Kwenda na mambu ke na kati

Bambangi ya Yehowa Me Kwenda Kusosa Bantu ya Babwala ya Canada

Bambangi ya Yehowa Me Kwenda Kusosa Bantu ya Babwala ya Canada

Bantu ke tubaka bandinga ya bwala kuluta 60 na Canada mpi bantu kiteso ya 213000 ya Canada ke tubaka nde ndinga mosi na kati ya bandinga yai kele ndinga na bo.

Sambu na kusimba ntima ya bantu ya babwala yina, Bambangi ya Yehowa mingi me longukaka ndinga mosi na kati ya bandinga yai. Na nsuka ya 2015, bantu kuluta 250 manisaka nzo-nkanda yina Bambangi ya Yehowa yidikaka sambu na kulonga ndinga mosi na kati ya bandinga yina.

Diaka, Bambangi ya Yehowa me balulaka mikanda yina ke tendulaka Biblia mpi bavideo ya nkufi na bandinga yai nana ya Canada: Algonquin, Pied-noir (Blackfoot), Cri des plaines, Cri des marais de l’ Ouest, Inuktitut, Mohawk, Odawa, mpi Ojibwé du Nord. *

Bantu yina ke longukaka ndinga ya bantu yina ya bwala ke tuba nde yo ke vandaka mpasi. Carma ke tuba nde: “Ntangu mono yantikaka kupesa maboko na kimvuka ya bampangi yina ke balulaka mikanda na ndinga ya Blackfoot, mono kudiwaka bonso nde mono ke sala kisalu meso ya kukanga. Mono zabaka ve ndinga yina mbote. Mono vandaka kukuka mpi ve kutanga mambu ya bo me sonika na ndinga ya Backfoot to kubakisa kana bantu ya nkaka ke tuba na ndinga yai.”

Terence ke salaka ti kimvuka ya bampangi yina ke balulaka mikanda na ndinga ya cri des marais de l’ Ouest. Yandi ke tuba nde: “Bangogo mingi kele nda, mpi yo kele mpasi na kutuba bangogo yango.” Daniel kele ministre ya ntangu yonso na kisanga ya Manitoulin na Ontario. Yandi ke tuba nde: “Mikanda sambu na kusala bansosa kele mingi ve. Mutindu ya kuluta mbote ya kulonguka ndinga ya Odawa kele kukwenda kusosa mbuta-muntu mosi ya me zaba yo mbote sambu yandi longa nge.”

Keti yo me fwana mpenza kusala bikesa yai yonso? Nkento mosi ya dikanda ya Ojibwé tubaka nde bikesa yina Bambangi ya Yehowa ke sala ke swaswanisa bo ti bantu ya mabundu ya nkaka. Yandi tubaka nde mutindu Bambangi ya Yehowa ke kwendaka na banzo ya bantu mpi ke tangaka Masonuku na ndinga ya Ojibwé, bo ke sadisaka bantu na kudiwa na ngemba sambu na kutubila Biblia.”

Bert kele mbaludi. Yandi yelaka na dikanda ya Gens-du-Sang ya bantu ya India na Alberta. Yandi ke tuba nde: “Mono me monaka bantu mingi ya ke tubaka ndinga ya Blackfoot me tula mukanda na ntulu mpi ke tuba nde, ‘Yai ndinga na mono. Yo kele ya mono!’ Mbala mingi mono ke monaka mansanga ke kulumuka bo na meso ntangu bo ke talaka video mosi na ndinga na bo.”

Nkento mosi ya ke tubaka ndinga ya Cri sepelaka mingi ti video Sambu na Nki Beto Fwete Longuka Biblia? na ndinga na yandi. Yandi tubaka nde yandi vandaka kuwa bonso nde mama na yandi vandaka kusolula ti yandi.

Kusala Bikesa ya Mingi

Bambangi ya Yehowa mingi me salaka bikesa ya mingi sambu na kuzabisa bantu ya babwala ya Canada nsangu ya ke pesa kikesa yina kele na Biblia. Terence ti nkento na yandi Orlene ke yibuka nzietelo mosi ya mutindu yina. Bo ke tuba nde: “Beto salaka nzietelo na kamio ti bantu ya nkaka mpi beto salaka bangunga kiteso ya 12 na banzila ya kufuluka ti neze sambu na kukwenda kulonga na kisika mosi ya bo ke bingaka Little Grand Rapids. Mutindu bantu yina ndimaka nsangu yitukisaka beto.”

Bantu ya nkaka me yambulaka banzo na bo ya kitoko sambu na kukwenda kuzinga pene-pene ya babwala yina. Daniel ti nkento na yandi LeeAnn kwendaka kulonga nsangu ya mbote na kisanga ya Manitoulin bangonda tatu. Na nima, bo bakaka lukanu ya kukwenda kuzinga kuna. Daniel ke tuba nde: “Beto kele na kiese mutindu beto me kuma ti ntangu mingi sambu na kusadisa bantu na kutudila beto ntima mpi kupusa bo na kutula dikebi na Biblia.”

“Sambu Mono Ke Zolaka Bo Kibeni”

Sambu na nki Bambangi ya Yehowa ke salaka bikesa sambu na kukwenda kusosa bantu ya babwala ya Canada? Rose nkento ya Bert ke tuba nde: “Mono ke sadisaka bantu ya nkaka sambu mono mosi kele muntu ya bwala yina mpi mono me bakaka mambote ya kusadila bansiku ya Biblia.”

Orlean ke tuba nde: “Mono ke zola nde Nzambi kutwadisa bantu yina ke tubaka ndinga ya Cri. Mono kele na kiese ya mingi ya kusadisa bo na kupusana pene-pene ya Yehowa mpi na kukanga ntima na bampasi yina bo ke kutana ti yo bubu yai.”

Marc ke salaka ti bampangi yina ke balulaka mikanda na ndinga ya Blackfoot. Sambu na nki yandi ke kwendaka kusosa bantu ya bwala yina yandi kele? Yandi ke tuba nde: “Sambu mono ke zolaka bo kibeni.”

^ par. 4 Bantu ya nkaka ya Etats-unis ke tubaka mpi bandinga ya nkaka na kati ya bandinga yai.