Rilb'al li na'leb'

Rilb'al li xtusulal naʼlebʼ

 TZOLOM 12

Jun li saaj al inkʼaʼ kixuwak

Jun li saaj al inkʼaʼ kixuwak

Tinye aawe kʼaru kixbʼaanu jun li saaj al re xkolbʼal xyuʼam li Apostol Pablo. Usta inkʼaʼ naqanaw ani xkʼabʼaʼ, naqanaw naq xyum li ranabʼ laj Pablo. Li saaj al aʼin inkʼaʼ kixuwak. Ma taawaj xnawbʼal kʼaru kixbʼaanu?...

Laj Pablo keʼxkʼe saʼ tzʼalam aran Jerusalen xbʼaan naq yook chi kʼutuk chirix li Jesus. Abʼan wankebʼ xikʼ nekeʼilok chaq re, joʼkan naq keʼxkʼuubʼ chirix jun li maaʼusilal. Keʼraj xyeebʼal re li najolomink rehebʼ laj puubʼ: «Ye rehebʼ laj puubʼ naq teʼxkʼam laj Pablo saʼ li raqlebʼaal aatin». Keʼxmuq raj ribʼ chire bʼe, ut aran raj keʼxkamsi!

Li saaj al kixye re laj Pablo li kirabʼi, ut moqon chik kixye re laj jolominel puubʼ

Li saaj al kirabʼi li yookebʼ xyeebʼal. Abʼan, kʼaru kixbʼaanu? Xkoho xyeebʼal re laj Pablo. Ut laj Pablo kixye re: «Ayu saʼ junpaat rikʼin laj jolominel puubʼ ut taaye re chixjunil». Chʼaʼaj xyeebʼal aʼin xbʼaan naq laj jolominel puubʼ nim xwankil. Ma kiruuk xyeebʼal chixjunil?... Heeheʼ, kixye ut inkʼaʼ kixuwak.

Laj jolominel puubʼ kirabʼi chixjunil aʼin. Ut re xkolbʼal laj Pablo kixtaqla saʼ li tenamit Cesarea. Kixtaqlahebʼ tana 500 aj puubʼ re naq teʼxik chirix. Ut kixye rehebʼ: «Teekʼam ajwiʼ saʼ li qʼoqyink aʼin». Ma kikoleʼk laj Pablo malaj kikamsiik xbʼaanebʼ li winq? Kʼaru nakaaye?... Heeheʼ, kikoleʼk! Maakʼaʼ keʼxbʼaanu re.

Ma xwulak chaawu li tzolom aʼin?... Ma xaakʼe reetal naq li saaj al inkʼaʼ kixuwak? Laaʼat tatruuq ajwiʼ xbʼaanunkil aʼin! Tento naq inkʼaʼ tooxuwaq re naq tooʼaatinaq chirix li Jehobʼa. Ma junelik tat-aatinaq chirix li Jehobʼa ut inkʼaʼ tatxuwaq?... Aajel ru naq inkʼaʼ taakanabʼ aatinak chirix li Yos. Chi joʼkan, naabʼalebʼ teʼkoleʼq.

QILAQ LI SANTIL HU:

  • Hechos 23:12-24

  • Mateo 24:14; 28:18-20

  • 1 Timoteo 4:16