Kwenda na mambu ke na kati

Sambu na Nki Bambangi ya Yehowa Ke Buyaka Bo Vutula Bo Menga?

Sambu na Nki Bambangi ya Yehowa Ke Buyaka Bo Vutula Bo Menga?

Bangindu ya mbi yina bantu mingi ke vandaka ti yo

Luvunu: Bambangi ya Yehowa ke ndimilaka ve minganga, yo yina bo ke zolaka ve bo sansa bo.

Kieleka: Beto ke sosaka lusansu ya kuluta mbote sambu na beto mosi mpi sambu na bantu ya mabuta na beto. Kana beto ke bela, beto ke kwendaka na minganga yina me zaba kusansa mbote mpi yina ke pasulaka kukonda kuvutula menga. Beto ke sepelaka mingi mutindu minganga ke tomisa kisalu na bo. Nkutu, bubu yai mayele yina minganga ke sadilaka sambu na kusansa Bambangi ya Yehowa kukonda kuvutula bo menga, bo me kumaka kusadila yo mpi sambu na kusansa bantu yonso. Bubu yai na bansi mingi, konso muntu yina ke bela lenda buya lusansu yina ke lombaka nde bo sadila menga sambu yandi baka ve bamaladi yina bantu ke bakaka na nzila ya menga, mutindu nitu na beto ke nwanaka ti maladi, mpi bifu ya bantu.

Luvunu: Bambangi ya Yehowa ke ndimaka nde lukwikilu ya muntu lenda belula maladi na yandi.

Kieleka: Beto ke salaka ve bimangu sambu na kubelula bantu.

Luvunu: Kana muntu me buya bo vutula yandi menga yandi ta basisa mbongo mingi.

Kieleka: Kusansa kukonda kuvutula menga ke lombaka ve mbongo mingi. *

Luvunu: Bambangi mingi ya Yehowa, yo vanda bana, ke fwaka konso mvula sambu bo ke buyaka nde bo vutula bo menga.

Kieleka: Yo kele kibeni mambu ya luvunu. Minganga ke salaka mbala na mbala lupasu ya ngolo kukonda kuvutula menga. * Mu mbandu, kupasula ntima, mikwa, misuni ya nitu mpi kukatula kitini mosi ya nitu sambu na kutula kitini ya nkaka. Mbala mingi bambefu, yo vanda bana, yina ke buyaka nde bo vutula bo menga ke belukaka mbote kuluta bambefu yina ke ndimaka nde bo vutula bo menga. * Yo vanda mpidina to ve, ata muntu mosi ve lenda tuba nde muntu yina ke bela ta fwa sambu yandi me buya nde bo vutula yandi menga to yandi ta zinga sambu yandi me ndima nde bo vutula yandi menga.

Sambu na nki Bambangi ya Yehowa ke buyaka bo vutula bo menga?

Diambu yai me tala ve kimunganga kansi yo me tala Biblia. Biblia ke pesa nsiku nde beto fwete buya menga. (Kuyantika 9:4; Levi 17:10; Kulonga 12:23; Bisalu 15:28, 29) Diaka, sambu na Nzambi, menga ke monisaka luzingu. (Levi 17:14) Yo yina, beto ke buyaka bo vutula beto menga sambu beto ke zolaka kulemfukila Nzambi mpi kuzitisa yandi sambu yandi Muntu ke pesaka luzingu.

Bantu me sobaka bangindu

Minganga lenda pasula bantu mbote sambu na kukatula maladi ya ngolo kukonda kuvutula menga

Ntete, kimvuka ya minganga vandaka kumona nde kusansa bantu kukonda kuvutula menga vandaka diambu mosi ya mpasi kibeni, nkutu yo vandaka bonso kufwa muntu, kansi na bamvula yai me katuka kuluta, diambu yai me sobaka. Mu mbandu, na mvu 2004, disolo mosi yina basikaka na zulunalu mosi ya ke tubilaka mambu ya minganga ke tuba nde: “Na bamvula ke kwisa bo ta kuma kusadila bametode yina bo me tomisaka na kusansa Bambangi ya Yehowa sambu na kusansa bantu yonso.” * Disolo mosi ya kele na zulunalu mosi (Heart, Lung and Circulation) tubaka na mvu 2010 nde: “Bo fwete sadila ve mayele ya ‘kupasula bantu kukonda kuvutula menga’ (chirurgie sans transfusion), kaka sambu na Bambangi ya Yehowa kansi bo fwete sadila yo mpi konso ntangu yina minganga ke pasula bantu.”

Bubu yai na ntoto ya mvimba, minganga mingi ke sadilaka mayele ya kubumba menga kana bo ke pasula bantu sambu na kukatula maladi ya ngolo kukonda kuvutula menga. Bo ke sadilaka mpi mayele yai ata na bansi ya kinsukami mpi bambefu mingi yina kele ve Bambangi ya Yehowa ke lombaka nde bo sansa bo mutindu yina.

^ par. 6 Tala mukanda Transfusion and Apheresis Science, Buku 33, No. 3, lut. 349.

^ par. 8 Tala mukanda The Journal of Thoracic and Cardiovascular Surgery, Buku 134, No. 2, balut. 287-288; mukanda Texas Heart Institute Journal, Buku 38, No. 5, lut. 563; Basics of Blood Management, lut. 2; mpi mukanda Continuing Education in Anaesthesia, Critical Care & Pain, Buku 4, No. 2, lut. 39.

^ par. 8 Tala mukanda The Journal of Thoracic and Cardiovascular Surgery, Buku 89, No. 6, lut. 918; mpi mukanda Heart, Lung and Circulation, Buku 19, No. 9, lut. 658.

^ par. 10 Mukanda Continuing Education in Anaesthesia, Critical Care & Pain, Buku 4, No. 2, lutiti 39.