Kwenda na mambu ke na kati

Sambu na nki Bambangi ya Yehowa Ke Salaka Ve Nkinsi ya Lubutuku?

Sambu na nki Bambangi ya Yehowa Ke Salaka Ve Nkinsi ya Lubutuku?

Bangindu ya mbi yina bantu mingi ke vandaka ti yo

 Luvunu: Bambangi ya Yehowa ke salaka ve Nkinsi ya Lubutuku sambu bo ke kwikilaka ve na Yezu.

 Kieleka: Beto kele Bakristu. Beto ke ndimaka nde beto ta guluka kaka na nzila ya Yezu Kristu.​—Bisalu 4:12.

 Luvunu: Beno ke kabisaka mabuta mutindu beno ke longaka bo nde bo sala ve Nkinsi ya Lubutuku.

 Beto ke tudilaka mabuta dikebi ya mingi, mpi beto ke sadilaka Biblia sambu na kusadisa bo na kuvanda na bumosi.

 Luvunu: Beno ke waka ve kiese ya “Nkinsi ya Lubutuku” disongidila, beno ke kabilaka ve bantu, beno ke zolaka ve nde ntoto kuvanda na ngemba, mpi beno ke sadilaka ve bantu mambu ya mbote.

 Kieleka: Konso kilumbu beto ke salaka bikesa sambu na kukaba mpi kuvanda na ngemba. (Bingana 11:25; Baroma 12:18) Mu mbandu, mutindu beto ke salaka balukutakanu na beto mpi mutindu beto ke longaka ke wakana ti nsiku yai ya Yezu: “Beno me baka ya ofele, beno pesa mpi ya ofele.” (Matayo 10:8) Diaka, beto ke bendaka dikebi ya bantu na Kimfumu ya Nzambi sambu yo ta tula kibeni ngemba na ntoto.​—Matayo 10:7.

Sambu na nki Bambangi ya Yehowa ke salaka ve Nkinsi ya Lubutuku?

  •   Yezu tubaka nde beto fwete yibuka lufwa na yandi, kansi ve lubutuku na yandi.​—Luka 22:19, 20.

  •   Bantumwa ya Yezu mpi balongoki na yandi ya ntete vandaka ve kusala Nkinsi ya Lubutuku. Mukanda mosi (The New Catholic Encyclopedia) ke tuba nde “bantu me yantikaka kusala Nkinsi ya Lubutuku ya Yezu na mvu 243 ya ntangu na beto,” disongidila bamvula nkama na nima ya lufwa ya bantumwa ya nsuka.

  •   Yezu butukaka ve na kilumbu ya 25 Desembri mpi Biblia ke tubila ve kilumbu yina yandi butukaka.

  •   Beto ke kwikilaka nde Nzambi ke ndimaka ve Nkinsi ya Lubutuku sambu yo me katukaka na binkulu ya mimpani.​—2 Bakorinto 6:17.

Keti beno ke zaba ve nde bantu lenda menga beno mutindu beno ke salaka ve Nkinsi ya Lubutuku?

 Bantu mingi ke landaka na kusala Nkinsi ya Lubutuku ata bo me zaba nde yo me katukaka na mimpani mpi Biblia ke ndimaka yo ve. Bantu yina lenda yula nde: Sambu na nki Bakristu ke salaka ve mambu yina bantu mingi ke salaka? Keti bantu lenda menga beno ve mutindu beno ke salaka ve Nkinsi ya Lubutuku?

 Biblia ke siamisa beto na kuyindula, sambu beto sadila “mayele na [beto] ya kuyindula.” (Baroma 12:1, 2) Yo ke longa beto na kubaka kieleka bonso kima ya mfunu. (Yoane 4:23, 24) Yo yina, ata beto ke sosaka kuzaba mutindu bantu ya nkaka ke monaka beto, beto ke sadilaka bansiku ya Biblia ata bantu ya nkaka ke menga beto.

 Ata beto ke salaka ve Nkinsi ya Lubutuku, beto ke bikaka nde konso muntu kubaka lukanu yandi mosi na diambu yai. Beto ke vukanaka ve ti bantu ya nkaka ntangu bo ke salaka Nkinsi ya Lubutuku.