WIIBʼ oxibʼ ajwiʼ xraqal li Santil Hu naʼaatinak chirix li anjel Miguel. Saʼebʼ li raqal aʼin, naxkʼut naq li anjel Miguel inkʼaʼ naxkanabʼ kʼanjelak. Joʼkan naq saʼ xhuhil laj Daniel naxye naq li anjel aʼin yook chi yalok rikʼinebʼ li maaʼus aj musiqʼej. Saʼ xhuhil laj Judas naxye naq yook xweechʼinkil ribʼ rikʼin laj Tza. Ut saʼ Apocalipsis naxye naq yook chi yalok rikʼin laj Tza ut ebʼ li maaʼus aj musiqʼej. Aʼin naxkʼut naq li anjel Miguel junelik naxkol xwankilal li Jehobʼa joʼ Awabʼej ut nayalok rikʼinebʼ li xikʼ nekeʼilok re li Yos. Li xkʼabʼaʼ li anjel aʼin naraj xyeebʼal: «Ani Wank Xwankil joʼ li Yos»? Abʼan, ani tzʼaqal li Arkanjel Miguel?

Naabʼalebʼ li qas qiitzʼin moko jun ta ajwiʼ li xkʼabʼaʼebʼ. Li Santil Hu naʼaatinak chirix laj Jacob. Li winq aʼin naabʼal ralal xkʼajol naq kiwank chaq ut kikʼabʼaʼiik ajwiʼ choʼq aj Israel. Li Apostol Pedro kinaweʼk ru joʼ aj Simon (Génesis 49:1, 2; Mateo 10:2). Joʼkan ajwiʼ li Santil Hu naxkʼutbʼesi naq li Jesus kikʼabʼaʼiik choʼq aj Miguel naq toj maajiʼ nachalk arin saʼ Ruuchichʼochʼ ut joʼkan wiʼ chik kiyeemank re, naq kisutqʼiik saʼ choxa. Qilaq kʼaru naxye li Santil Hu re naq tqataw ru aʼin.

Li Arkanjel. Li Santil Hu naxkʼutbʼesi naq laj Miguel aʼan «li arkánjel» (Judas 9). Li uuchil kʼabʼaʼej Arkanjel naraj xyeebʼal «li anjel li nakʼamok bʼe». Naq li Santil Hu naxye li Arkanjel, naraj xyeebʼal naq jun ajwiʼ li anjel li nakʼamok bʼe. Joʼkan naq li Santil Hu inkʼaʼ naxkʼut naq wank naabʼal li Arkanjel. Ut li Santil Hu naxye ajwiʼ naq li Jesus nakʼanjelak joʼ Arkanjel.  Li Santil Hu naxye chirix li Jesus: «Li Qaawaʼ [...] tbʼoqoq chi kaw saʼ choxa ut tixbʼaanu joʼ xyaabʼ xkux li Arkanjel» (1 Tesalonicenses 4:16, TNM). Li raqal aʼin naxkʼut chiqu naq li Jesus t-aatinaq chi kaw joʼ naxbʼaanu li Arkanjel. Joʼkan naq naqataw ru naq li Jesus aʼan li Arkanjel Miguel.

Laj jolominel. Li Santil Hu naxye naq «laj Miguel rochbʼeenebʼ li xʼánjel keʼxyal xmetzʼew rikʼin [...] li nimla xul rochbʼeenebʼ li xʼánjel» (Apocalipsis 12:7). Li raqal aʼin naxkʼut naq laj Miguel najolomink rehebʼ li anjel. Saʼ Apocalipsis naxye ajwiʼ naq li Jesus najolomink rehebʼ li anjel (Apocalipsis 19:14-16). Joʼkan ajwiʼ, li Apostol Pablo kiʼaatinak chirix «li Qaawaʼ Jesus» ut ebʼ «li xʼánjel li wankebʼ xwankil» (2 Tesalonisences 1:7). Joʼ xqakʼe reetal li Santil Hu naʼaatinak chirix laj Miguel ut ebʼ «li xʼánjel», joʼ chirix li Jesus ut ebʼ «li xʼánjel» (Mateo 13:41; 16:27; 24:31; 1 Pedro 3:22). Li Santil Hu inkʼaʼ naxye naq wank wiibʼ chʼuut chi anjel; jun naxjolomi laj Miguel ut jun li Jesus. Joʼkan naq naqataw ru naq laj Miguel aʼan li Jesus xbʼaan naq chi joʼkan nakʼabʼaʼiik saʼ choxa. *

^ párr. 1 Saʼ li tasal hu Perspicacia para comprender las Escrituras, vol. 2, saʼebʼ li perel 386, 387, taataw xkomon li esil naq laj Miguel aʼan li Ralal li Yos. Li tasal Hu aʼin rehebʼ laj Testiiw re li Jehobʼa.