Rilb'al li na'leb'

Rilb'al li xk'ab' tusulal na'leb'

Rilb'al li xtusulal naʼlebʼ

Testiiw re li Jehobʼa

Q’eqchi’

Li Santil Hu ut li naʼlebʼ li wank chisaʼ

 TASAL 20

Li Xkamik li Kriist

Li Xkamik li Kriist

Li Jesus kixkʼojobʼ jun chik li nimla kutan ut kixnima ru. Kikʼayiik xbʼaan jun li ramiiw ut kiklawxiik chiru cheʼ

LI Jesus oxibʼ chihabʼ rikʼin waqibʼ po rokik chi xpuktesinkil li chaabʼil esilal arin saʼ Ruuchichʼochʼ ut chʼolchʼo chiru naq yook chaq chi nachʼok li xkamik. Ebʼ laj Judiiy li keʼkʼamok bʼe saʼebʼ li paabʼal keʼxkʼuubʼ xkamsinkil li Jesus, abʼan teʼxuwaq chiruhebʼ li tenamit xbʼaan naq ilbʼil joʼ propeet. Aran naq laj Tza kitaqlank saʼ xchʼool laj Judas, jun rehebʼ li kabʼlaju, re naq tixkʼayi laj Tzolonel. Ebʼ laj kʼamol bʼe saʼebʼ li paabʼal keʼxtoj re laj Judas 30 tumin re plaat.

Ak wulajaq xkamik li Jesus naq kixchʼutubʼ ribʼ rikʼinebʼ li Xʼapostol re xnimankil li Paswa. Chirix chik aʼan kixkʼojobʼ jun chik li nimla kutan re xnimankil ru: Xjultikankil li Xkamik, abʼan xbʼeenwa kirisi laj Judas Iscariote saʼ xyanqebʼ. Kixchap li kaxlanwa, kitijok ut kixnumsi saʼ xyanqebʼ li junlaju chi Apostol. Tojaʼ naq kixchʼolobʼ: «Aʼin [reetalil] lintzʼejwal qʼaxtesinbʼil saʼ eekʼabʼaʼ. Chebʼaanu aʼin re xnimankil injultikankil». Chirix chik aʼan kixnumsi li ukʼlebʼ sekʼ re bʼiin ut kixye: «[Aʼin reetalil] li Akʼ Sumwank saʼ xkʼabʼaʼ linkikʼel» (Lucas 22:19, 20).

Saʼ li qʼoqyink ajwiʼ aʼin, li Jesus kixkʼut naabʼal li naʼlebʼ chiruhebʼ li Xʼapostol. Joʼkan naq kixkʼe rehebʼ jun li akʼ chaqʼrabʼ re naq teʼxra ribʼ, ut kixye: «Chixjunilebʼ teʼnawoq re naq laaʼex intzolom: wi nekera eeribʼ cheribʼil eeribʼ» (Juan 13:34, 35). Kixye ajwiʼ rehebʼ naq inkʼaʼ teʼchʼinaaq xchʼool chirix li ok re xkʼulbʼal. Tojaʼ naq kitijok chirixebʼ chi anchal xchʼool. Ut chirix chik aʼan keʼok chi bʼichank chiru li Yos ut kohebʼ Getsemani.

Saʼ li naʼaj aʼin li Jesus kixwiqʼibʼ ribʼ ut kixte li raanm chiru li Jehobʼa. Abʼan maakʼaʼ saʼ xchʼool naq kolchapeʼq xbʼaanebʼ aj puubʼ ut ebʼ laj tij. Ut re xkʼutbʼal naq aʼan li Jesus, laj Judas kixtzʼubʼ ru. Tojaʼ naq ebʼ laj puubʼ keʼxchap li Jesus ut ebʼ li Apostol keʼelelik xbʼaanebʼ xxiw.

Li Jesus kixye saʼ li raqlebʼaal aatin chiruhebʼ laj Judio naq aʼan Ralal li Yos. Ebʼ laj raqol aatin keʼxye naq rikʼin li kixye yook xmaajewankil li Yos. Ut saʼ xkʼabʼaʼ li tikʼtiʼ aʼin naru natenebʼaak kamk saʼ xbʼeen. Tojaʼ naq koleʼxxaqabʼ chiru laj Poncio Pilato, li awabʼej re li tenamit Roma. Naq li awabʼej aʼin kiril li Jesus kixkʼe reetal naq maakʼaʼ xmaak. Usta chʼolchʼo chiru aʼin, kixpaabʼ re li tenamit li yook xpatzʼbʼal li xkamik.

Kikʼameʼk li Jesus saʼ li naʼaj Golgota ut aran kiklawxiik chiru cheʼ xbʼaanebʼ laj puubʼ re li tenamit Roma. Saʼ junpaat kiqʼoqyinoʼk ru li kutan. Saʼ li eewu ajwiʼ aʼin naq kikamk li Jesus, kichalk jun li nimla hiik. Li xtibʼel keʼxkʼe saʼ jun li ochoch pek. Ut wulajaq, ebʼ laj tij keʼxtzʼap re li rokebʼaal li ochoch pek ut keʼxkʼe aj kʼaakʼalehom re. Ma aran kikanaak chi junajwa? Inkʼaʼ! Xbʼaan naq tkʼulmanq li nimla sachbʼachʼoolej.

(Isinbʼil chaq saʼ Mateo tasal 26, 27, saʼ Marcos tasal 14, 15, saʼ Lucas tasal 22, 23 ut saʼ Juan tasal 12-19.)

^ párr. 15 Taataw xkomon li naʼlebʼ chirix li xkamik li Jesus saʼ li Tzolom 5 re li tasal hu Kʼaru Tzʼaqal Naxchʼolobʼ li Santil Hu?