Kwenda na mambu ke na kati

Sambu na Nki Bambangi ya Yehowa Ke Solulaka ti Bantu Yina Ke Vandaka Dezia ti Dibundu na Bo?

Sambu na Nki Bambangi ya Yehowa Ke Solulaka ti Bantu Yina Ke Vandaka Dezia ti Dibundu na Bo?

Beto me bakisaka nde bantu mingi yina ke vandaka dezia ti dibundu na bo, ke zolaka kusolula masolo ya Biblia. Ya kieleka, beto ke zitisaka balukwikilu ya bantu yina me swaswana ti ya beto, mpi beto ke pusaka ve bantu na kundima nsangu na beto na ngolo.

Ntangu beto ke solulaka mambu ya Nzambi ti bantu, beto ke salaka ngolo na kusadila bandongisila ya Biblia sambu na kusolula ti bo na “mawete” mpi na “luzitu ya mudindu.” (1 Piere 3:15) Beto ke zabaka nde bantu ya nkaka ta buya nsangu na beto. (Matayo 10:14) Kansi, beto ke zabaka ve mabanza ya bantu kana beto me solula ntete ve ti bo. Beto ke zabaka mpi nde mambu ya bantu ke sobaka.

Mu mbandu, muntu mosi lenda vanda ti kisalu kilumbu yina beto me kwenda kusolula ti yandi kansi yandi lenda ndima kusolula ti beto kilumbu ya nkaka. Diaka, bantu lenda kutana ti mambu ya nkaka mpi yo pusa bo na kundima nsangu ya Biblia. Yo yina, beto ke salaka bikesa ya kusolula ti bantu mbala na mbala.