Na Mayi 6, 2017, Bambangi ya Yehowa kiteso ya 130 pesaka maboko na kutula bunkete na Bryukhovychi mfinda mosi pene-pene ya Lviv na Ukraine. Bampangi ya luzolo banda na bamvula 22 ti 80 ya ke zingaka mpi ke salaka na biro ya filiale ya Bambangi ya Yehowa ya Ukraine yina vandaka pene-pene ya mfinda yina. Bo yidikaka ba ektare 50 mpi katulaka bakilo 600 ya mvindu kaka na bangunga tatu.

Mykhailo Splavinskyi yina kele enzeniere mpi ke talaka bisalu ya kutula bunkete na Mfinda ya Lviv Breeding mpi Drilling Center tubaka nde: “Bambangi ya Yehowa vandaka bantu ya ntete yina pesaka maboko na kisalu ya kutula bunkete na mfinda mpi bo ke salaka yo konso mvula banda na 2014.”

Splavinskyi ke tuba nde “Bikuma kele zole yina ke sala nde mvindu kufuluka mingi na mfinda.” “Ya ntete, bantu ke losaka mvindu kaka na mfinda yina. Ya zole, bakamio ya bakompani ke kwendaka kulosa bamvindu na bo kuna.”

Mvindu ke bebisaka mfinda. Splavinskyi ke tuba nde “mvindu ke polaka na nima ya bilumbu mingi. Na nima yo ke bebisaka bamasa mpi yo ke nataka bampasi na luzingu.” Kana nsemo ya ntangu ke bula na milangi ya kupasuka, yo ke basisaka tiya ya mingi mpi yo ke yokaka mfinda. Bipesi ya milangi mpi bantunga yina bo me losa ke vandaka kibeni kigonsa sambu na bana ya fioti. Yandi ke yika nde: “Kana bo me katula bamvindu yai yonso, bigonsa ta vanda diaka ve.”

Yo ke vandaka kibeni mpasi na kutula bunkete na ba ektare 3300. Yandi ke tuba diaka nde: “Beto kele ti bamfinda tanu ya beto fwete tula bunkete. Yo yina, yo kele mpasi sambu na kutula bunkete na bamfinda yai yonso. Na mvula mosi beto lombaka na bantu yonso na kupesa maboko na kisalu ya kutula bunkete na mfinda.”

Bambangi ya Yehowa yina pesaka maboko na kisalu ya kutula bunkete vandaka ti bagant, basashe, barato mpi bo vukisaka milangi ya kupasuka, bapapier, bapine ya kufwa, bibende mpi bantunga yina bo me sadilaka. Ihor Fedak yina ke salaka na mfinda yango ke tuba nde: “Kisika yina Bambangi ya Yehowa salaka me kumaka bunkete mingi.”

Ata nsiku lombaka ve na kuyidika bima yina bo losaka, Bambangi ya Yehowa vukisaka milangi, bapapier, basashe mpi bo yidikaka yo sambu bantu kusadila yo diaka. Na nima, Bambangi vukisaka bima yina yonso mpi bo nataka yo na kompani mosi ya bwala yina. Na 2016, kompani yina futaka Bambangi ya Yehowa na luzolo yonso sambu na mvindu yina bo katulaka. Fedak ke tuba nde: “Mono ke pesa Bambangi ya Yehowa matondo mingi sambu bo me sadisa beto.”

Bambangi ya Yehowa ke sepelaka mutindu bo pesaka maboko na kisalu ya kutula bunkete na mfinda. Bo ke zolaka kusadisa bantu mpi kuyidika mfinda. Volker ke tuba nde: “Kutula bunkete ke bebisaka ve lukumu na mono. Kusadila bantu ya nkaka mambu ya mbote ke kima ya lukumu mpi yo ke pesaka mono kiese.”

Anzhelika ke yika nde: “Sambu na mono, kima ya mfunu kele kusosa ve kuzaba muntu yina losaka mvindu kansi kukatula yo.” Lois kele ti bamvula 78, yandi kwendaka mpi na kampanie yina ya kutula bunkete. Yandi ke tuba nde: “Na kisika ya kuwa makasi kana nge me mona mvindu na nzila, yo kele mbote nge lokuta mpi nge losa yo.”

Wieslaw ke tuba nde: “Bantu ke monaka beto me lwata mbote mpi me tula kravate sambu na kuta kimbangi kansi beto ke tulaka bunkete na mfinda mpi ke salaka bisalu ya nkaka sambu na mambote ya bantu.”