Rilb'al li na'leb'

Rilb'al li xk'ab' tusulal na'leb'

Rilb'al li xtusulal naʼlebʼ

Testiiw re li Jehobʼa

Q’eqchi’

Kʼaru tzʼaqal naxchʼolobʼ li Santil Hu?

 XKOMON LI NAʼLEBʼ

Laj Daniel Kiʼaatinak Chirix li Sikʼbʼil Ru

Laj Daniel Kiʼaatinak Chirix li Sikʼbʼil Ru

LI Jehobʼa kixye joqʼe tyuleʼq li Jesus rikʼin santil musiqʼej, re naq tkanaaq choʼq li Sikʼbʼil Ru malaj choʼq li Kriist. Naxqʼax ru 500 chihabʼ naq toj maajiʼ nachalk li Jesus arin saʼ Ruuchichʼochʼ naq li Jehobʼa kixye re laj Daniel, jun laj kʼanjel chiru: ‹Abʼi li yookin xyeebʼal aawe ut kʼe reetal xyaalal. Chalen naq kikʼeemank li chaqʼrabʼ re xyiibʼankil wiʼ chik li tenamit Jerusalen, toj reetal tkʼulunq li Sikʼbʼil Ru tnumeʼq wuqubʼ xamaan ut wiibʼ xkaakʼaal (62) xamaan› (Daniel 9:25, Wy).

 Re xnawbʼal joqʼe tchalq li Sikʼbʼil Ru, xbʼeenwa tqatzʼil rix joqʼe kiʼok chi tzʼaqlok ru li kixye li Jehobʼa re laj Daniel. Li Santil Hu naxye naq kiʼok chi tzʼaqlok ru, naq ‹kikʼeemank li chaqʼrabʼ chirix xyiibʼankil wiʼ chik li tenamit Jerusalen›. Joqʼe ‹kikʼeemank chaq li chaqʼrabʼ› aʼin? Laj Nehemias, jun rehebʼ li kitzʼiibʼank chaq re li Santil Hu, kixye naq aʼin tkʼulmanq naq «ak junmay chihabʼ rokik chi awabʼejil laj Artajerjes» (Nehemías 2:1, 5-8). Naabʼalebʼ aj tzʼiibʼ nekeʼxye naq laj Artajerjes kiʼok chi awabʼejink saʼ li chihabʼ 475 naq toj maajiʼ nachalk li Jesus arin saʼ Ruuchichʼochʼ. Wi tqabʼir rix li chihabʼ 475 rikʼin  li junmay chihabʼ naq kiwank chi awabʼejink laj Artajerjes naqataw li chihabʼ 455. Joʼkan naq saʼ li chihabʼ 455 kiʼok chi tzʼaqlok ru li kixye chaq laj Daniel chirix li Sikʼbʼil Ru.

Laj Daniel kixye jarubʼ xamaan tnumeʼq re naq tolʼelq li Sikʼbʼil Ru. Li Santil Hu naxye naq tnumeʼq «wuqubʼ xamaan ut wiibʼ xkaakʼaal [62] xamaan» malaj 69 xamaan. Jarubʼ chihabʼ chixjunil li xamaan aʼin? Wankebʼ li Santil Hu nekeʼxkʼutbʼesi naq ebʼ li xamaan inkʼaʼ naʼajlamank chi kutan, naʼajlamank bʼan chi chihabʼ. Joʼkan naq jun xamaan reetalil wuqubʼ chihabʼ. Ebʼ laj Judio keʼxnaw ajlank chi joʼkan, xbʼaan naq riiq jun chihabʼ keʼxnima jun li Sabado, rajlal 7 chihabʼ (Éxodo 23:10, 11). Li 69 xamaan li kiʼaatinak wiʼ li Santil Hu jekʼinbʼil chi wuqut chihabʼ, joʼkan naq chixjunil aʼin 483 chihabʼ.

Anaqwan qabʼiraq rix aʼin, wi tqajla 483 chihabʼ chalen chaq li chihabʼ 455 naq toj maajiʼ nachalk li Jesus arin saʼ Ruuchichʼochʼ tqataw li chihabʼ 29 saʼ xkutankil li Jesus. Saʼ li chihabʼ aʼin kisubʼeʼk saʼ haʼ li Jesus ut kikanaak choʼq li Sikʼbʼil Ru (Lucas 3:1, 2, 21, 22). * Naxkawresi qapaabʼal xnawbʼal naq chixjunil li kixye chaq li Jehobʼa re laj Daniel kitzʼaqlok ru!

^ párr. 2 Chalen chaq li chihabʼ 455 toj saʼ li chihabʼ 1 wank 454 chihabʼ. Saʼ li chihabʼ 1 toj saʼ li chihabʼ 1, li kikʼoxlamank naq kiyoʼlaak li Jesus, wank 1 chihabʼ. Ut saʼ li chihabʼ 1 toj saʼ li chihabʼ 29, wank 28 chihabʼ. Wi tqachʼutubʼ li 454, li 1 ut li 28 tqataw, 483 chihabʼ. Saʼ li chihabʼ 33 kikamsiik li Jesus naq yook chi wulak xraqiq li «lajeebʼ xkaakʼaal [70] xamaan» (Daniel 9:24 [9:26, Wy]). Taataw xkomon li esil aʼin saʼebʼ li tasal hu Prestemos atención a las profecías de Daniel, tzolom 11, ut saʼ Perspicacia para comprender las Escrituras, vol. 2, saʼebʼ li perel 1014-1017, rehebʼ laj Testiiw re li Jehobʼa.