Kwenda na mambu ke na kati

Kampanye Mosi Yina Gulusaka Luzingu ya Bantu

Kampanye Mosi Yina Gulusaka Luzingu ya Bantu

Sambu na kusadisa bantu mingi yina ke sosaka kudifwa na Mexique, na Tabasco, Bambangi ya Yehowa salaka kampanye mosi ya mfunu ya bangonda zole na 2017 sambu na kukabula Réveillez-vous ! ya Aprili 2014 yina vandaka ti ntu-diambu: “Trois bonnes raisons de s’accrocher à la vie.” Bantu mingi sepelaka na kampanye yina.

Lusadisu na Ntangu ya Mbote

Faustino, Mbangi mosi ya Yehowa, solulaka ti nkento mosi yina vandaka kudiyangisa sambu na mwana na yandi ya bakala yina vandaka ti bamvula 22. Leke yina vandaka kuniokwama na mabanza mpi sosaka kudifwa. Nkento yina zabaka ve mutindu ya kusadisa mwana na yandi. Kansi ntangu Faustino pesaka yandi zulunalu, yandi tubaka nde, “Yo kele kima yina mwana na mono kele na yo mfunu.” Kilumbu yina landaka, Faustino vutukilaka mwana ya nkento yina mpi bo tadilaka bandongisila ya Biblia yina vandaka na kati ya zulunalu yango. Na nima ya kusolula ti yandi mbala mingi, yandi sobaka mabanza. Faustino ke tuba nde: “Ntangu yai, mwana-bakala yango me kumaka mbote mpi na kiese.” Na nima, mwana-bakala yango songaka mpangi na yandi yina ke niokwamaka mpi na mabanza mambu yina yandi ke longukaka.

Karla, yina ke zingaka na mbanza Huimanguillo, sadilaka zulunalu yai sambu na kusadisa nduku na yandi ya nzo-nkanda. Karla ke tuba nde: “Mono monaka mwana-nkento mosi ya bamvula 14 ya nzo-nkanda na beto mawa-mawa. Mono solulaka ti yandi mpi yandi songaka mono mambu ya dibuta na bo. Ntangu beto vandaka kusolula, mono monaka bidimbu ya mputa na diboko na yandi ya kimama.” Yo monanaka nde yo vandaka kikalulu na yandi ya kudilwadisa na maboko mpi na makulu. Yandi vandaka ve na kiese mpi vandaka kumona nde luzingu na yandi vandaka ve mfunu. Karla pesaka yandi Réveillez-vous ! Na nima ya kutanga yo, yandi songaka Karla nde ziku bo sonikaka mukanda yai sambu na yandi. Na kiese yonso, yandi tubaka nde ntangu yai luzingu kele na mfunu.

Na mbanza Villahermosa, bakala mosi vandaka kudiyangisa mingi. Bo katulaka yandi na kisalu mpi nkento na yandi yambulaka yandi ti bana. Yandi sambaka Nzambi sambu na kuzwa lusadisu kansi yandi zwaka yo ve. Ntangu yandi sosaka kudifwa, Bambangi ya Yehowa zole, Martín ti Miguel kokulaka na nzo na yandi. Yandi kangulaka nzo mpi Bambangi yina pesaka yandi Réveillez-vous ! Ntangu bakala yina monaka mambu yina vandaka na lutiti ya zulu, yandi bakisaka nde yo vandaka mvutu yina Nzambi pesaka na kisambu na yandi. Martín ti Miguel sadilaka Biblia sambu na kupesa yandi kikesa mpi ntangu bo vutukilaka yandi bilumbu fioti na nima, bo monaka nde yandi me kuma na ngemba. Bo me kumaka kulonguka Biblia ti bakala yango bilumbu zole na mposo mosi.

Bantu ya Boloko Me Wa Nsangu ya Mbote

Kaka na kampanye yina, Bambangi ya Yehowa kwendaka kutala baboloko mingi na Tabasco sambu na kupesa bantu ya boloko bandongisila ya Biblia yina lenda sadisa bo na kuvanda ti luzingu ya mbote. Bambangi ya Yehowa yidikaka masolo yina vandaka ti bavideo, badiskure mpi mutindu bo lenda solula ti bantu sambu na kutadila mambu yina vandaka na zulunalu yango yina tubilaka bikuma yina bantu lenda landa kuzinga. Bantu ya boloko mpi bantu yina ke salaka kuna sepelaka mingi na kampanye yina. Mu mbandu, muntu mosi ya boloko tubaka nde: “Mono sosaka kudifwa mbala tatu. Bantu mingi vandaka kusonga mono nde Nzambi ke tudilaka mono dikebi kansi bo vandaka ve kusadila Biblia sambu na kumonisa yo. Malongi na beno me sadisa mono mpenza.”

Bantu mingi waka nsangu ya kampanye yai. Ministre ya sante sikisaka Bambangi ya Yehowa sambu na kikesa yina bo salaka sambu na kusadisa bantu ya mbanza. Zulunalu mosi ya mbanza yina sonikaka disolo mosi yina ke tadila kampanye yai. Ntu-diambu na yo vandaka: “Bo Me Sala Ngolo Sambu na Kusadisa Bantu na Kudifwa Ve.”