Kwenda na mambu ke na kati

Mayi 23, 2019
RUSSIE

Tribinale ya Nene Me Ndima nde Dennis Christensen Fwete Kota Boloko

Tribinale ya Nene Me Ndima nde Dennis Christensen Fwete Kota Boloko

Na Mayi 23, 2019, bazuzi tatu ya tribinale ya Oriol buyaka mukanda yina avocat ya Dennis Christensen pesaka sambu bo tadila diaka mambu ya Dennis mpi tribinale yango me ndima lukanu yina tribinale ya ntete bakaka ya kukanga Dennis na boloko bamvula sambanu. Kiteso ya bampangi-babakala mpi bankento 80 kwisaka kulanda mutindu bo ke zenga mambu yina. Bamfumu ya nene ya Australie ti ya Danemark vandaka mpi pana. Bantu mpi bima yina ke mwangaka nsangu na ntoto ya mvimba me tubila mingi mutindu bazuzi me sambisa mambu yai.

Na bangonda tatu ya me luta, disongidila banda ya bo zengilaka mpangi Christensen boloko na mbala ya ntete na Februari, bapolisie me kwenda na banzo 115 ya Bambangi ya Yehowa. Diaka, kaka na nsungi yina, mambu ya kufunda Bambangi ya Yehowa me salama mbala tatu. Yo me luta nkutu kufunda yina bo vandaka kufunda bo na ntwala nde bazuzi kuzenga makambu yai.

Beto ke samba sambu na mpangi Christensen mpi sambu na bampangi na beto yonso na Russie. Beto ke tula ntima nde Yehowa “kele pene-pene ya bantu yonso yina ke bingaka yandi” mpi yandi ta landa kusadisa bampangi na beto na kulanda kuvanda kikesa ata bantu ke niokula bo—Bankunga 145:18.