Kwenda na mambu ke na kati

Sambu na Nki Bambangi ya Yehowa Ke Kwendaka Ve na Bitumba?

Sambu na Nki Bambangi ya Yehowa Ke Kwendaka Ve na Bitumba?

 Beto ke kwendaka ve na bitumba sambu:

  1.   Beto ke lemfukilaka Nzambi. Biblia ke tuba nde bansadi ya Nzambi ta “kumisa bambele na bo ya bitumba bima ya kubundudila ntoto” mpi bo “ta longuka mpi diaka ve bitumba.”​—Yezaya 2:4.

  2.   Beto ke lemfukilaka Yezu. Yezu zabisaka ntumwa Piere nde: “Vutula mbele na nge ya bitumba na kisika na yo, sambu bantu yonso yina ke bakaka mbele ya bitumba ta fwa na mbele ya bitumba.” (Matayo 26:52) Ntangu Yezu tubaka mutindu yina, yandi monisaka nde balongoki na yandi ta baka ve minduki sambu na kunwana bitumba.

     Balongoki ya Yezu ke lemfukaka na nsiku yina yandi pesaka bo na kuvanda “ve bantu ya nsi-ntoto” ntangu bo ke kotaka ve ata fioti na mambu ya politiki. (Yoane 17:16) Kana basoda ke zola kukwenda na bitumba bo ke kangaka bo ve nzila; bo ke kangaka mpi ve nzila na bantu yina ke zola kusala kisalu ya kisoda.

  3.   Beto ke zolaka bantu ya nkaka. Yezu pesaka balongoki na yandi nsiku ya ‘kuzolana bo na bo.’ (Yoane 13:34, 35) Kana bo sala mpidina, bo ta vanda na kati ya dibuta ya ntoto ya mvimba ya bampangi; na kati ya dibuta yina ata muntu mosi ve ta nwanisa mpangi na yandi ya bakala to ya nkento.​—1 Yoane 3:10-12.

  4.   Beto ke landaka mbandu ya Bakristu ya ntete. Mukanda mosi (The Encyclopedia of Religion and War) ke tuba nde: “Balongoki ya ntete ya Yezu vandaka kukwenda ve na bitumba mpi bo vandaka kusala ve kisalu ya kisoda,” sambu bo vandaka kuzaba nde bisalu yina “vandaka ve kuwakana ti dilongi ya zola yina Yezu longaka bo mpi nsiku ya kuzola bambeni na bo.” Peter Meinhold, muntu ya Allemagne ya ke longukaka teolozi, tubaka nde: “Mpila kuvandaka ve ya kuvanda Mukristu mpi soda.”

Kusadisa Bantu

 Bambangi ya Yehowa ke vandaka bantu ya mbote na bisika yina bo ke zingaka, bo ke katulaka ve ngemba na babwala yina bo ke zingaka. Beto ke zitisaka bamfumu ya leta, na kuwakana ti bansiku yai ya Biblia:

  •   ‘Beno lemfuka na bamfumu ya nene.’​—Baroma 13:1.

  •   “Yo yina, beno pesa bima ya Kaisali na Kaisali, kansi bima ya Nzambi na Nzambi.”​—Matayo 22:21.

 Yo yina, beto ke lemfukaka na bansiku, beto ke futaka mpaku mpi beto ke salaka mambu yina luyalu ke lombaka nde beto sala sambu na mambote ya bantu yonso.