Rilb'al li na'leb'

Rilb'al li xk'ab' tusulal na'leb'

Rilb'al li xtusulal naʼlebʼ

Testiiw re li Jehobʼa

Q’eqchi’

Kʼaru tzʼaqal naxchʼolobʼ li Santil Hu?

 XKOMON LI NAʼLEBʼ

Kʼaru Xyaalal li «Babilonia, li Nimla Tenamit»?

Kʼaru Xyaalal li «Babilonia, li Nimla Tenamit»?

SAʼ LI Santil Hu wank naabʼal li aatin li naroksi xhuhil li Apocalipsis, abʼan yal jun eetalil. Naxye naq jun li ixq aj yumbʼeet wank chiru xpeekem: «Babilonia, li Nimla Tenamit». Naxye ajwiʼ naq li ixq aʼin kʼojkʼo saʼ xbʼeen li kʼiila tenamit ut saʼ xbʼeen li kʼiila teep (Apocalipsis 17:1, 5, 15). Joʼ xqakʼe reetal maajun li ixq truuq xbʼaanunkil aʼin; joʼkan naq li Babilonia, li Nimla Tenamit, yal jun eetalil. Abʼan, kʼaru xyaalal?

Saʼ Apocalipsis 17:18 naxye naq li ixq aʼin, «aʼan li Nimla Tenamit li wank xwankil saʼ xbʼeenebʼ li awabʼej re li ruuchichʼochʼ». Naq nokooʼaatinak chirix junaq li «tenamit» saʼ  junpaat nachalk saʼ qachʼool naq tustuukebʼ ru li xkʼanjel ut naq wank naabʼal li poyanam. Li Santil Hu naxye naq li nimla Babilonia naxjolomihebʼ «li awabʼej re li ruuchichʼochʼ». Joʼkan naq li Nimla Babilonia aʼan jun nimla molam li wank xwankil saʼ chixjunil li Ruuchichʼochʼ. Abʼan, chanru li nimla molam aʼin? Li molam aʼin xaqabʼanbʼil chirixebʼ li paabʼal. Ut xhuhil li Apocalipsis tooxtenqʼa chi xtawbʼal ru chiʼus aʼin.

Wankebʼ li molam xaqabʼanbʼilebʼ chirixebʼ li awabʼej, chirixebʼ laj yakonel malaj chirixebʼ li paabʼal. Li «Babilonia, li Nimla Tenamit» moko xaqabʼanbʼil ta chirixebʼ li awabʼej, xbʼaan naq li Santil Hu naxye naq «ebʼ li awabʼej re li ruuchichʼochʼ keʼxmux ribʼ rikʼin [li ixq]». Li ixq aʼin kixmux ribʼ rikʼinebʼ li awabʼej naq kixjunaji xkʼaʼuxl ut wank saʼ aatin rikʼinebʼ. Ut kixsikʼ chanru tixbʼaanu re naq wanq xwankil saʼ xbʼeenebʼ. Joʼkan naq, nayeemank re «xnimal ru aj yumbʼeet» (Apocalipsis 17:1, 2; Santiago 4:4).

Li Santil Hu naxye naq «ebʼ laj yakonel saʼ ruuchichʼochʼ» malaj li xmolamil li kʼayink, teʼrahoʼq saʼ xchʼool ut teʼyaabʼaq naq tsacheʼq li ixq aʼin. Joʼkan naq, li Nimla Babilonia moko xmolamil ta li kʼayink. Li Santil Hu naxye naq ebʼ li awabʼej ut ebʼ laj yakonel chi «najt» teʼril li ixq aʼin (Apocalipsis 18:3, 9, 10, 15-17). Joʼkan naq li Babilonia, li Nimla Tenamit, moko xmolamil ta li awabʼej chi moko xmolamil ta li yakok, xmolamil bʼan li paabʼank.

Chʼolchʼo chiqu naq aʼan xmolamil li paabʼank xbʼaan naq li Santil Hu naxye naq li nimla molam aʼin naxbʼalaqʼi chixjunil li tenamit «rikʼin li tuulak» (Apocalipsis 18:23). Li qʼehibʼk ut li tuulak nachalk saʼ li bʼalaqʼil paabʼal ut rikʼinebʼ li maaʼus aj musiqʼej. Joʼkan naq, li Santil Hu naxye naq li Nimla Babilonia aʼan «xnaʼajebʼ li maaʼus» (Apocalipsis 18:2; Deuteronomio 18:10-12). Li xmolamil chixjunil li paabʼal xikʼ naril li tzʼaqal paabʼal joʼkan naq naxrahobʼtesihebʼ «li propeet» ut ebʼ «li sant» (Apocalipsis 18:24). Joʼkan ajwiʼ, naxteni ut naxkamsihebʼ li wankebʼ saʼ li tzʼaqal paabʼal (Apocalipsis 17:6). Li nimla Babilonia reetalil li nimla molam li chʼutchʼuukebʼ wiʼ chixjunil li bʼalaqʼil paabʼal li wank saʼ xbʼeen li Ruuchichʼochʼ.