Rilb'al li na'leb'

Rilb'al li xk'ab' tusulal na'leb'

Rilb'al li xtusulal naʼlebʼ

Testiiw re li Jehobʼa

Q’eqchi’

Ebʼ li naʼlebʼ li nintzol saʼ li Santil Hu

 TZOLOM 45

Najachmank jun li awabʼejilal

Najachmank jun li awabʼejilal

Chiruhebʼ li chihabʼ naq laj Salomon kixloqʼoni chaq li Jehobʼa, ebʼ laj Israel keʼwank saʼ tuqtuukilal. Abʼan kisumlaak rikʼin naabʼal chi ixq re jalan chik tenamit ut nekeʼxloqʼoni chaq li pechʼbʼil yos. Timil timil, laj Salomon kixjal li xkʼaʼuxl ut kiʼok ajwiʼ xloqʼoninkil li pechʼbʼil yos. Li Jehobʼa kijosqʼoʼk ut kixye re: «Tinmaqʼ li xʼawabʼejilal li tenamit Israel chiru laajunkabʼal ut tinjach saʼ wiibʼ. Ut li xnimal ru tinkʼe re jun rehebʼ laamoos, ut laajunkabʼal t-awabʼejinq kaʼajwiʼ saʼ li xkachʼinal ru».

Li Jehobʼa kixbʼaanu jun chik li naʼlebʼ re naq ttawmanq ru chiʼus aʼin. Laj Jeroboan jun xmoos laj Salomon yook chaq chi bʼeek naq kixtaw ribʼ saʼ bʼe rikʼin laj Ahiya, li propeet. Li propeet kirisi li raqʼ, kixpej saʼ 12 jachal ut kixye re laj Jeroboan: «Li Jehobʼa tixmaqʼ li xʼawabʼejilal li tenamit Israel chiru li xjunkabʼal laj Salomon ut tixjach saʼ wiibʼ. Chap 10 jachal li tʼikr aʼin, xbʼaan naq tat-awabʼejinq saʼ xbʼeen 10 chi teep». Naq laj Salomon kirabʼi aʼin, kiraj xkamsinkil laj Jeroboan. Joʼkan naq laj Jeroboan kiʼelelik toj Egipto. Naq laj Salomon kikamk, laj Rehoboam, li ralal, kiʼok chi awabʼejink. Tojaʼ naq laj Jeroboan kixkʼoxla naq li chʼaʼajkilal ak xnumeʼk, ut kisutqʼiik Israel.

 Chirix chik aʼan, ebʼ li cheekel winq re Israel keʼxye re laj Rehoboam: «Wi sa taawil li tenamit, li tenamit inkʼaʼ tatxkanabʼ». Abʼan ebʼ li saajil ramiiw, keʼxye re: «Kaw tattaqlanq saʼ xbʼeenebʼ. Minebʼ ru chi kʼanjelak chi kaw». Laj Rehoboam kixpaabʼebʼ li ramiiw ut kirahobʼtesink. Joʼkan naq, ebʼ li poyanam keʼxqʼet ribʼ ut keʼxkʼe laj Jeroboan chi awabʼejink saʼ li 10 chi teep. Li xʼawabʼejilal li 10 chi teep, kikʼabʼaʼiik xʼawabʼejilal li tenamit Israel. Li xʼawabʼejilal li wiibʼ chi teep, kikʼabʼaʼiik xʼawabʼejilal li tenamit Juda, ut inkʼaʼ kixkanabʼ laj Rehoboam. Chi joʼkan kijachmank li 12 chi teep re Israel.

Li tenamit Jerusalen kiwank rubʼel xwankil li xʼawabʼejilal laj Rehoboam. Laj Jeroboan inkʼaʼ kiraj naq li xtenamit txik aran chi xloqʼoninkil li Jehobʼa. Ma nakaanaw kʼaʼut? Yook xxiw xbʼaan naq kixkʼoxla naq ttzʼeqtaanaaq ut laj Rehoboam chik teʼxpaabʼ. Joʼkan naq kixyiibʼ wiibʼ li saaj wakax re oor ut kixye re li xtenamit: «Jwal najt wank Jerusalen. Kanaqex arin re xloqʼoninkil ebʼ li pechʼbʼil yos». Ebʼ li poyanam keʼabʼink chiru ut keʼxkanabʼ wiʼ chik li Jehobʼa.

«Meekʼe eeribʼ saʼ aatin rikʼinebʼ li inkʼaʼ nekeʼxpaabʼ li Yos. Xbʼaan naq, chanru naxkʼam ribʼ li tiikilal rikʼin li maaʼusilal? [...] Malaj kʼaru xjunajil laj paabʼanel rikʼin li inkʼaʼ naxpaabʼ li Yos?» (2 Corintios 6:14, 15).