti bima bonso mono to bantu ya mpusu ya nkaka?’ (Yak. 2:2-4) ‘Keti mono ke zolaka mambu ya nsi-ntoto yai?’ (1 Yoa. 2:15-17) ‘Keti mono ke sepelaka ti mansoni mpi bansaka ya mubulu?’ (Nk. 97:10; 101:3; Amo. 5:15) Bamvutu na bangiufula yai ke monisa pwelele mambu yina beto fwete soba. Kana beto yambula bangindu yina “me kangamaka ngolo” na ntima na beto, beto ta sepedisa Tata na beto ya zulu.—Nk. 19:14.

14. Sambu na nki yo kele mfunu na kupona banduku ya mbote?

14 Kupona banduku ya mbote kele diambu ya tatu ya mfunu. Ata beto bakisa yo to ve, banduku ke sadisaka to ke bebisaka beto. (Bing. 13:20) Na nzo-nkanda to na kisalu, beto ke zingaka ti bantu yina ke sadisaka beto ve na kuvanda ti mabanza ya Nzambi. Kansi, beto lenda zwa banduku ya mbote na dibundu. Banduku yai na dibundu ta sadisa beto na “kumonisa zola mpi na kusala bisalu ya mbote.”—Baeb. 10:24, 25.

“VANDA NA LUKWIKILU YA NGOLO”

15-16. Inki mutindu Satana ke sosaka kusoba mabanza na beto?

15 Kuvila ve nde lukanu ya Satana kele ya kusoba mabanza na beto. Yandi ke sadilaka malongi ya mutindu na mutindu sambu na kubebisa kieleka ya Ndinga ya Nzambi.

16 Satana ke sadilaka bangiufula bonso yina yandi yulaka Eva na kilanga ya Edeni nde: “Keti Nzambi tubaka kibeni nde . . . ?” (Kuy. 3:1) Na nsi ntoto yai ya Satana ke yala, beto ke waka bantu mingi ke kudiyula nde: ‘Keti Nzambi ke buyaka kibeni nde babakala to bankento kukwelana bo na bo? Keti Nzambi ke buyaka kibeni nde bantu kusala nkinsi ya lubutuku mpi ya kilumbu ya kubutuka? Keti Nzambi ke buyaka kibeni nde beno vutula ve menga? Keti Nzambi ya zola ke buyisaka beno kibeni na kukangama ve ti bantu yina bo me basisaka na dibundu?’

17. Inki beto fwete sala kana muntu me yula beto bangiufula yina ke meka balukwikilu na beto mpi mutindu Bakolosai 2:6, 7 ke monisa yo, nki mambote beto ta baka?

 17 Beto fwete ndima mambu yina beto ke kwikilaka. Kana beto ke bika bangiufula yina ke meka lukwikilu na beto na mabanza, beto ta kuma ti baketi-keti. Baketi-keti yango lenda bebisa mabanza mpi lukwikilu na beto. Inki beto fwete sala? Ndinga ya Nzambi ke lomba beto na kusoba mabanza na beto sambu beto kudindimisa “luzolo ya Nzambi yina kele ya mbote, yina yandi lenda ndima, mpi yina kele ya kukuka.” (Bar. 12:2) Kana beto ke longuka mbala na mbala, beto ta ndima kibeni bakieleka yina beto me zabaka na Biblia. Beto ta ndima kibeni nde bansiku ya Yehowa kele mbote. Beto ta vanda bonso nti yina misisa me kotaka mingi na ntoto mpi beto ta “vanda na lukwikilu ya ngolo.”—Tanga Bakolosai 2:6, 7.

18. Inki ta sadisa beto na kuditanina na mambu ya mbi ya nsi-ntoto ya Satana?

18 Ata muntu mosi ve ta kumisa lukwikilu na nge ngolo, yo yina, landa kukumisa ngolo yina ke twadisaka mabanza na nge ya mpa. Samba mbala na mbala; lomba Yehowa lusadisu ya mpeve santu na yandi. Yindula mingi kibeni, landa kutadila mbote mabanza mpi bikuma yina ke pusaka nge na kusala mambu. Pona banduku ya mbote, kangama ti bantu yina lenda sadisa nge na kusoba kimuntu mpi mabanza na nge. Mpidina, nge ta kuditanina na mambu ya mbi ya nsi-ntoto ya Satana mpi nge ta yambula kibeni “bangindu mpi konso kima ya kunanguka yina ke kangaka nzayilu ya Nzambi.”—2 Bak. 10:5.

NKUNGA 50 Kisambu na Mono ya Kudipesa

^ par. 5 Luzingu na beto ya ntama, bangindu mpi mutindu beto yelaka lenda tomisa to kubebisa mabanza na beto. Bikalulu ya nkaka ya mbi lenda kuma kimuntu na beto mpi yo lenda vanda mpasi sambu na kuyambula yo. Disolo yai ta tubila mutindu beto lenda yala bikalulu yai yonso ya mbi.