Kwenda na mambu ke na kati

Mbongo yina Bambangi ya Yehowa Ke Sadilaka Kisalu na Bo Ke Katukaka na Wapi?

Mbongo yina Bambangi ya Yehowa Ke Sadilaka Kisalu na Bo Ke Katukaka na Wapi?

Mbongo ya beto ke sadilaka na kisalu na beto ya kulonga ke katukaka ntete-ntete na makabu ya luzolo ya mbote yina Bambangi ya Yehowa ke pesaka. Beto ke kongulaka ve mbongo na balukutakanu na beto, mpi beto ke lombaka ve ndambu ya kumi (dîme). (Matayo 10:7, 8) Kansi, beto me tulaka bakesi ya makabu na bisika yina beto ke salaka balukutakanu na mpila nde konso muntu yina ke zola kupesa makabu, kutula yo na bakesi yina. Bantu yina ke pesaka makabu ke zolaka ve nde bantu kuzaba bazina na bo.

Beto ke sadilaka mbongo na beto mbote sambu beto ke vandaka ve ti bamfumu ya mabundu yina bo ke futaka mbongo. Diaka, bo ke futaka ve Bambangi ya Yehowa sambu na kulonga nzo na nzo, mpi bisika na beto ya lusambu ke vandaka ya kukonda mindondo.

Makabu yonso yina bo ke tindaka na babiro ya filiale ya Bambangi ya Yehowa ke vandaka sambu na kusadisa bantu yina bisumbula ya lugangu me bwila, bamisionere mpi bankengi-ntambudi. Bo ke sadilaka mpi makabu yina sambu na kutunga banzo ya lusambu na bansi ya kinsukami, kuniema Babiblia ti mikanda ya nkaka mpi kutinda yo na mabundu.

Konso muntu lenda pona na kupesa makabu sambu na kulungisa bampusa ya dibundu to sambu na kisalu yina ke salama na nsi-ntoto ya mvimba. Yandi lenda pesa mpi sambu na yonso zole. Konso dibundu fwete sala rapore ya konti ya dibundu mbala na mbala.