Keʼkʼihank li ralal xkʼajol laj Abrahan. Li Yos kixtenqʼa laj Jose naq kiwank chaq Egipto

CHʼOLCHʼO chiru li Jehobʼa naq twulaq xqʼehil naq li Ralal li jwal raaro xbʼaan tixqʼaxtesi li xyuʼam. Ut aʼan naraj xyeebʼal saʼ Genesis 3:15. Re naq ebʼ li qas qiitzʼin teʼxtaw ru naq jwal kirahoʼk saʼ xchʼool li Yos naq kikamsiik li Ralal, kixkʼe chi tzʼiibʼaak saʼ li Santil Hu naq kixye re laj Abrahan naq tixmayeja laj Isaac, li ralal, li raaro xbʼaan.

Qajultikaq naq li Yos kixye chaq re laj Abrahan naq laj Kolonel tchalq saʼ xyanq li ralal xkʼajol laj Isaac. Chʼolchʼo chiru laj Abrahan naq li Yos tixbʼaanu aʼin ut chʼolchʼo ajwiʼ chiru naq wi tkamq laj Isaac tixwaklesi wiʼ chik chi yoʼyo. Joʼkan naq, kiʼabʼink chiru li Jehobʼa re xmayejankil li ralal. Ak ok re xkamsinkil laj Isaac naq li Jehobʼa kixtaqla jun li anjel re naq inkʼaʼ tixbʼaanu. Li Jehobʼa kixnima ru laj Abrahan xbʼaan xkawil li xpaabʼal ut kixye wiʼ chik re, naq tixbʼaanu li xyeechiʼom.

Saʼ xnumikebʼ ru li chihabʼ, laj Isaac kiwank wiibʼ li ralal: laj Esau ut laj Jacob. Abʼan kaʼajwiʼ laj Jacob kiroxloqʼi li nachalk rikʼin li Jehobʼa joʼkan naq kiʼosobʼtesiik. Kijaleʼk xkʼabʼaʼ xbʼaan li Jehobʼa ut kikʼeheʼk choʼq Israel, ut li xkabʼlaju chi ralal keʼkʼeheʼk choʼq xxeʼil li xteepal Israel. Abʼan, chanru kikʼihank li junkabʼal aʼin?

Aʼin kitiklaak naq ebʼ li ras laj Jose keʼok xkaqalinkil. Saʼ xkʼabʼaʼ naq jwal xikʼ nekeʼril, keʼxkʼayi choʼq moos. Ebʼ li keʼloqʼok re keʼxkʼam saʼ li tenamit Egipto. Saʼ li tenamit aʼin kixkʼul naabʼal li chʼaʼajkilal. Abʼanan, li Yos kixtenqʼa li saaj al aʼin xbʼaan naq tiik ut kaw xchʼool chiru. Saʼ jun kutan laj Faraon kixxaqabʼ laj Jose chi xbʼaanunkil jun li nimla kʼanjel. Rikʼin li kʼanjel aʼin kiruuk xtenqʼankil li xjunkabʼal naq kiʼosoʼk li tzakahemq. Usta inkʼaʼ kiraj laj Jacob kixtaqlahebʼ li ralal chi xloqʼbʼal li tzakahemq saʼ li tenamit Egipto. Laj Jose xaqabʼanbʼil chi xkʼayinkil li tzakahemq. Kʼajoʼ kisahoʼk saʼ xchʼool laj Jose naq kirilebʼ ru li ras! Ebʼ li ras moko maaʼusebʼ ta chik xnaʼlebʼ. Laj Jose kixkuyebʼ xmaak ut kixtaqla xbʼoqbʼal chixjunilebʼ li xkomon. Laj Faraon kixkʼe re li xjunkabʼal laj Jose rusilal ru li chʼochʼ ut aran keʼok chi kʼihank ut chi bʼihomoʼk. Laj Jose kixkʼe reetal naq li Jehobʼa kibʼaanunk re chixjunil li kixkʼul re naq ttzʼaqloq ru li Rajom.

Laj Jacob kiwank Egipto rochbʼeen li xjunkabʼal toj naq kikamk. Ak kamk kamk re laj Jacob naq kixye naq laj Kolonel aʼanaq jun awabʼej jwal wanq xwankil ut tchalq saʼ xkʼabʼaʼ laj Juda, li ralal. Saʼ xnumikebʼ ru li chihabʼ, laj Jose kixye chaq naq li Yos trisi chixjunil li xjunkabʼal laj Jacob saʼ li tenamit Egipto.

(Isinbʼil chaq saʼ Genesis tasal 20-50 ut saʼ Hebreos 11:17-22.)