KʼARU esilal nakaawabʼi ut nakaawil saʼ li prens, saʼ li raay ut saʼ li kaxmu? Naabʼal li maaʼusilal, li kamsink ut li yalok u. Ut kʼoxlan chirixebʼ li chʼaʼajkilal li yookat xkʼulbʼal. Maare ra laachʼool xbʼaan naq yaj malaj xkamk junaq laakomon malaj laawamiiw. Nakaaye tana joʼ laj Job, jun chaabʼil winq: «Junes rahilal ut yotʼik chʼoolej wank wikʼin» (Job 3:26).

Maare nakaakʼoxla aʼin:

  • Ma naraj li Yos naq tqakʼul li rahilal?

  • Kʼaru tooxtenqʼa re xtuqubʼankil ru li qachʼaʼajkilal?

  • Ma twulaq tawiʼ xqʼehil naq twanq tuqtuukilal saʼ Ruuchichʼochʼ?

Li Santil Hu naxchʼolobʼ xyaalal ebʼ li patzʼom aʼin.

 LI SANTIL HU NAXYE NAQ LI YOS TIXKʼAM CHAQ LI OSOBʼTESIHOM AʼIN SAʼ LI RUUCHICHʼOCHʼ.

«Tixchaqihobʼresi chixjunil li xyaʼalebʼ ru, ut inkʼaʼ chik taawanq kamk, chi moko yaabʼak, chi moko japok e malaj rahilal.» (Apocalipsis 21:4)

«Li yeq roq taapiskʼoq joʼ li yuk.» (Isaías 35:6)

«Taatehonq xsaʼ ruhebʼ li mutzʼ.» (Isaías 35:5)

 «Chixjunilebʼ li wankebʼ saʼ muqlebʼaal kamenaq [...] teʼelq chaq.» (Juan 5:28, 29)

«Maajun chik saʼ qayanq tixye: ‹Yajin›.» (Isaías 33:24)

«Numtajenaqaq li awimq [malaj tzakahemq] saʼ ruuchichʼochʼ.» (Salmo 72:16)

 TZOL LI NAXKʼUT LI SANTIL HU

Maare nakaakʼoxla naq maajunwa tkʼulmanq chixjunil aʼin. Abʼan li Santil Hu naxchʼolobʼ chanru tixkʼam chaq li Yos li osobʼtesihom li naxyeechiʼi qe.

Li Santil Hu moko kaʼaj tawiʼ aʼin naxchʼolobʼ, naxye ajwiʼ chanru tqataw li sahil chʼoolejil anaqwan. Kʼoxlan chirix li chʼaʼajkilal li yookat xkʼulbʼal saʼ laayuʼam. Maare yook aakʼaʼuxl chirix laajunkabʼal, li tumin, li yajel ut maare xkamk junaq laakomon malaj laawamiiw. Li Santil Hu nokooxtenqʼa ut naxkʼojobʼ qachʼool xbʼaan naq naxchʼolobʼ xyaalal ebʼ li junjunq chi patzʼom aʼin:

  • Kʼaʼut naqakʼul li rahilal?

  • Chanru tooruuq xtuqubʼankil ru ebʼ li qachʼaʼajkilal?

  • Kʼaru tqabʼaanu re naq twanq li sahil chʼoolejil saʼ li qajunkabʼal?

  • Kʼaru naqakʼul naq nokookamk?

  • Ma teʼwakliiq wiʼ chik chi yoʼyo ebʼ li qakomon?

  • Kʼaʼut chʼolchʼo chiqu naq tkʼulmanq li kixyeechiʼi chaq li Yos?

 Wi yookat rilbʼal xsaʼ li tasal hu aʼin, naraj xyeebʼal naq taawaj xnawbʼal li naxchʼolobʼ li Santil Hu. Ut li tasal hu aʼin taatenqʼanq aawe. Wankebʼ li patzʼom rehebʼ li junjunq chi raqal aatin. Naabʼalebʼ li qas qiitzʼin nekeʼwulak chiru tzolok rikʼinebʼ laj Testiiw re li Jehobʼa, xbʼaan naq nekeʼroksi ebʼ li patzʼom re xtzʼilbʼal xsaʼ li Santil Hu. Us raj naq taawulaq ajwiʼ chaawu tzolok chi joʼkaʼin. Li Yos taxaq t-osobʼtesinq aawe naq yooqat xtzolbʼal kʼaru tzʼaqal naxchʼolobʼ li Santil Hu!